“’Nete e Tla le Lokolla”!
MANTSOE ao a Jesu Kreste a ka Bibeleng ho Johanne 8:32, ke ’nete e ke keng ea fetoha. ’Nete eo e re lokolla litumela-khoeleng le meetlong e sa khahliseng Molimo e ka re ntšang kotsi. Liphihlelo tse latelang li bontša kamoo ’nete ea Bibele e lokolotseng batho ba libakeng tse sa tšoaneng kateng, meetlong e boima e amanang le Keresemese.
’Nete ea Bibele e ba Lokolotse!
Argentina Oscar o re: “Lelapa la rōna le lokolohile mathateng a bakoang ke ho ja le ho noa haholo le litšenyehelong tsa ho reka limpho tseo re neng re sa li khone.”
Mario o ile a ikutloa a imolohile haholo ha a ne a senoleloa seo a se bitsang “leshano la Keresemese.” O re: “Hona joale ke thabela ho bontša ba bang hore kea ba ananela ka hore ke ba fe limpho ka nako leha e le efe ea selemo, ha maemo a ka a lichelete a ntumella.”
Canada Elfie o re: “Ke rata ho fana ka limpho le ho li fuoa. Empa ha ke rate ho fana ho etsoang hobane motho a ikutloa a tlamehile. Ha lelapa la rōna le khaotsa ho keteka Keresemese, re ile ra ikutloa re imolohile!”
Morali e mong oa Elfie ea bitsoang Ulli, o re: “Ka mor’a hore batsoali ba ka ba khaotse ho keteka Keresemese, ba ne ba atisa ho re etsetsa lintho tsa boithabiso kapa ho re fa limpho har’a selemo re sa lebella, e leng seo re neng re se thabela! Ha liithuti-’moho le rōna li ne li re botsa hore na ke hobane’ng ha ba re file limpho, re ne re araba ka motlotlo re re, ‘Ba re file tsona feela tjee!’ Leha ho le joalo, ho ne ho se bonolo hore batsoali ba rōna ba fetole tsela eo ba phelang ka eona hore e lumellane le linnete tsa Bibele, hobane seo se ile sa etsa hore beng ka rōna ba ba hanyetse le ho ba hatella. Empa ba ile ba ema ba tiile. Ha ke bona kamoo ba neng ba ikemiselitse ho sebeletsa Jehova Molimo ka tsela e amohelang kateng, seo se ile sa nkama ka ho teba.”
Silvia o re “o ile a ikutloa a imolohile” ha a khaotsa ho keteka Keresemese. “Ka mor’a moo, ke ile ka ikutloa ke thabile! Ke ne ke tseba hore ke khahlisa Jehova Molimo, ’me seo se ne se le molemo ho feta mekete e likete ea Keresemese.”
Kenya Peter o re: “Ha ke ne ke ntse ke keteka Keresemese, ke ne ke alima chelete e ngata e le hore ke reke limpho le ho lefella lijo tse bitsang haholo. Ho hlakile hore seo se ne se bolela hore ke lokela ho sebetsa lihora tse eketsehileng, e leng se neng se etsa hore ke qete nako ke arohane le ba lelapa la ka. Ruri ke ile ka thaba ha ke lokoloha linthong tseo kaofela!”
Carolyne o re: “Ke fa ba lelapa le metsoalle limpho ka nako leha e le efe—’me le bona baa mpha. Ke lumela hore limpho tse joalo tse sa lebelloang, tse fanoang ka sepheo se setle, li molemo ho feta ntho leha e le efe e ’ngoe.”
Japane Hiroshi le Rie ba re: “Bana ba rōna ha baa oela lerabeng la ho lebella ho fuoa limpho le ho li nka e le lintho feela tjee. Hoa re thabisa re le batsoali ha re bona bana ba rōna ba utloisisa hore batho ba lokela ho fana ho tsoa pelong.”
Keiko o re: “Lelapa la rōna le ne le tloaetse ho keteka Keresemese. Ha re se re kholisehile hore mora oa rōna o robetse, ’na le monna oa ka re ne re mo behela mpho pel’a bethe. Ka le hlahlamang hoseng, re ne re ee re re ho eena: ‘Kaha u bile moshanyana e motle, Santa o u file mpho ena.’ Ha ke ithuta ’nete ka Keresemese ’me ke bolella mora oa ka seo ke ithutileng sona, o ile a ferekana ’me a lla. Seo se ile sa ntlhokomelisa hore Keresemese hase ntho e babatsehang joalokaha e hlalosoa. Ho e-na le hoo, ke leshano ’me ka ho le ntšetsa pele, ke ile ka ikutloa eka ke soetsitse mora oa ka.”
Philippines Dave o re: “Ho thata ho hlalosa ka lengolo thabo eo Jehova a re fang eona a sebelisa linnete tse hlakileng tse fumanoang ka Bibeleng. Ha lelapa la rōna le fa batho ba bang limpho, ha re lebelle hore le bona ba re fe. ’Me re fana ho tsoa pelong.”
Batho ba qotsitsoeng ka holimo ke ba seng bakae feela ho ba limilione ba inoesitseng ka nkho hore ’nete ea Bibele e lokolla batho. Habohlokoa le ho feta ke hore ha re phela ho latela ’nete eo, re thabisa pelo ea Molimo. (Liproverbia 27:11) Jesu Kreste o ile a re: “Barapeli ba ’nete ba tla rapela Ntate ka moea le ka ’nete, etsoe, ka sebele, Ntate o batla ba joalo hore ba mo rapele.” (Johanne 4:23) Ha Molimo a talima pelo ea hao, na o bona motho ea labalabelang ho tseba ’nete? Re tšepa hore karabo e tla ba e, e hlakileng!
[Setšoantšo se leqepheng la 9]
Bakreste ba fana hobane ba susumetsoa ke lerato le hona ka nako leha e le efe ea selemo