Seoa sa Lefatše Lohle sa Lehloeo

HO NA le kholumolumo e tsoileng taolong—kholumolumo e bitsoang lehloeo. E tlala-tlala hohle lefatšeng.

Linaheng tsa Balkan, profinse e ’ngoe e ntse e itlhotha litlhotse ka mor’a phutuho e ileng ea e-ba teng ea tlhoekiso ea morabe. Bora bo ’nileng ba e-ba teng ka makholo a lilemo a fetileng bo ’nile ba baka polao ea batho ba bangata, peto, ho leleka batho, ho chesa le ho tlatlapa thepa malapeng le metseng, tšenyo ea lijalo le ea mehlape hammoho le tlala e khōlō. Liqhomane tsa fatše li sa ntsane li le ngata.

Timor Bochabela, ka Boroa-bochabela ho Asia, batho ba tšohileng ba 700 000 ba ile ba tlameha ho baleha lipolao tse nyarosang, ho khakhathoa, ho thunngoa ho sa khethoe hammoho le ho lelekoa ka likhoka. Ba siile lefatše le sentsoeng ke litlhaselo tsa lihlopha tsa masole a seng molaong. E mong oa bahlaseluoa o itse ka likhapha: “Ekare ke phoofolo e tsongoang.”

Mohaho oa lifolete Moscow o ile oa qhaqhoa ke bomo e khōlō ea likhukhuni. Litopo tse 94 tsa batho ba se nang molato—tse ling tsa tsona e le tsa bana—li ne li hasane hohle ke ho phatloha hoo. Batho ba fetang 150 ba ne ba tsoile likotsi. Ka mor’a ketsahalo eo e tšosang, batho baa ipotsa, ‘Ke bo-mang ba latelang?’

Los Angeles, California, motho ea nang le khethollo ea morabe o ile a thunya sehlopha sa bana ba banyenyane ba Bajuda ’me hamorao a bolaea monna e mong oa poso oa Lefilipino.

Lehloeo le ka hlalosoa ka nepo e le seoa sa lefatše lohle. Hoo e ka bang letsatsi le leng le le leng, litlaleho tsa litaba li bolela se etsahetseng ha bora ba morabe, ba setso kapa ba bolumeli bo etsa ho itseng ho seng molaong. Re bona lichaba, batho le malapa a arohana. Re bona linaha li keneletse polaong e khōlō e reretsoeng ho timetsa morabe o itseng ka ho feletseng. Re bona liketso tse hlokang botho ka ho feletseng li hlohlelletsoa feela ke hobane batho ba bang ba “fapane.”

Haeba kholumolumo ena e tšabehang e bitsoang lehloeo e tla ke e koalloe, re tlameha ho utloisisa mohloli oa pefo e joalo e tletseng lehloeo. Na lehloeo le kenyelelitsoe liphatseng tsa motho tsa lefutso? Na ke boitšoaro boo motho a ithutang bona? Na ho ka etsahala hore ho ipheta-pheta ha lehloeo ho fele?

[Tlhaloso ea Moo Setšoantšo se Nkiloeng Teng e leqepheng la 3]

Kemal Jufri/Sipa Press