Kōpa Thuso

KE BO-MANG ba ka u thusang boitekong ba hao ba hore u atlehe sekolong?

Lelapa.

Ngoanana ea lilemo li 18 oa Brazil ea bitsoang Bruna o re: “Ha ke ne ke hloka ho thusoa ka mosebetsi oa sekolo o etsetsoang lapeng, Ntate o ne a ntlhalosetsa, ebe o mpotsa lipotso tse nthusang ho fumana likarabo. Empa a ntlohela hore ke iphumanele tsona.”a

Tlhahiso: E le hore u qale, botsa motsoali oa hao hore na o ne a sebetsa joang thutong e u hlōlang. Haeba o ne a e pasa, mohlomong a ka khona ho u thusa.

Matichere.

Matichere a mangata a thabisoa ke ho tseba hore seithuti se batla ho atleha e le kannete, ’me a ka thabela ho se thusa.

Tlhahiso: Bua le tichere ea hao u re, “Thuto ena ea ntlhōla, empa ke batla ho e pasa. U ka mpha keletso efe?”

Batho ba u eletsang.

Mohlomong u ka kōpa thuso ho motsoalle oa lelapa. Thuso eo e ka u tsoela molemo ka litsela tse peli: Tsela ea pele, u tla fumana thuso eo u e hlokang; ea bobeli, u tla ithuta ho itšetleha ka batho ba bang ha ho hlokahala—e leng mokhoa o tla u tsoela molemo ha u se u le motho e moholo. ’Nete ke hore, hangata katleho e finyelloa ha batho ba sebetsa hammoho, eseng ha motho a sebetsa a le mong.—Liproverbia 15:22.

Tlhahiso: Botsa batsoali ba hao hore na ke mang motho ea loketseng ea ka u eletsang.

Ntlha ea bohlokoa: Ha ho letho le phoso ka ho kōpa thuso!

Ke hobane’ng ha u sa qale hona joale? Etsa lethathamo la batho ba babeli kapa ba bararo ba u behelang mohlala—bao u ka ratang ho ba etsisa. Na bathong bao u ba khethileng, ho na le ea ka khonang ho u thusa ka mosebetsi oa hao oa sekolo?