Lena ke Lefa la Rōna la Moea

1. Ke’ng eo ka lerato Jehova a ileng a e sireletsa molemong oa batho?

JEHOVA, “Molimo ea phelang le ea lulang a le teng,” o ’nile a sireletsa molaetsa oa hae o fang batho bophelo. Re kholisehile hore o tla lula o le teng, kaha “lentsoe la Jehova le lula le le teng ka ho sa feleng.” (1 Pet. 1:23-25) Ruri re motlotlo hore ebe ka lerato Jehova o ile a sireletsa boitsebiso ba bohlokoa hakana ka Lentsoeng la hae, e leng Bibele!

2. Ke’ng eo Molimo a e sirelelitseng ka Lentsoeng la hae e le hore batho ba ka e sebelisa?

² Molimo o ’nile a sireletsa lebitso la hae ka Lentsoeng la hae e le hore bahlanka ba hae ba ka le sebelisa. Mangolo a ile a qala ho bua ka “Jehova Molimo” ‘historing ea maholimo le lefatše.’ (Gen. 2:4) Lebitso la Molimo le ile la ngoloa ka mohlolo ka makhetlo a ’maloa letlapeng le neng le e-na le Melao e Leshome. Ka mohlala, molao oa pele o ile oa qala ka ho re: “Ke ’na Jehova Molimo oa hao.” (Ex. 20:1-17) Lebitso la Molimo haesale le le teng hobane ’Musi Morena Jehova o ’nile a sireletsa Lentsoe la hae hammoho le lebitso la hae ho sa tsotellehe boiteko ba Satane ba ho le felisa.—Pes. 73:28.

3. Le hoja lithuto tse fosahetseng tsa bolumeli li atile, ke’ng eo Molimo a e sirelelitseng?

³ Jehova o boetse o sirelelitse ’nete ka Lentsoeng la hae. Le hoja lithuto tse fosahetseng tsa bolumeli li atile lefatšeng lohle, ruri re leboha Molimo hore ebe o re file leseli la moea le ’nete! (Bala Pesaleme ea 43:3, 4.) Le hoja batho ba bangata ba tsamaea lefifing, re thabela hore ebe re tsoela pele re tsamaea leseling la moea leo Molimo a re fileng lona.—1 Joh. 1:6, 7.

RE NA LE LEFA LEO RE LOKELANG HO LE NKA E LE LA BOHLOKOA

4, 5. Ke tlotla efe e khethehileng eo re ’nileng ra ba le eona ho tloha ka 1931?

⁴ Kaha re Bakreste, re na le lefa la bohlokoa. Collins Cobuild English Dictionary e re: “Lefa la naha ke lintho tsohle tse ntle tseo naha e nang le tsona, meetlo kapa mekhoa ea bophelo e ’nileng ea e-ba teng ka lilemo tse ngata eo meloko ea pele e ileng ea e fetisetsa ho e latelang.” Lefa la rōna la moea le akarelletsa ho ba le tsebo e nepahetseng ea ’nete ea Lentsoe la Molimo le ho utloisisa linnete tse mabapi le eena le merero ea hae ka tsela e hlakileng. Le boetse le akarelletsa tlotla eo re e filoeng ea ho bitsoa ka lebitso la Molimo.

⁵ Re ile ra amohela lebitso la rōna le lecha kopanong ea setereke e neng e tšoaretsoe Columbus, Ohio, U.S.A., ka 1931. Ho ne ho ngotsoe “JW” lenaneong la kopano. Morali e mong oabo rōna o ile a re: “Batho ba ne ba nahana lintho tse ngata mabapi le hore na ebe JW e emela’ng—ba bang ba ne ba re e emela Just Wait, [Emang hanyenyane], Just Watch [Le tla bona] ba bang ba ne ba re e emela Jehovah’s Witnesses [Lipaki Tsa Jehova], e leng e nepahetseng.” Re ne re ntse re bitsoa Liithuti Tsa Bibele, empa re ile ra amohela lebitso la Lipaki Tsa Jehova ka Sontaha sa la 26 July, 1931. Re ile ra thabela ho amohela lebitso leo le hlahang ka Mangolong. (Bala Esaia 43:12.) Mora e mong oabo rōna o ile a re: “Nke ke ka lebala kamoo ho ileng ha tlala lerata la mohoo le litlatse kateng kopanong eo.” Ha ho na motho ea neng a batla lebitso leo lefatšeng lohle, empa Molimo o re hlohonolofalitse ka hore re le sebelise ka lilemo tse fetang mashome a robeli. Ruri ke tlotla e khethehileng ho ba Lipaki Tsa Jehova!

