Ha ho se ho se ea Tla Hlola a Ikutloa a Jeoa ke Bolutu
TLALEHO e ho Genese 2:18 e bontša hore ha motho oa pele a ne a bōptjoa, “Jehova Molimo o ile a tsoela pele ho re: ‘Ha ho hotle hore motho a ’ne a be mong. Ke tla mo etsetsa mothusi, e be motlatsi oa hae.’” Batho ba ne ba bōpetsoe hore ba be le batho ba bang le ho itšetleha ka bona.
Motsoalle oa bohlokoa ka ho fetisisa eo re ka bang le eena ke Jehova Molimo ka boeena. Moapostola Pauluse o ile a bua ka Jehova e le “Ntate oa mehauhelo e bonolo le Molimo oa matšeliso ’ohle, ea re tšelisang matšoenyehong ’ohle a rōna.” (2 Bakorinthe 1:3, 4) Jehova ka boeena o bontša hore o utloa bohloko ha mohlanka leha e le ofe oa hae a utloa bohloko. Ke Molimo oa kutloelo-bohloko. “O tseba sebōpeho sa rōna hantle, oa hopola hore re lerōle.” (Pesaleme ea 103:14) Na ha u ikutloe u haptjoa ke Jehova Molimo le ho ananela tlhokomelo ea hae e lerato, e mosa le e utloisisang?
Jehova o Tšehetsa ba Ikutloang ba le Bang
Nakong e fetileng bahlanka ba Molimo ba bangata ba ile ba hlaheloa ke maemo ao ho ’ona ba ileng ba ikutloa ba le bang. Jehova e ile ea e-ba mohloli oa tšehetso le matšeliso ho bona. Ka mohlala, nahana ka Jeremia, ea ileng a bitsetsoa ho ba moprofeta e sa le mohlankana. Har’a bangoli ba 40 ba Mangolo, mohlomong Jeremia ke eena ea ileng a hlalosa maikutlo a hae haholoanyane. O ile a ikutloa a tšaba a bile a sa tšoanelehe ha a fumana kabelo ea hae ea pele e tsoang ho Molimo. (Jeremia 1:6) Hore a o phethe, o ne a lokela ho itšetleha ka Jehova ka ho feletseng. Ka sebele, Jehova o ile a ba le eena “joaloka senatla se tšabehang.”—Jeremia 1:18, 19; 20:11.
Lilemo tse ka bang 300 pele ho Jeremia, Mofumahali Jezebele o ile a ikana hore Elia o tla bolaoa ha a utloa ka polao ea baprofeta ba hae ba Baale. Elia o ile a balehela Horebe, Hloahloeng ea Sinai, e bohōle ba lik’hilomithara tse 450. Ha a le moo, o ile a kena ka lehaheng ’me a hlola bosiu teng, ’me Jehova Molimo o ile a ’motsa potso ena: “U batla’ng mona, Elia?” Elia o ile a hlalosa hore o ikutloa e le eena feela morapeli oa Jehova Iseraele eohle, moprofeta ea setseng a le mong ea neng a chesehela tšebeletso ea Molimo. Jehova o ile a mo tiisetsa hore o ne a se mong. Jehova o ne a e-na le eena, ’me ho ne ho boetse ho e-na le Baiseraele ba bang ba 7 000 ba neng ba e-na le eena, le hoja Elia a ne a sa tsebe seo. Jehova o ile a tšelisa le ho thoba pelo ea Elia hammoho le ho haha tumelo ea hae. O ile a ama pelo ea Elia, a khothalletsa moprofeta eo hore a se ke a tlohela kabelo ea hae. (1 Marena 19:4, 9-12, 15-18) Joaloka Elia, haeba ka linako tse ling re ikutloa re le bang kapa re se na thuso, le rōna re ka rapela Jehova hore a re matlafatse. Hape, ha baholo ba sebelisa temoho, ba ka bua ka mokhoa o tšelisang le ba tšepahalang, ba ba thusa hore ba bone karolo eo ba e phethang ho phethahatsoeng ha merero ea Molimo.—1 Bathesalonika 5:14.
Mehlaleng ena le e meng, re ka hlokomela boikemisetso ba Jehova ba ho tšehetsa le ho tšelisa ka lerato ba ikutloang ba le bang. E, “Jehova e tla ba sebaka se phahameng sa tšireletso bakeng sa mang kapa mang ea hateletsoeng, e be sebaka se phahameng sa tšireletso linakong tsa mahlomola.”—Pesaleme ea 9:9; 46:1; Nahume 1:7.
Motho ea Nang le Maikutlo a Tebileng le Kutloelo-Bohloko
Jesu Kreste ke mohlala oa motho ea tšoaneloang ke ho ratoa ka lebaka la maikutlo a hae a leka-lekaneng ka ho phethahetseng, ea etsisang Jehova. Luka o hlalosa kamoo Jesu a ileng a itšoara kateng ha a kopana le mokoloko oa lepato motseng oa Naine: “Ho ne ho e-na le motho ea shoeleng ea jeroeng a ntšetsoa ka ntle, mora ea tsoetsoeng a ’notši oa ’m’ae. . . . Ha Morena a re heli! ’me a mo bona, a mo hauhela, eaba o re ho eena: ‘Khaotsa ho lla.’ Eaba oa atamela o ama mojaro oa mofu, ’me bajari ba ema, eaba o re: ‘Mohlankana, ke re ho uena, Tsoha!’ Motho eo ea shoeleng a lula ’me a qala ho bua, eaba o mo fa ’m’ae.” (Luka 7:12-15) Jesu o ile a ameha maikutlong. E ne e le motho ea nang le kutloelo-bohloko. Nahana ka thabo eo Jesu a ileng a e tlisetsa mohlolohali eo ea neng a le mong ha a khutlisetsa mora oa hae ho eena! O ne a se a se mong.
