Rata Batho Ba Bang
Bothata
Boikutlo ba khethollo ha bo inyamelle feela tjee. Joalokaha ho nka nako hore motho a fole ha a e-na le kokoana hloko, ho hlokahala boiteko e le hore motho a tlose khethollo pelong ea hae. U ka etsa’ng hore u tlose khethollo ho uena?
Keletso ea Bibele e Re’ng?
“Le ikapese lerato, etsoe ke tlamo e phethahetseng ea bonngoe.”—BAKOLOSE 3:14.
Temana ee e bolela’ng? Ha batho ba tšoarana ka mosa baa momahana. Ha u bontša ba bang hore oa ba rata, sena se tla u thusa hore u nene khethollo. Ha u leka ka matla hore u rate batho ba bang, sena se tla u thusa hore u qobe maikutlo a fosahetseng ao u ka bang le ’ona khahlanong le bona.
Seo U ka se Etsang
Leka ho sheba lintho tseo u ka li etsang e le ho bontša lerato ho batho bao e ka ’nang eaba u ne u ba eisa. U se ke oa nahana ka lintho tse mohlolo. Leka ho etsa e ’ngoe ea lintho tsena:
Haeba u bontša ba bang lerato, sena se tla u thusa hore u nene khethollo
E-ba le mekhoa e metle, mohlomong ka ho ba bulela lemati kapa ho phahama setulong e le hore ba ka lula.
Leka ho buisana le bona ho se hokae le haeba ba sa bue puo ea hao hantle.
U se ke oa ba fella pelo haeba ba etsa ntho eo u sa e utloisiseng.
E-ba le kutloelo bohloko ha ba bua ka mathata a bona.