’Nete ka Mangeloi
JOALOKAHA re bone, hase kamehla likhopolo le lipale tse atileng ka mangeloi li lumellanang le seo Bibele e se rutang. Na hoa tsotelleha hore ebe ha li lumellane? Na ho amohela litumelo tse atileng ka mangeloi ho na le kotsi leha e le efe? E, ka sebele.
Ka mohlala, nahana ka boitšoaro bo khothalletsoang ke “bomoea bo bocha.” Libuka tsa morao tjena tse buang ka mangeloi li khothalletsa ho amohela sohle se etsahalang joaloka bana, eseng ho sebelisa matla a ho nahana. Ke ka seoelo babali ba khothalletsoang ho rarolla mathata a bona kapa ho batla kutloisiso ea Bibele le tsebo ea Molimo. Libuka tse buang ka mangeloi li re tiisetsa hore re tsamaea le lengeloi le mosa le le lerato bophelong le hore ha ho lebaka la tšabo, kaha re phela bokahohleng bo thabileng boo ho bona ntho e ’ngoe le e ’ngoe e leng kamoo e neng e lokela ho ba kateng. Ha bothata bo hlaha, se hlokahalang ke hore feela re letele lengeloi hore le re namolele. Leha ho le joalo, haeba sena se fela se le joalo, ke hobane’ng ha Bibele e re bolella hore re “loane ntoa e thata bakeng sa tumelo”?—Jude 3.
Libuka tse ngata tse buang ka mangeloi li khotsofatsa takatso ea batho ea boikhohomoso le boikakaso. Li lebisa tlhokomelo ho motho ka boeena. Ho ea ka libuka tseo, mangeloi a kajeno a batla hore re tsebe kamoo re leng batle re bileng re bohehang kateng. Le hoja ho le hotle hore re be le maikutlo a matle ka rōna, sehlooho se seholo sa “bomoea bo bocha” ke ho ithata ka lerato le se nang meeli. Mongoli e mong o re taelo ea pele le e khōlō ka ho fetisisa ke e reng “rata Morena oa hao e leng Uena.” Seo se hanyetsana hakaakang le mantsoe a Jesu! O ile a re: “U rate Jehova Molimo oa hao ka pelo ea hao eohle le ka soule ea hao eohle le ka kelello ea hao eohle. Ena ke eona taelo e khōlō ka ho fetisisa le ea pele.” (Matheu 22:36-39) Re tla ba ba thabileng ka ho fetisisa bophelong haeba re beha lithahasello tsa Molimo ka pele ho tsa rōna.
Ho lebisa tlhokomelo e khōlō ho mangeloi ho khahlanong le Bokreste ba ’nete. Moapostola Pauluse o ile a nyatsa borapeli ba mangeloi. (Bakolose 2:18) Ho rapela ho bolela “ho tlotla kapa ho hlompha se tšoanang le boleng ba bomolimo kapa matla a phahametseng a tlhaho.” Leha ho le joalo, ho tlotla le ho hlompha mangeloi ke hona hoo libuka tse ngata tse atileng tse buang ka mangeloi li khothalletsang babali ho ho etsa. Empa, hopola se ileng sa etsahala ha Satane a ne a kōpa Jesu hore a mo etsetse ketso e le ’ngoe ea borapeli. Jesu o ile a araba: “Ke Jehova Molimo oa hao eo u lokelang ho mo rapela, ’me ke eena feela eo u lokelang ho mo etsetsa tšebeletso e halalelang.” (Luka 4:8) Hamorao, ha moapostola Johanne a ne a itihela ka pel’a lengeloi, lengeloi le ile la re ho eena: “Hlokomela! U se ke ua etsa joalo! Ke mpa feela ke le lekhoba-’moho le uena le barab’eno ba nang le mosebetsi oa ho pakela Jesu. Rapela Molimo.”—Tšenolo 19:10.
Kamoo Mangeloi a ka U Thusang Kateng
Eo u lokelang ho mo atamela bakeng sa tataiso le thuso ke Molimo, eseng mangeloi. O ikemiselitse ebile o thabela ho tšollela bohle ba phelang tumellanong le litekanyetso tsa hae tse lokileng lerato ka tekanyo e khaphatsehang. Moapostola Johanne o ile a ngolla Bakreste-’moho le eena: “Ena ke kholiseho eo re nang le eona ho eena, hore, ho sa tsotellehe hore na ke eng eo re e kōpang ho ea ka thato ea hae, oa re utloa. Ho ekelletsa moo, haeba re tseba hore oa re utloa mabapi le eng kapa eng eo re e kōpang, rea tseba hore re tla ba le lintho tse kōpiloeng kaha re li kōpile ho eena.”—1 Johanne 5:14, 15.
Ho na le lintho tse ngata tseo re sa li tsebeng ka mangeloi a tšepahalang a Molimo. Leha ho le joalo, rea tseba hore a tšebeletsong ea Molimo, a sebetsa tumellanong le morero oa hae le tataiso ea hae. A thahasella ho tsebahatsa ’nete mabapi le Molimo. (Tšenolo 14:6, 7) Ha a batle borapeli ba rōna. Kaha re ke ke ra a bona, ha re tsebe hore na Molimo o a sebelisa ho isa bohōleng bofe ho thusa batho ba hae litabeng tsa letsatsi le letsatsi. Empa rea tseba hore Jehova Molimo o sireletsa batho ba hae le ho ba tataisa e le sehlopha.
Mangeloi a tšepahalang a re behela mohlala o motle hakaakang! A tlotlisa Molimo le ho mo rorisa. (Pesaleme ea 148:2) Le hoja a le matla haholo kelellong le moeeng, a bontša tlhompho e tebileng bobusing ba Jehova. (Jude 9) Ka cheseho a thahasella ho phethahala ha merero ea Molimo. (1 Petrose 1:11, 12) Ke Lentsoeng la Molimo, Bibele, moo re ithutang lintho tsena teng. E, Bibele ke eona buka e re bolellang ’nete ka mangeloi.
[Ntlha e Qolotsoeng e leqepheng la 30]
Mangeloi a thahasella ho tsebahatsa ’nete mabapi le Molimo
[Setšoantšo se leqepheng la 28, 29]
Ha moapostola Johanne a ne a leka ho rapela lengeloi, lengeloi le ile la re: “U se ke ua etsa joalo!”