Pont du Gard e Mamella Teko ea Nako
THE New Encyclopædia Britannica ea hlalosa: “Nako e telele kamor’a ho oa ha ’Muso oa Roma, marako a oona a nang le liforo tsa ho tsamaisa metsi a ile a sala a sebelisoa le ho babatsoa le ho sebeletsa joaloka tšusumetso ho baahi ba mehla e ileng ea latela.” Pont du Gard ha se mokhelo. Mohlomong ke setšoantšo sa Roma se tummeng ka ho fetisisa Fora.
Ka kakaretso, marako a nang le liforo tsa ho tsamaisa metsi a Roma a ne a sa haheloa ho nosetsa masimo, empa a ne a hahetsoe ho isa metsi litoropong. Litoropo tsena li ne li e-na le mehloli ea metsi e iketselitsoeng, libate tsa metsi a futhumetseng, matamo a ho sesa, le merifi ea metsi; ’me e meng ea metse e meholoanyane e ne e e-na le tsamaiso ea likhoere-khoere. E, litoropo le likolone tsa Roma li ne li hloka metsi—metsi a mangata haholo.
E phahametse nōka Gard ka limithara tse 49, Pont du Gard ke lerako le kang borokho, le phahameng ka ho fetisisa le hahiloeng ke Baroma, le tšehetsang kanale ea metsi. Le hoja e le bolelele ba limithara tse 275, e sa ntse e le karoloana feela ea lerako le felletseng le nang le foro ea ho tsamaisa metsi. Ha e le hantle, bolelele bo felletseng ba lerako le nang le foro ea ho tsamaisa metsi e ne e le lik’hilomithara tse 49. Le ne le sebelisetsoa ho tsamaisa metsi ho ea toropong ea Roma ea Nîmes. Joaloka mehaho e meng e hahiloeng ke Baroma ka nako e le ’ngoe, lerako le nang le foro ea ho tsamaisa metsi le ile la ema le tiile ka makholo a lilemo ’me le fana ka bopaki ba litekanyetso tsa mosebetsi oa Baroma tsa boleng bo phahameng le tsebo ea lienjenere tsa bona. Majoe a maholo a lesehloa, a mang a leng boima ba litone tse tšeletseng, a ne a sehoa le ho lokisoa sebakeng sa ho epa majoe se haufi sa Vers. Ka ho thahasellisang, ho ne ho sa sebelisoe seretse ho kopanya majoe ao.
Ho haha mokoloko oa li-arch ho ne ho hlokahala ka mabaka a mangata. Hang ha lerako le finyella bophahamo bo itseng, le lokela ho etsoa hore le be bobebe haholoanyane, ’me sebōpeho sa li-arch se etselitsoe ho finyella sena. Empa Pont du Gard e ne e boetse e lokela ho ba borokho ba nōka. Hore e tsebe ho emelana le maqhubu a matla, baahi ba eona ba ile ba etsa borokho bo thinyang hanyenyane.
Le hoja e se batho bohle ba ratang borokho ba ho ananelang, hamorao ho ile ha etsoa liphetoho tse itseng lerakong. Lipilara tsa lerako tse tenya li ile tsa fokotsoa hore li lumelle ho feta ha likariki tse huloang ke lipere, ’me lekholong la bo18 la lilemo, bophara ba mohaho oa mokato oa pele bo ile ba atolosoa. Lilemong tse lekholo hamorao, Moemphera Napoleon III, ea neng a buella ho bolokoa le ho sireletsoa ha lintho ’me a thahasella ho bolokoa ha sebaka seo, o ile a etsa mosebetsi o hlokahalang oa ho tsosolosa borokho.
Batho ba fetang limillione tse peli ba etela borokho bona selemo le selemo. Thahasello ena e khōlō e behile Pont du Gard kotsing, ’me mananeo a kaho a ntse a tsoela pele bakeng sa ho sireletsa sebaka seo. Ho sa tsotellehe hore bokamoso ba borokho bona e tla ba bofe, bo bontša hore mosebetsi o tsoileng matsoho o ka mamella teko ea nako.