“Ntlo Ena ke ea Hao”

“NTLO ena ke ea hao—re e atolositse.” Mantsoe aa a akaretsa maikutlo a ba neng ba sa tsoa qeta lilemo tse peli tsa mosebetsi o boima ofising ea lekala ea Mokhatlo oa Watch Tower Australia ka tsela e loketseng hakaakang! Mantsoe ao a ne a lebisitsoe ho Jehova Molimo, ’me e ne e le karolo ea pina e qapetsoeng ketsahalo e khethehileng. Ketsahalo efe? Ho neheloa ha katoloso e ncha ea lehae la Bethele le fektheri.

Katoloso Kapele Hakaale?

Ka ho makatsang, nako e ka tlaase ho lilemo tse supileng pejana, ho ne ho ile ha ba le ho neheloa ho tšoanang ha mohaho o moholo oa Bethele o neng o sa tsoa hahoa bocha ka nako eo Ingleburn, mathōkong a ka boroa-bophirimela a Sydney, Australia. Ke hobane’ng ha katoloso e eketsehileng e ne e se e hlokahala kapele hakaale?

Lebaka le leng, lenane la Lipaki Australia le hōlile ho tloha ho tse ka tlaase ho 32 000 ka 1981 ho ea tlhorong ea tse 51 152 ka Mphalane 1989, ’me hoo ho ile ha etsa hore ho be le tlhokahalo ea ho eketsa basebetsi ba Bethele. Ho phaella moo, ho bile le keketseho e kholohali lenaneng la libuka tseo Australia e neng e li romela makaleng a mang. Hona joale, Australia e hlahisa libuka ka lipuo tse 37 tse fapaneng ho sebeletsa litlhokahalo tsa Fiji, Indonesia, Papua New Guinea, New Caledonia, New Zealand, Lihleke-hleke tsa Solomon, Tahiti, Vanuatu, Niue, Samoa Bophirimela, Tonga, Tuvalu, le Lihleke-hleke tsa Wallis, hammoho le Australia. Kahoo, lelapa la Bethele le hōlile ka potlako ho ea ho litho tse 164.

Ho amohela lelapa lena le hōlang, mathoasong a 1987 katoloso e ncha ea mekato e meraro ea liofisi e ile ea phethoa, ea fana ka sebaka se eketsehileng sa liofisi se neng se hlokoa haholo. Ka mor’a moo, Sehlopha se Busang se ile sa amohela kaho ea katoloso ea mekato e meraro ea fektheri le katoloso ea mekato e mehlano ea mohaho oa bolulo. Ka Pherekhong 1988 mosebetsi o ile oa qaleha katolosong ea fektheri e ncha, e neng e tla fana ka sebaka se eketsehileng sa fuluru se boholo ba 3 600 square meters. Likhoeli tse seng kae hamorao, mosebetsi o ile oa qaleha katolosong ea mohaho oa bolulo, o neng o tla fana ka likamore tse eketsehileng tsa ho robala tse 51.

Mahlabelo le ho Fana ka Seatla se Bulehileng

Hohle ka har’a naha ho ile ha romeloa limemo liphuthehong ho bitsa baithaopi ba neng ba ka fetoha karolo ea “lelapa la kaho” ka nako e ka fihlang ho lilemo tse peli. Karabelo e ile ea e-ba e hlollang, ’me baithaopi ba tsoang mesebetsing ea mefuta eohle ba ile ba arabela hang-hang. Ho ile ha amoheloa liforomo tsa likōpo tse fetang 700 tse fapaneng, ’me ho theosa le nako ea kaho, ka kakaretso baithaopi ba 270 ba ile ba tla ’me ba sebetsa morerong oo ka linako tse neng li fapa-fapana ho tloha ho libeke tse peli ho ea ho hoo e batlang e le lilemo tse peli.

Monna e mong oa Paki o ne a e-na le khoebo ea ho cheka fatše ka mechini seterekeng se ka leboea sa Queensland. O ile a rekisa karolo e ’ngoe ea khoebo ea hae eaba eena le mosali oa hae ba fetoha karolo ea lelapa la kaho ho tloha ha le qaleha. O ile a reka mochini o moholo o chekang o tsamaeang ka mabili a kang liketane ’me a etsa karolo e khōlō ea mosebetsi o hlokahalang oa ho cheka a sa lefise Mokhatlo letho. Ha boholo ba mosebetsi oa ho cheka bo phethiloe, o ile a rekisa mochini oo eaba o lula bakeng sa ho sebetsa likarolong tse ling tsa kaho. Ona ke mohlala o le mong feela oa moea o motle, oa boitelo o bontšitsoeng ke bohle nakong eohle ea morero oo.

