Kamoo re ka Balang Matsatsi a Rōna Kateng

“RE BONTŠE kamoo re lokelang ho bala matsatsi a rōna ka tsela eo ka eona re ka fumanang pelo e bohlale.” (Pesaleme ea 90:12) Ena e bile thapelo e ileng ea etsoa ka boikokobetso ke mongoli oa Bibele Moshe. Ka ho toba o ne a kōpa eng? Na le rōna re ka etsa likōpo tse tšoanang tse nang le tlhompho ha re rapela?

Temaneng ea 10, Moshe o ile a tletleba ka bokhutšoanyane ba matsatsi a bophelo ba motho. Ketsahalong e ’ngoe, o ile a tlaleha polelo ea Jobo, ea itseng: “Motho, ea tsoetsoeng ke mosali, o phela hakhutšoanyane ’me o khotše likhathatso.” (Jobo 14:1) Ho hlakile hore Moshe o ne a utloa bohloko ha a hlokomela bokhutšoanyane ba bophelo ba motho ea sa phethahalang. Kahoo, o ne a talima letsatsi ka leng la bophelo e le mpho ea bohlokoa. Ha a etsa thapeli ena ho Molimo, Moshe o ile a bolela takatso ea hae ea ho phela matsatsi a sa ntsaneng a setse a bophelo ba hae ka bohlale, ka tsela e neng e tla thabisa Mōpi oa hae. Na le rōna ha rea lokela ho batla ho qeta matsatsi a bophelo ba rōna ka tsela e nang le morero? Re tla ikemisetsa ka tieo ho etsa joalo haeba re batla hore Molimo a re amohele hona joale.

Ho ne ho e-na le lebaka le leng le ileng la susumetsa Moshe hammoho le Jobo, e leng lebaka le lokelang ho re susumetsa le rōna. Ka bobeli ba bona banna bana ba tšabang Molimo ba ne ba lebeletse moputso oa ka moso—oa bophelo lefatšeng tlas’a maemo a molemo le ho feta. (Jobo 14:14, 15; Baheberu 11:26) Ka nako eo, ha ho mosebetsi o molemo oa mang kapa mang o tla khaoletsoa ke lefu. Mōpi oa rōna o rera hore batho ba tšepahalang ba tla phela ka ho sa feleng lefatšeng la paradeise. (Esaia 65:21-24; Tšenolo 21:3, 4) Le uena u ka ba le tšepo ena haeba u ‘bala matsatsi a hao ka tsela eo ka eona u ka fumanang pelo e bohlale.’