6. Lefa la rōna la moea le akarelletsa boitsebiso bofe bo nepahetseng?

⁶ Lefa la rōna la moea le akarelletsa boitsebiso bo nepahetseng le ba bohlokoa bo ka Bibeleng bo buang ka bahlanka ba Molimo ba nakong e fetileng. Ka mohlala, nahana ka Abrahama, Isaka le Jakobo. E tlameha ebe bapatriareka bana ba ne ba buisana ka hore na ba lokela ho etsa’ng e le hore ba thabise Jehova. Kahoo, ha ho makatse hore ebe Josefa ea lokileng o ile a hana ho etsa boitšoaro bo bobe ba ho kopanela liphate e le hore a se ke a “siteloa Molimo.” (Gen. 39:7-9) Litloaelo tsa Bakreste li ne li boetse li fetisetsanoa ka molomo kapa ka ho latela mohlala oa ba bang. Tse ling tsa tsona e ne e le lintlha tse mabapi le Lijo Tsa Shoalane Tsa Morena tseo moapostola Pauluse a ileng a li fetisetsa liphuthehong tsa Bokreste. (1 Bakor. 11:2, 23) Kajeno, lintlha tseo re li hlokang e le hore re ka rapela Molimo “ka moea le ka ’nete,” ke karolo ea lintho tseo a li ngotseng ka Lentsoeng la hae. (Bala Johanne 4:23, 24.) Morero oa Bibele ke ho fa batho bohle tsebo, empa rōna kaha re bahlanka ba Jehova re e ananela le ho feta.

7. Lefa la rōna le akarelletsa tšepiso efe e khothatsang?

⁷ Karolo e ’ngoe ea lefa la rōna la moea e akarelletsa litlaleho tse hatisitsoeng mehleng ena tse bontšang hore ‘Jehova o ka lehlakoreng la rōna.’ (Pes. 118:7) Sena se etsa hore re ikutloe re sireletsehile esita le ha re hlorisoa. Karolo e khothatsang haholo ea lefa la rōna la moea le ntseng le tsoela pele ho eketseha, ke tšepiso ena e reng: “‘Sebetsa leha e le sefe se tla etsoa khahlanong le uena se ke ke sa atleha, le leleme leha e le lefe le tla u tsohela matla kahlolong u tla le ahlola. Lena ke lefa la bahlanka ba Jehova, ’me ho loka ha bona ho tsoa ho ’na,’ ho bolela Jehova.” (Esa. 54:17) Ha ho sebetsa le se seng har’a libetsa tseo Satane a li sebelisang se tla re ntša kotsi ka ho sa feleng.

8. Re tla tšohla’ng sehloohong see le se latelang?

⁸ Satane o ile a leka ho felisa Lentsoe la Molimo le lebitso la Hae e leng Jehova haesita le ho leka ho thibela ’nete hore e ate. Empa Satane a ke ke a o besa oa tuka ha a bapisoa le Jehova ea ileng a nyopisa boiteko bohle boo a bo entseng. Sehloohong sena le se latelang, re tla bona (1) kamoo Molimo a ileng a sireletsa Lentsoe la hae kateng; (2) kamoo Jehova a ileng a etsa bonnete ba hore o sireletsa lebitso la hae kateng; le (3) kamoo Ntate oa rōna ea leholimong e leng Mohloli le Mosireletsi oa ’nete eo re e fumaneng.

JEHOVA O ’NILE A SIRELETSA LENTSOE LA HAE

9-11. Ke mehlala efe e bontšang hore Bibele e ’nile ea pholoha ha e ne e hlaseloa ka mekhoa e fapaneng?

⁹ Jehova o ’nile a sireletsa Lentsoe la hae khahlanong le boiteko bohle ba ho leka ho le felisa. Enciclopedia Cattolica (Catholic Encyclopedia) e re: “Ka 1229, Lekhotla la Toulouse le ile la thibela batho feela ba tloaelehileng ho li sebelisa [Libibele tsa lipuo tse ling tse tloaelehileng] e le hore ba loantšane le Maalbigense le Mawaldense . . . Seboka se neng se tšoaretsoe Tarragona, Spain, ka 1234, se neng se etelletsoe pele ke James I, se ile sa etsa thibelo e tšoanang. . . . Roman See e ile ea kenella tabeng ena ka lekhetlo la pele ka 1559, ha lethathamo la libuka la Paul IV le thibela ho hatisoa ha [Li]bibele ka lipuo tse ling tse tloaelehileng le hore batho ba be le tsona ntle ho tumello ea Ofisi e Halalelang.”

