Ho Nyarela ka Litabeng
Ba Lokela ho Etsisoa
Lengolo la morao-rao le hatisitsoeng ho New Haven Register, koranta ea Connecticut, le tobokelitse lintho tse itseng tse hlokometsoeng likopanong tse neng li tšoeroe ke Lipaki tsa Jehova. Lengolo lena le neng le lebisitsoe ho moqolotsi oa koranta, le ne le re: “Lipaki tsa Jehova li tsoa tšoara likopano tsa tsona tsa selemo le selemo Coliseum. Har’a lihlopha tsohle tse tsejoang, ha ho sehlopha se amoheloang haholo kapa se batloang haholo joaloka bona. Ha ho mohla Coliseum e hloekang, pele ba bokana moo, kapa e bohehang ka botle ha ba tloha joaloka ha ho bile joalo ketelong ea bona ea ho qetela.”
Ha mongoli oa lengolo lena a qotsa kopano e kileng ea tšoaroa ke Lipaki lilemong tse fetileng, o phaelletse ka ho re “Lipaki tse 75 000 li ile tsa bokana Yankee Stadium, ’me tse ling tse 20 000 li ne li bokane ka ntle ho lebala li mametse libuela-hōle moketeng oa borapeli o neng o sisinya New York ka molumo oa ’ona. Letsatsing la pele ho ile ha romeloa mapolesa a 200, lenane leo ka ho tloaelehileng le abeloang matšoele a makaalo. Empa ha romeloa a mabeli feela matsatsing a hlahlamang ho fana ka tataiso. Motse oa New York o ile oa romela bahloekisi, baapehi, matona a sepolesa le a mollo ho tla ithuta tšebetso ena e phethahetseng le e sa kholeheng. Ha ba tloha ho ne ho se letheba la lijo kapa la litšila le bonahalang, ho sa tsotellehe hore ho ile ha feptjoa litho tsa bona. Ebang u lumela mefuteng e itseng ea sephiri sa bolumeli kapa u hanana le eona, . . . u ka tsota boineelo, phetheho, le mohlala o totobetseng oa boitšoaro le bophelo ba bona bo hloekileng. Re tla be re etsa hantle haeba kaofela re ka etsisa le ho sebelisa litšoaneleho tse ntle tse bonahatsoang ke batho bana ba ikokobelitseng le ba ineetseng.”
Le hoja batho ba bangata ba talima boitšoaro ba Lipaki tsa Jehova e le taba feela ea mokhelo, Lipaki li tseba hore Bakreste ba ’nete ba tlameha ‘ho phela ka moea’ le hore ba tlameha “ho tsamaea ka tlhopheho, ka moea.” Moea oa Molimo ke ’ona o hlahisang ho bona litholoana tsa “Ierato, thabo, khotso, mamello, mosa, molemo, tumelo, bonolo, boitšoaro.” Ka sebele litšoaneleho tse joalo li lokela ho etsisoa.—Ba-Galata 5:22, 23, 25, NW.
Moqhaka o Khopisang
Baahi ba makholo ba Málaga, Spain, ba ile ba tšehetsa koleke ea sechaba ea ho etsa moqhaka oa gauda o motle bakeng sa moroetsana ea tummeng haholo sebakeng seo, “Our Lady of Hope.” Lepetjo le reng, “Grama e le ’ngoe ea gauda bakeng sa [moroetsana]” le ile la qaptjoa lilemong tse peli tse fetileng ho bokella likoleke. Ho tloha nakong eo, masale a litsebe, limetlele, lireng tsa lenyalo, esita le meno a gauda a ile a fanoa e le moneelo. Lintho tsena li ile tsa qhibilihisoa ’me tsa etsa gauda e hloekileng e boima ba lik’hilograma tse 1,5 e neng e lekane ho etsa moqhaka o tiileng oa gauda bakeng sa setšoantšo sena.
Moketeng ’ona, o neng o okametsoe ke moemeli oa mopapa le babishopo ba bang ba baholo ba Spain, “Our Lady of Hope” o ile a roesoa moqhaka ka Phuptjoane 1988. Empa leha ho le joalo, Mak’hatholike a mangata a ne sa thabela mokete ona oa ho roesa moqhaka. Koranta ea Spain El País e tlalehile hore lengolong la boipelaetso litho tsa seminare tse ka bang 20 li ile tsa botsa: “Na ha re tsoele pele ho lula re le lejoe le khopang balumeli le bao e seng balumeli ka meetlo ena ea rōna ea lefeela?” Lihlopha tse ling tsa K’hatholike li ile tsa qotsa lengolo la morao-rao la bapapa le neng le buella hore litho tsa kereke tse boemong bo botle “li fetisetse matlotlo a tsona ho mafutsana.” Ka baka la sena, Mak’hatholike ana a ile a bontša ho se lumellane ha ’ona ka baka la letsoalo mabapi le mokete ona o senyang chelete” le ka “moqhaka o chelete e boima.”
Ha se ho makatsang ha batho ba tšepahalang ba hanana ka ho felletseng le taba ea ho khabisoa ha setšoantšo se sa pheleng. Molimo o ikutloa ka tsela e tšoanang. Makholo a lilemo a fetileng, o ile a otla Baiseraele ka baka la mosebetsi o tšoanang. Jehova o ile a bolela mantsoe ana ka moprofeta oa hae Ezekiele: “Ba ne ba atisa ho ithorisa ka mahakoe a bona a bohlokoa. Ka oona ba ne ba iketsetsa litšoantšo tse nyonyehang.” (Ezekiele 7:20, The Jerusalem Bible) Ka lebaka lena, barati ba ’nete ba etsa ka bohlale ho ela hloko keletso e nakong ea Bibele ea ‘ho balehela tšebeletso ea litšoantšo.’—1 Ba-Korinthe 10:14, NW.