Baboleli ba ’Muso Baa Tlaleha

Lengolo le Tsoang ho Alejandra

KA NAKO e telele ho ngola mangolo ho ’nile ha ipaka e le tsela e atlehang ea ho fana ka bopaki. Le hoja ka linako tse ling motho a ka ’na a se ke a tseba hore na seo se tla fella ka eng, ba phehellang ho sebelisa tsela ena ba ’nile ba hlohonolofatsoa ka ho enneng. Ba hopola keletso e bohlale ea Bibele e reng: “Jala peō ea hao hoseng ’me u se ke ua lumella letsoho la hao hore le phomole ho fihlela ka shoalane; etsoe ha u tsebe moo sena se tlang ho ba le katleho, ebang ke mona kapa mane, kapa hore na ka bobeli li tla ba molemo ka ho tšoanang.”—Moeklesia 11:6.

Alejandra, e leng mocha oa Paki ea sebelelitseng ofising ea lekala ea Lipaki Tsa Jehova ea Mexico ka lilemo tse ka bang leshome, o ne a fuoa phekolo ea lik’hemik’hale tse loantšang kankere. Boemo ba hae bo ile ba mpefala, ’me a fokola haholo hoo a neng a sitoa ho etsa mesebetsi ea hae ea letsatsi le letsatsi. Leha ho le joalo, kaha Alejandra o ne a sa batle ho hlokomoloha tšebeletso ea hae, o ile a etsa qeto ea ho ngola mangolo. O ne a ngola ka tokisetso ea thuto ea lehae ea Bibele e sa lefelloeng ’me a kenyelletsa nomoro ea ’mè oa hae ea thelefono. A ntan’o fa ’mè oa hae mangolo ao e le hore a a siele beng ba matlo bao a fumanang ba le sieo ha a etsa tšebeletso ea ntlo le ntlo.

Ka nako e tšoanang, Diojany, e leng moroetsana ea tsoang Guatemala, o ile a ea Cancún, Mexico, ho ea sebetsa lapeng. Ha a ntse a le moo, o ile a kopana le Lipaki Tsa Jehova ’me a thabela ho buisana le tsona ka Bibele. Hamorao, bahiri ba hae ba ile ba etsa qeto ea ho fallela Mexico City ’me ba ne ba batla hore a tsamaee le bona. Diojany o ne a le leqe ho tsamaea le bona hobane o ne a tla arohana le Lipaki.

Bahiri ba hae ba ile ba mo tiisetsa ba re: “U se ke ua tšoenyeha, Lipaki li teng hohle. Re tla li batla hang feela ha re fihla moo.” A thabetse seo, Diojany o ile a lumela ho tsamaea le bona. Hang ha ba fihla Mexico City, bahiri ba Diojany ba ile ba batla Lipaki. Empa ka mabaka a itseng, ba sitoa ho li fumana, le hoja motseng oo ho e-na le Lipaki tse fetang 41 000 le liphutheho tse 730.

Ka mor’a nakoana, Diojany o ile a nyahama kaha o ne a sa khone ho fumana Lipaki e le hore a boele a tsoele pele ho buisana le tsona ka Bibele. Ka letsatsi le leng, mohiri oa hae oa mosali o ile a tla ho eena, a re: “Litaba tse monate! Molimo oa hao o utloile lithapelo tsa hao.” A mo fa lengolo, a re: “Lipaki li u sietse lengolo lena.” E ne e le lengolo le tsoang ho Alejandra.

Diojany o ile a ikopanya le ’mè oa Alejandra le moena oa Alejandra, e leng Blanca, ’me a amohela thuto ea Bibele. Ka mor’a libeke tse seng kae, o ile a kopana le Alejandra ’me ba thabelana haholo. Alejandra o ile a mo khothalletsa hore a tsoele pele ho ikitlaetsa thutong ea hae ea Bibele e le hore a hatele pele moeeng.

Alejandra o ile a hlokahala likhoeli li se kae ka mor’a moo, ka July 2003, a siela balumeli-’moho le eena mohlala o motle oa tumelo le sebete. Lepatong la hae, ba bangata ba ile ba ameha ka ho teba ha ba kopana le Diojany ’me ba utloa a re: “Alejandra le ba lelapa labo ba ntšietse mohlala o motle. Ke ikemiselitse ho sebeletsa Jehova le ho kolobetsoa haufinyane. Ruri ke lakatsa ho boela ke bona Alejandra Paradeiseng e tlang!”

E, lengolo e ka ’na ea e-ba ntho e fokolang. Empa le ka ba le liphello tse ntle le tse tšoarellang hakaakang!