Lipaki li ile tsa etsa monehelo oa lintho tse laelang le tse laollang literaka hore li sebelisoe ho tšela konkreiti e hlokahalang e boholo ba 3 300 cubic meters bakeng sa mekato e robeli mehahong e ’meli. Tse ling li ile tsa etsa monehelo ka thepa e hlokahalang bakeng sa litanka tsa metsi a konkreiti tse tšelang lilithara tse 22 000, ’me Lipaki tse sebetsang fekthering li ile tsa etsa monehelo ka matsoho a tsona ho haha litanka tseo.

Ka ho hlakileng, hase baithaopi bohle bao e neng e le litsebi tsa mosebetsi. Ha e le hantle, bahlankana ba bangata ba ile ba ithuta mesebetsi e mecha hona setšeng moo. Ba ’maloa ba ile ba fetoha lihahi tse koetlisehileng ha ba ntse ba thusa ho beha litene tse halofo ea millione tse hlokahalang bakeng sa morero oo. Ba bang ba ile ba ithuta ho polastara mabota le fuluru ea lithaele, ’me ka libeke tse seng kae feela, khaitseli e mong o ile a ba a fetoha setsebi se hloahloa haholo sa ho beha pampiri e koahelang lebota.

Letsatsi la Nehelo

Letsatsi la nehelo, Moqebelo, la 25 Pulungoana, 1989, le ile la chaba le sele le bile le hlakile—letsatsi le letle, ho ella qetellong ea nako ea selemo. Mokato oa bobeli oa katoloso ea fektheri e ncha o ne o hlekiloe ho etsa holo e khōlō bakeng sa lenaneo la nehelo. Tšebetso ea mehala ea lithelevishene e ile ea hokahanya likarolo tsa mekato e meng e ’meli ea fektheri le sebaka sa ho laela thepa, holo ea Bethele, le holo eo ho jelloang ho eona Bethele. Sena se ile sa fana ka monyetla oa bolulo bo monate ka tlung bakeng sa ba fetang 3 000.

Ka baka la hore sebaka se ne se lekanyelitsoe, ho ile ha mengoa feela ba kolobelitsoeng nako ea lilemo tse ka bang 40 hore ba be teng, hammoho le baeti ba menngoeng ke batho ka bomong ba lelapa la Bethele le la kaho. Lino-mapholi li ne li fumaneha hoseng, ’me lebokose le tšetseng lijo tse hlabosang tsa motšehare le ile la fanoa motšehare. Ka 9:00 hoseng, seboka sa selemo le selemo sa Mokhatlo oa Watchtower oa Australia se ile sa tšoaroa, ’me litho tse 21 kaofela tsa mokhatlo oa Australia li ne li le teng. Ka mor’a hore litaba tsa molao tse hlokahalang li sebetsoe, ba bang ba ile ba memeloa ho kena sebokeng, ’me bohle ba ile ba thabela ho utloa puo ea Theodore Jaracz oa Sehlopha se Busang.

Ka 1:45 thapama, ’mino oa lipina tsa ’Muso oa metsotso e 15 o ile oa etella pele lenaneo la nehelo. Bamameli ba ile ba thabela ho utloa litlaleho, lipale tsa bophelo, liphihlelo, le litlhaloso tse thahasellisang, tsa litho tse tharo tsa Sehlopha se Busang tse neng li le teng. Ho litho tsena, Carey Barber le Daniel Sydlik ba ne ba etetse naha eo e tlaase ka lekhetlo la bona la ho qala. Moena Barber o ile a bua ka sehlooho “Kotulo ke Bofelo ba Mehla,” ha Moena Sydlik a ile a bua sehloohong “Ho Thaba Batho Bao Molimo oa Bona e Leng Jehova.” Moena Jaracz, ea neng a sebeletsa lekala la Australia e le molebeli oa libaka, o ile a nehelana ka puo ea nehelo.

Tšobotsi e thabisang ea lenaneo e ile ea ba ho bina pina e nang le litemana tse ’nè pejana feela ho puo ea nehelo. Se theiloe mantsoeng a Esaia a ho Esaia 60:22 (NW), sehlooho sa pina eo e ne e le “E Monyenyane o Fetoha Sekete.” Mantsoeng a pina ho ile ha senoloa teboho ho Jehova ka hore e be baithaopi ba bangata ba sebelitseng ka boithatelo ba bile le tokelo ea ho atolosa ‘ntlo ea hae’ karolong ena ea tšimo ea lefatše ka bophara.

[Litšoantšo tse leqepheng la 15]

Katoloso e ncha ea mohaho oa khatiso oa Watch Tower Ingleburn, N.S.W., Australia

C. Barber

T. Jaracz

D. Sydlik