Kamoo Metse ea Boholo-holo e Neng e Hōla Kateng

BATHO ba ile ba qala ho haha metse ka mabaka a ’maloa: bakeng sa tšireletso, mesebetsi e meholo, khoebo, le bolumeli. Ha ho shejoa palo le boholo ba litempele tse utolotsoeng ke baepolli ba lintho tsa khale, ntle le pelaelo bolumeli e ne e le e ’ngoe ea litšusumetso tsa sehlooho tsa ho ahoa ha metse e mengata ea boholo-holo.

Motse oa Babele ka tora ea oona ea bolumeli ke mohlala o mong. Bahahi ba oona ba ile ba re e mong ho e mong: “Tloong joale, re ikhahele motse le tora, hloro ea eona e fihle leholimong, ’me re iketsetse lebitso, re tle re se ke ra qhalanyetsoa lefatšeng lohle.” (Genese 11:4-9) Kotsi ea ho ba makhoba a batho ba ratang ntoa ba neng ba batla tlhōlo e ne e le lebaka le leng le susumetsang la hore batho ba tletseng tšabo ba ikopanye hammoho ho etsa metse. Ba ne ba lula ba entse meeli le marako ho potoloha metse ena, ’me ba ne ba koala liheke bosiu le ka linako tsa kotsi.—Joshua 2:5.

Khetho ea Litša

Ho khetha sebaka sa motse ho ne ho itšetlehile ka mabaka a ’maloa. Kaha haholo-holo tšireletso e ne e le ea bohlokoa bo boholo, hangata metse ea boholo-holo e ne e thehoa libakeng tse phahameng. Ho ekeletsa litšireletsong tsa tlhaho, hangata ho ne ho hahoa marako a maholo kapa marako a mangata le litora le, mabakeng a mang, liforo tse tebileng le tse sephara tsa metsi.

Ha metse e hōla, ka linako tse ling ho ne ho hlokahala ho atolosa marako e le ho akareletsa libaka tse khōloanyane. Menyako e kenang le marakong e ne e sireletsoa ka liheke tse thata tse neng li ka tšoarella ho thibelloa ho holelele.

Ho ne ho hlokahala mohloli o motle oa metsi haufinyane ’me o ne o sa lokela ho hlokomolohuoa ha ho khethoa setša sa motse. Ka lebaka lena ho ne ho nkoa e le habohlokoa ha metse e e-na le metsi a kopotsang fatše kapa liliba ka har’a meeli ea eona. Mabakeng a mang, haholo-holo Megiddo, Gibeone, le Jerusalema, ho ne ho e-na le litonnoro le likotopo tsa metsi tse tsamaeang ka tlas’a lefatše li kenya metsi ka hare a e-tsoa mehloling e ka ntle ho marako.—2 Marena 20:20.

Lipheo le merero e tšoanang ha ho ahoa metse ea boholo-holo li ne li etsa hore meralo le kaho ea eona e tšoane haholo. ’Me, kaha lilemo tse makholo tsa ho feta ha nako li entse phetoho e fokolang, metse e meng kajeno e ntse e tšoana haholo le lilemong tse likete tse peli kapa tse tharo tse fetileng.

Metse e mengata e ile ea qala e le metsana feela, ea hōla ho ba boholo ba toropo kapa boemong ba motse, ’me ka linako tse ling ea e-ba linaha tsa metse e meholo tse laolang bophelo ba batho ba likete tse makholo. Ka khōlo e joalo, ’muso le matla a boahloli li ile tsa oela matsohong a baeta-pele ba ’maloa ba lipolotiki le ba sesole, ’me hangata matla a maholo a laolang tsela ea mahae ea bophelo e ne e le a borena ba baruti ba bahatelli.

Ka hona, ho ile ha e-ba le phapang e totobetseng ha metse ea Iseraele e qala ho hlahella lefatšeng, eo puso ea eona e neng e le matsohong a batsamaisi ba khethiloeng ka puso ea Molimo ba tlangoang ke tokelo ea ho sebelisa melao ea motheo e fanoeng ke Molimo. Jehova e ne e le Morena, Monehi-molao, le Moahloli oa sechaba seo, ’me ha baemeli ba hae ba bonahalang ka botšepehi ba phetha likabelo tsa bona, sechaba se ne se thaba.—Esdrase 7:25, 26.