TSA MONA LE MANE
Ho Hlahlojoa Litaba Tsa Afrika
Mekhatlo e mengata le batho ka bomong ba tsoela-pele ho etsa matsapa a ho ntlafatsa bophelo linaheng tsa Afrika. Leha ho le joalo, linaha tsena li ntse li e-na le mathata a mangata.
Ho Tsongoa ha Litšukulu ho Seng Molaong
Ka 2013, ho ile ha bolaoa litšukulu tse 1 004 ka tsela e seng molaong Afrika Boroa, e leng palo e holimo ha e bapisoa le ea tse 13 tse ileng tsa bolaoa ka 2007. Le hoja ho se ho bolailoe litšukulu tse ngata hakana, li tsoela-pele ho bolaoa hobane k’hilograma e le ’ngoe ea lenaka la eona e ka rekoa ka chelete e ngata ho feta khauta. Lenaka le le leng le ka rekisoa ka liranta tse ka bang limilione tse hlano.
SEO U KA NAHANANG KA SONA: Na mebuso e tla ke e khone ho felisa tlōlo ea molao?—Jeremia 10:23.
Tjotjo e sa Tlalehoeng
Mokhatlo oa Machaba o Loantšang Bobolu o re, linaha tse ka Bochabela ho Afrika li itlhomme pele litabeng tsa ho ntšoa ha litjotjo lefatšeng ka bophara. Empa batho ba etsang karolo ea 90 lekholong ba thulanang le bothata bona ha ba bo tlalehe. Moemeli oa mokhatlo ona ea Kenya o re: “Sechaba se bonahala se sa tšepe baeta-pele ba pusong, ke ka hona se sa tlaleheng bobolu.”
SEO BIBELE E SE BUANG: “Tjotjo e foufatsa batho ba bonang ka mokhoa o hlakileng.”—Exoda 23:8.
Tšebeliso ea Inthanete Afrika
Ho ea ka Mokhatlo oa Machaba oa Lithelefono, ho ne ho lebeletsoe hore batho ba Afrika ba etsang karolo ea 20 lekholong ba tla be ba sebelisa Inthanete qetellong ea 2014. Palo ea batho ba kenang Inthaneteng ka lifono Afrika e phahama ka sekhahla hoo e imenneng habeli ha e bapisoa le lipalo-palo tsa lefatšeng ka bophara.