¹⁰ Ho sa tsotellehe hore na Bibele e ile ea hlaseloa ka mekhoa e fapaneng hakae, e ’nile ea sireletsoa. Hoo e ka bang ka 1382, John Wycliffe le basebetsi-’moho le eena ba ile ba hatisa Bibele ea pele e fetoletsoeng ka Senyesemane. Mofetoleli e mong oa Bibele e ne e le William Tyndale, ea ileng a bolaoa ka 1536. Ha a ne a tlameletsoe thupeng, o ile a hoeletsa a re, “Morena, bula mahlo a morena oa Engelane.” Ka mor’a moo o ile a khangoa eaba oa chesoa.

¹¹ Bibele e ’nile ea pholoha ho sa tsotellehe likhanyetso tse neng li le khahlanong le eona. Ka mohlala, ka 1535, Miles Coverdale o ile a fetolela Bibele ka Senyesemane. Coverdale o ile a sebelisa phetolelo ea Tyndale ea “Testamente e Ncha” le ea “Testamente ea Khale” ho tloha ho Genese ho ea ho Likronike. O ile a fetolela likarolo tse ling tsa Mangolo ho tsoa Selatineng le Bibeleng ea Sejeremane ea Martin Luther. Kajeno, batho ba ananela Phetolelo ea Lefatše le Lecha ea Mangolo a Halalelang kaha e hlakile, e nepahetse ebile e re tsoela molemo ha re le mosebetsing oa boboleli. Hoa thabisa ho tseba hore Satane kapa batho ba ke ke ba khona ho felisa Lentsoe la Jehova.

JEHOVA O ’NILE A SIRELETSA LEBITSO LA HAE

12. Phetolelo ea Lefatše le Lecha e phethile karolo efe mabapi le ho sireletsa lebitso la Molimo?

¹² Jehova Molimo o ile a etsa bonnete ba hore lebitso la hae lea sireletsoa ka Lentsoeng la hae. Phetolelo ea Lefatše le Lecha e phetha karolo ea bohlokoa haholo mabapi le taba eo. Selelekeleng sa eona, komiti ea bafetoleli ba eona ba inehetseng e ile ea ngola ea re: “Tšobotsi e ka sehloohong ea phetolelo ena ke ho khutlisetsa lebitso la Molimo sebakeng sa lona se nepahetseng Bibeleng ea Senyesemane. Seo se entsoe ka hore ho sebelisoe phetolelo e amohelehang ea Senyesemane e leng ‘Jehovah’ ka makhetlo a 6 973 ka Mangolong a Seheberu le ka makhetlo a 237 ka Mangolong a Segerike a Bakreste.” Hona joale Phetolelo ea Lefatše le Lecha e fumaneha e feletse kapa e sa fella ka lipuo tse fetang 116, ’me ho se ho hatisitsoe Libibele tse fetang 178 545 862.

13. Re tseba joang hore batho ba tsebile lebitso la Molimo ho tloha ha ba ne ba bōptjoa?

¹³ Haesale batho ba tseba lebitso la Molimo ho tloha ha ba ne ba bōptjoa. Adama le Eva ba ne ba le tseba ’me ba ne ba tseba hantle hore na le bitsoa joang. Ha Kama a ne a hlompholla ntate oa hae ka mor’a Moroallo, Noe o ile a re: “Ho bokoe Jehova, Molimo oa Sema, ’me [mora oa Kama] Kanana e ke e be lekhoba la hae.” (Gen. 4:1; 9:26) Molimo o ile a re: “Ke ’na Jehova. Ke lona lebitso la ka; ’me nke ke ka fa e mong khanya ea ka.” O ile a boela a re: “Ke ’na Jehova, ha ho e mong. Kantle ho ’na ha ho na Molimo.” (Esa. 42:8; 45:5) Jehova o entse bonnete ba hore lebitso la hae lea sireletsoa ebile le tsebisoa batho lefatšeng lohle. Ruri ke tlotla e khōlō hore ebe re sebelisa lebitso Jehova le hore ebe re Lipaki tsa hae! Ha e le hantle, re tla hoeletsa re re: “Ka lebitso la Molimo oa rōna re tla phahamisa lifolakha tsa rōna.”—Pes. 20:5.

