O Ile a ‘Mamella ho Isa Bofelong’

NEHELANONG ea 1993 ea video e bontšoang litho tse ncha tsa basebeletsi ba ntlo-khōlō ea Lipaki tsa Jehova, Lyman Alexander Swingle o ile a hlalosa maikutlo a hae mabapi le ho sebeletsa Jehova a re: “Lesole le shoela likano!”a

Mor’abo rōna Swingle ea lilemo li 90 o ile a fela a etsa seo a neng a khothalletsa ba bang ho se etsa. O ile a ‘mamella ho isa bofelong.’ (Matheu 24:13) Le hoja a ne a fokola ’meleng, ka Laboraro, la la 7 March, o ile a ba teng sebokeng sa Sehlopha se Busang sa Lipaki tsa Jehova seo e neng e le setho sa sona. Ka Labobeli le hlahlamang boemo ba hae bo ile ba mpefala, ’me ka 4:26 hoseng, ka la 14 March, ngaka ea hae e ile ea bolela hore o hlokahetse.

Lyman Swingle o qalile tšebeletso ea hae ntlo-khōlō ea Lipaki tsa Jehova Brooklyn, New York, ka la 5 April, 1930. O sebelelitse moo ka lilemo tse ka bang 71. Kabelo ea Lyman ea pele e ne e le ho sebeletsa sebakeng seo ho kopanngoang libuka ho sona, ka mor’a moo o ile a sebetsa sebakeng seo ho hatisoang libuka ho sona, ’me o ile a boela a thusa ho etsa enke. Ha e le hantle, Mor’abo rōna Swingle o ile a qeta lilemo tse ka bang 25 a sebetsa lefapheng le etsang enke. O ile a boela a sebeletsa e le setho sa bangoli ba ntlo-khōlō ka lilemo tse fetang 20. Lilemong tsa hae tsa ho qetela tse 17, o ile a sebetsa Ofising ea Ramatlotlo.

Lyman e ne e le ’moleli ea sebete oa ’Muso oa Molimo. Lilemong tsa hae tsa pele Brooklyn, eena hammoho le eo a neng a lula le eena kamoreng, Arthur Worsley, ba ne ba tloaetse ho tsamaea ka se seng sa liketsoana tsa Lipaki ba nyolosa le Nōka ea Hudson. Ba sebelisa thepa e hōlisang molumo, ba ne ba qeta mafelo-beke a mangata ba ntse ba hasa molaetsa oa ’Muso ho batho ba lulang haufi le lebōpo.

Mor’abo rōna Swingle o hlahetse Lincoln, Nebraska, ka la 6 November, 1910, empa kapele ka mor’a moo lelapa labo le ile la fallela Salt Lake City, Utah. Ha ba le moo, ka 1913, batsoali ba hae e ile ea e-ba Liithuti tsa Bibele, kamoo Lipaki tsa Jehova li neng li bitsoa kateng mehleng eo. Ho pholletsa le lilemo, lelapa la Swingle le ne le amohela libui tse ngata tse etileng tse neng li tsoa ntlo-khōlō ea Lipaki Brooklyn, ’me banna bana ba ile ba e-ba le tšusumetso e ntle ho Lyman. Ka 1923, ha a le lilemo li 12, o ile a kolobetsoa e le pontšo ea boinehelo ba hae ho Molimo.

Ka mor’a hore a sebeletse Brooklyn ka lilemo tse 26 e le lesoha, bophelo ba Lyman bo ile ba entšoa ka mokhoa o ke keng oa lekanngoa ha a nyala Crystal Zircher ka la 8 June, 1956. Ba ne ba sa arohane, ba kopanela tšebeletsong hammoho ho fihlela lefung la Crystal ka 1998. Lilemo tse ka bang tharo pejana, Crystal o ne a ile a otloa ke stroke se neng se mo siile a holofetse haholo. Tsela eo Lyman a neng a kenella ka eona ho mo hlokomeleng letsatsi le letsatsi e ne e le mohlala oa boinehelo o neng o e-na le tšusumetso ho bohle ba neng ba ba tseba, haholo-holo ho bohle ba neng ba ee ba bone Lyman a sututsa setulo sa likooa litselaneng tse tikolohong eo ha Crystal a ntse a fa batho ba fetang ka tsela Molula-Qhooa le Tsoha!

Mor’abo rōna Swingle e ne e le motho ea tobang taba, ea nang le botsoalle ea neng a ratoa ke bohle ba neng ba mo tseba. Joaloka ntate oa hae le ’mè oa hae, o ne a e-na le tšepo e thehiloeng Bibeleng ea ho phela le Jesu Kreste ’Musong oa leholimo, e leng tšepo eo re kholisehileng hore o se a e finyeletse.—1 Bathesalonika 4:15-18; Tšenolo 14:13.

[Mongolo o botlaaseng ba leqephe]

[Setšoantšo se leqepheng la 31]

Mor’abo rōna Swingle o sebelitse lilemo tse ka bang 25 lefapheng le etsang enke

[Setšoantšo se leqepheng la 31]

Lyman le Crystal ba ne ba sa arohane