Re ka kholiseha hore Jesu ke ea ka ‘utloelang mefokolo ea rōna bohloko.’ Ruri o utloela batho ba lokileng ba jeoang ke bolutu bohloko. Ka sebele, ka eena “re ka fumana mohau le ho fumana mosa o sa tšoanelang bakeng sa thuso ka nako e nepahetseng.” (Baheberu 4:15, 16) Ka ho etsisa Jesu, re ka hlaolela ho ba le kutloelo-bohloko ho ba mesarelong, ba mahlomoleng le ba jeoang ke bolutu. Re ke ke ra ba le monyetla oa ho jeoa ke bolutu haeba re thusa ba bang. Empa ho na le tsela e ’ngoe eo ka eona re ka fumanang thuso ea ho hlōla maikutlo a nyahamisang a bolutu.
Lentsoe la Jehova le ka re Thusa ho Hlōla Bolutu
Ba bangata ba fumane hore “ka matšeliso a tsoang Mangolong re . . . ba le tšepo.” Lentsoe la Molimo le tletse ka likeletso tse sebetsang tse ka re thusang ho hlōla bolutu. (Baroma 15:4; Pesaleme ea 32:8) Ka mohlala, Lentsoe la Molimo le re khothatsa hore ‘re se ke ra inahana haholo ho feta kamoo ho hlokahalang ho nahana.’ (Baroma 12:3) Ho hlokahala hore re fetole tsela eo re nahanang ka eona hore re sebelise keletso ena. Boikokobetso le boinyenyefatso—e leng ho talima mefokolo ea rōna ka tsela ea sebele—ka sebele ho tla re thusa hore re be le litebello tse itekanetseng le tse utloahalang. Lentsoe la Molimo le boetse le re khothalletsa hore re hlaolele ho ba le thahasello ea sebele ho ba bang. (Bafilipi 2:4) Ena ke ntho e hlokang mahlakore a mabeli. Ha u thahasella ba bang, ba tla u thahasella. Tšebelisano ena e ntle le ba bang e thusa ho imolla maikutlo a bolutu ’me e fana ka morero bophelong ba rōna.
Bibele e re khothalletsa hore joaloka Bakreste, re se ke ra ‘tlohela ho bokana ha rōna.’ (Baheberu 10:24, 25) Ka hona, tšoareha mesebetsing e molemo, e kang ho ba teng libokeng tsa Lipaki Tsa Jehova kamehla. Ha ho potang hore liboka tsa Bokreste li ka phetha karolo ea bohlokoa bophelong ba rōna ba moea, ba maikutlo le bo botle ba ’mele. Ho bua le ba bang ka litaba tse molemo tsa ’Muso oa Molimo ke tsela e ’ngoe e thabisang ea ho tlatsa bophelo ba rōna ka mesebetsi e molemo. Ho etsa hore likelello tsa rōna li lule li nahanne ka lintho tse nepahetseng, ho re matlafatsa tumelo ’me ho sireletsa tšepo ea rōna.—Baefese 6:14-17.
Atamela ho Jehova ka thapelo. Davida o ile a eletsa: “Lahlela moroalo oa hao ho Jehova, o tla u tšehetsa.” (Pesaleme ea 55:22) U tla ikutloa u thabile ha u ithuta Lentsoe la Molimo. (Pesaleme ea 1:1-3) Haeba u apareloa ke maikutlo a hore u jeoa ke bolutu, thuisa ka tlhokomelo e lerato ea Jehova joalokaha e senotsoe ka Lentsoeng la hae. Mopesaleme o ngotse: “Moea oa ka o ’nile oa khomarela lerōle. Mpoloke ke phela ho ea ka lentsoe la hao.”—Pesaleme ea 119:25.
Ha ho se ho se ea Tla re “Ke Jeoa ke Bolutu”
Jehova Molimo o re tšepisitse lefatše le lecha le sa tl’o hlola le e-ba le matšoenyeho, litsietsi le maikutlo a nyahamisang. Bibele e re: “O tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.” (Tšenolo 21:4) E, har’a lintho tsa pele tse tla feta ke bohloko boo kajeno re bo utloang ’meleng, kelellong le maikutlong.
Lefatše le tla tlala ka batho ba nang le botsoalle, ba tla entša bophelo ba rōna. Ka ’Muso oa hae oa leholimo o tla beng o laoloa ke Jesu Kreste, Jehova o tla etsa hore re se ke ra hlola re jeoa ke bolutu. O tla re fa lintho tse ncha le tse babatsehang tseo re ka li etsang paradeiseng ea lefatšeng. Haufinyane ho tla fihla letsatsi leo ka lona re ke keng ra hlola re re, “ke jeoa ke bolutu.”
[Setšoantšo se leqepheng la 8, 9]
Ka tšehetso ea Jehova, re ke ke ra ikutloa re jeoa ke bolutu, esita leha re le bang
[Litšoantšo tse leqepheng la 10]
Tlaleho ea Bibele ea Jeremia le ea Elia e re ruta eng?