14. Ntle le ka Bibeleng, lebitso la Molimo le ka fumanoa hokae hape?

¹⁴ Lebitso la Molimo ha le hlahe ka Bibeleng feela. Nahana ka Lejoe la Moabe, le ileng la fumanoa Dhiban (Dibon), e bohōle ba lik’hilomithara tse 21 ka bochabela ho Leoatle le Shoeleng. Lejoe leo le bua ka Morena Omri oa Iseraele ’me le boetse le akarelletsa le seo Morena Mesha oa Moabe a ileng a se bua mabapi le ha a ne a fetohela Iseraele. (1 Mar. 16:28; 2 Mar. 1:1; 3:4, 5) Lejoe leo e boetse ke la bohlokoa hobane lebitso la Molimo lea hlaha ho lona le ngotsoe ka litlhaku tse ’ne tsa Seheberu. Litlhaku tseo tse ’nè tsa Seheberu tse emelang lebitso la Molimo li boetse li hlaha ka makhetlo a ’maloa Mangolong a Lakishe a maqhetsoaneng a nkho ea letsopa a ileng a fumanoa Iseraele.

15. Septuagint ke eng, hona ho tlile joang hore e be teng?

¹⁵ Bafetoleli ba Bibele ba khale ba ile ba kenya letsoho ho etsa hore lebitso la Molimo le sireletsoe. Ka mor’a hore Bajuda ba isoe botlamuoeng Babylona ho tloha ka 607 B.C.E. ho fihlela ka 537 B.C.E., ba bangata ba bona ha baa ka ba khutlela Juda le Iseraele. Lekholong la boraro la lilemo B.C.E., Bajuda ba bangata ba ne ba se ba lula Alexandria, Egepeta, ’me ba ne ba hloka hore Mangolo a Seheberu a fetoleloe Segerikeng, e leng puo e neng e buuoa ke batho ba bangata lefatšeng ka nako eo. Phetolelo eo e ile ea phethoa lekholong la bobeli la lilemo B.C.E., ’me e bitsoa Septuagint. Likopi tse ling tsa eona li na le lebitso Jehova ka Seheberu.

16. Fana ka mohlala oa kamoo buka e ileng ea qala ho hatisoa ka selemo sa 1640 e ileng ea sebelisa lebitso la Molimo kateng.

¹⁶ Lebitso la Molimo le fumanoa bukeng ea Bay Psalm Book, e leng buka ea pele e ileng ea hatisoa likoloneng tsa Engelane tse Amerika. Khatiso ea eona ea pele (e ileng ea hatisoa ka 1640) e nang le Lipesaleme, e ile ea fetoleloa ho tloha puong ea Seheberu ho ea Senyesemaneng sa mehleng eo. E sebelisa lebitso la Molimo litemaneng tse kang Pesaleme ea 1:1, 2 e reng, “motho ea lehlohonolo” ha a tsamaee ka keletso ea ba khopo, “empa molao oa Iehovah, ke thabo eo a e lakatsang.” E le hore u fumane lintlha tse ling mabapi le lebitso la Molimo, sheba bukana ea Lebitso la Molimo Le tla ’Ne le be Teng Ka ho sa Feleng.

JEHOVA O SIRELETSA ’NETE

17, 18. (a) U ka hlalosa lentsoe “’nete” joang? (b) “’Nete ea litaba tse molemo” e akarelletsa’ng?

¹⁷ Re sebeletsa “Jehova Molimo oa ’nete” re thabile. (Pes. 31:5) Collins Cobuild English Dictionary e re: “’Nete ka ntho e itseng ke sohle seo ntho eo e leng sona, ho e-na le lintho tse inahaneloang kapa tse iqapeloang ka eona.” Ka Seheberu se sebelisitsoeng ha ho ne ho ngoloa Bibele, hangata lentsoe le fetoletsoeng e le “’nete” le amana le ntho ea ’nete, e ka tšeptjoang, e tšepahalang kapa e thehiloeng ’neteng. Lentsoe la Segerike le fetoletsoeng e le “’nete” le bolela ntho e lumellanang le ’nete kapa e loketseng le e nepahetseng.

¹⁸ Jehova o ’nile a sireletsa ’nete a ba a tiisa hore tsebo ea eona e lula e eketseha. (2 Joh. 1, 2) Kutloisiso ea rōna ea ’nete e lula e ntse e hlaka, kaha “tsela ea ba lokileng e joaloka leseli le khanyang le ntseng le khanya ka ho eketsehileng ho fihlela motšehare o moholo”! (Liprov. 4:18) Ha Jesu a ne a rapela Molimo o ile a re: “Lentsoe la hao ke ’nete.” (Joh. 17:17) Lentsoe la Molimo le na le “’nete ea litaba tse molemo,” e leng lithuto tsohle tsa Bokreste. (Bagal. 2:14) Lithuto tseo li akarelletsa ’nete ka lebitso la Jehova, bobusi ba hae, sehlabelo sa Jesu sa thekollo, tsoho ea bafu le ’Muso oa Molimo. A re ke re hlahlobeng kamoo Molimo a ileng a sireletsa ’nete ho sa tsotellehe boiteko ba Satane ba ho e thibela ho ata.

JEHOVA O NYOPISA BOITEKO BA SATANE BA HO PATA ’NETE

19, 20. Nimrode e ne e le mang, hona ke ntho efe eo a neng a rerile ho e etsa e ileng ea hlōleha?

¹⁹ Ka mor’a Moroallo, ho ile ha e-ba le mantsoe a reng: “Feela joaloka Nimrode setsomi se matla se hanyetsang Jehova.” (Gen. 10:9) Kaha Nimrode e ne e le mohanyetsi oa Jehova Molimo, ha e le hantle o ne a rapela Satane ’me o ne a tšoana le bahanyetsi bao Jesu a ileng a re ho bona: “Le tsoa ho ntat’a lōna Diabolose, ’me le lakatsa ho phetha litakatso tsa ntat’a lōna. . . . ha aa ka a ema a tiile ’neteng.”—Joh. 8:44.

²⁰ Nimrode o ne a busa Babele le metse e meng e meholo e pakeng tsa Nōka ea Tigris le ea Eufrate. (Gen. 10:10) Ho ka ’na ha etsahala hore ebe ka taelo ea hae, Babele le tora ea eona li ile tsa qala ho hahuoa hoo e ka bang ka 2269 B.C.E. Liahi tseo li ile tsa e-ba khahlanong le thato ea Jehova ea hore batho ba tlale lefatše, ’me li ile tsa re: “Tloong! A re ikaheleng motse le tora eo tlhōrō ea eona e leng maholimong, ’me re iketsetseng lebitso le tummeng, esere ra hasanngoa lefatšeng lohle.” Empa batho bao ba ile ba tlameha ho tlohela morero oo ha Molimo a ne “a ferekanya puo ea lefatše lohle” ’me a hasanya batho bao ba neng ba batla ho haha tora. (Gen. 11:1-4, 8, 9) Haeba Satane o ne a rerile ho theha bolumeli bo le bong boo ho bona motho e mong le e mong a neng a tla mo rapela, morero oo oa hae o ile oa hlōleha habohlasoa. Jehova o ’nile a sireletsa borapeli ba ’nete, ’me hona joale palo ea batho ba mo rapelang e ntse e eketseha letsatsi le letsatsi.

21, 22. (a) Ke hobane’ng ha bolumeli ba bohata bo ke ke ba felisa bolumeli ba ’nete le ka mohla? (b) Re tla tšohla’ng sehloohong se latelang?

²¹ Ha e le hantle le ka mohla bolumeli ba bohata bo ke ke ba felisa bolumeli ba ’nete. Hobane’ng? Hobane Morupeli oa rōna e Moholo o ile a etsa bonnete ba hore o sireletsa Lentsoe la hae, a etsa hore re tsebe lebitso la hae, ’me Lentsoe la hae e ’nile ea e-ba Mohloli oa ’nete. (Esa. 30:20, 21) Ha re rapela Molimo ka tsela e lumellanang le ’nete, seo se tla etsa hore re thabe, empa e le hore re etse seo, ho hlokahala hore re lule re falimehile moeeng re be re tšepe Jehova ka botlalo ’me re latele tataiso ea moea oa hae o halalelang.

²² Sehloohong se latelang re tla hlahloba hore na lithuto tse ling tsa bohata li simolohile hokae. Re tla hlokomela hore lithuto tsena ha li tsoe Mangolong. Ho feta moo, re tla bona kamoo Jehova, e leng Mosireletsi oa ’nete eo ho seng ea ka bapisoang le eena, a re hlohonolofalitseng kateng ka lithuto tsa ’nete tseo re li nkang e le lefa la rōna la moea la bohlokoa.