Buka ea Bibele ea 64​—3 Johanne

Mongoli: Moapostola Johanne

Sebaka Seo e Ngoletsoeng ho Sona: Efese, kapa haufi le teng

Ho Ngoloa ho Phethiloe: hoo e ka bang ka 98 C.E.

1. Buka ea Johanne oa Boraro e ne e ngolletsoe mang, ’me ke eng se tsejoang ka eena?

LENGOLO lena le ngolletsoe Gaiuse, Mokreste ea tšepahalang eo Johanne a mo ratang kannete. Lebitso Gaiuse le ne le tloaelehile mehleng ea phutheho ea pele. Le hlaha ka makhetlo a mane likarolong tse ling tsa Mangolo a Segerike a Bokreste, bonyane le supa banna ba bararo ’me mohlomong ba bane ba sa tšoaneng. (Lik. 19:29; 20:4; Ba-Roma 16:23; 1 Ba-Kor. 1:14) Ha ho boitsebiso bo fumanehang bo ka khethollang ka ho toba hore na e be Gaiuse eo Johanne a neng a mo ngolla e ne e le ofe ho bana. Seo re se tsebang ka Gaiuse ke hore e ne e le setho sa phutheho ea Bokreste, hore e ne e le motsoalle ea khethehileng oa Johanne, le hore lengolo le ne le ngolletsoe eena ka ho toba, ke ka baka leo ka mehla ho hlahang lentsoe “u.”

2. Ke eng se khethollang mongoli, nako, le sebaka seo Johanne oa Boraro e ngolletsoeng ho sona?

² Kaha mokhoa oa ho ngola le litumeliso tse phethang li tšoana le tse ho Johanne oa Bobeli ’me mongoli o itsebahatsa e le “moholo [“monna ea hōlileng,” NW],” ha ho na pelaelo hore moapostola Johanne ke eena hape ea ngotseng lengolo lena. (2 Joh. 1) Ho tšoana ha litaba tse ka hare le puo e sebelisitsoeng le tsona li fana ka maikutlo a hore e ile ea ngolloa Efese kapa haufi le teng, ka bo-98 C.E., joalokaha ho le joalo ka mangolo a mang a mabeli. Ka baka la bokhutšoaane ba eona, ke ka seoelo e qotsoang ke bangoli ba pejana, empa eona hammoho le Johanne oa Bobeli, e fumanoa libukeng tsa pele tsa Mangolo a bululetsoeng.a

3. Ho Johanne oa Boraro Johanne o bolela eng, ’me ke ho phatsima hofe ho thahasellisang hoo re ho fumanang ho boena ba Bakreste ba pele?

³ Johanne, lengolong la hae, o bolela kamoo a ananelang ka teng kamohelo ea baeti eo Gaiuse a e bontšitseng baena ba tsamaeang, ’me o bolela le khathatso e itseng e amang e mong ea ikhohomosang ea bitsoang Diotrefe. Demetriuse eo a ’molelang ho bonahala e le eena ea tliselitseng Gaiuse lengolo lena, ’me ho ka etsahala hore e be ke eena eo Johanne a neng a mo romile ’me o ne a hloka hore Gaiuse a bontše kamohelo ea baeti ho eena leetong la hae, kamoo a hlalosetsoang lengolong. Joaloka Gaiuse, ha ho letho le leng leo re le tsebang ka Diotrefe le Demetriuse ho feta seo re se balang mona. Leha ho le joalo, lengolo le fana ka ho phatsima ho thahasellisang ka boena bo atamelaneng ba machaba har’a Bakreste ba pele. Har’a tse ling, sena se ne se akarelletsa tloaelo ea ho amohela ba tsamaeang “ka baka la lebitso la oona,” esita le hoja ba joalo ba ne ba sa tsejoe ke baamoheli ba bona.—Tem. 7.

LITABA TSE KA HARE TSA JOHANNE OA BORARO

4. Johanne o babatsa Gaiuse ka eng, ke boitšoaro bofe bo bobe boo a bo nyatsang, ’me ke keletso efe e utloahalang eo a fanang ka eona?

⁴ Moapostola o eletsa ka ho amohela baeti le mesebetsi e molemo (litem. 1-14). Johanne o thabisoa ke ho utloa hore Gaiuse o sa ntse a ‘tsamaea ’neteng.’ O mo baballetsa ho etsa mosebetsi o tšepahalang, oa ho bontša tlhokomelo e lerato ho baena ba etileng. Johanne o re: “Re tšoanetse ho amohela ba joalo, hore re sebelisane le ’nete.” Nakong e fetileng Johanne o ile a ngolla phutheho ena, empa moikhohomosi Diotrefe ha a amohele letho le tsoang ho Johanne ka tlhompho kapa leha e le hona ho amohela taba e tsoang ho ba bang ba ikarabellang. Haeba Johanne a e-tla, o tla mo bitsa ho tla ikarabella bakeng sa ho “seba ka mantsoe a lonya.” Gaiuse ea ratehang o eletsoa hore ‘a se ke a etsisa bobe, a mpe a etsise botle.’ Demetriuse o qolloa e le mohlala o lokelang ho rorisoa. Ho e-na le hore Johanne a ngole ka lintho tse ngata, o bolela hore o tšepa ho bona Gaiuse haufinyane ba talimane.—Litem. 4, 8, 10, 11.

LEBAKA LEO E LENG MOLEMO

5. (a) Ke joang Johanne a iponahalitseng e le molebeli ea behang mohlala, hona ke moea ofe oo ba neng ba lokela ho o boloka? (b) Ke hobane’ng ha Johanne a ile a bua ka matla khahlanong le Diotrefe? (c) Kajeno re lokela ho chesehela eng, tumellanong le molao oa motheo o boletsoeng ke Johanne?

⁵ Moapostola Johanne o iponahatsa e le molebeli ea behang mohlala chesehong ea hae ea ho sireletsa phutheho khahlanong le litšusumetso tse silafatsang. Moea oa lerato le oa kamohelo ea baeti o neng o rena phuthehong eo o ne o babatseha, ’me ka sebele ba ne ba tšoanetse ho boloka boemo bona bo thabileng, e le hore baena ba moo le “baeti [“bao ba sa ba tsebeng,” NW]” (batho ka bomong bao baamoheli ba bona ba Bakreste ba neng ba sa ba tsebe le pele) ba tlileng har’a bona ba ka ‘sebelisana ’neteng.’ (Litem. 5, 8) Leha ho le joalo, Diotrefe o ne a ikhohomosa, e leng seo Jehova a neng a se hloile, ’me hape o ne a sa hlomphe taolo ea puso ea Molimo, esita le ho seba ka lonya moapostola Johanne. (Liprov. 6:16, 17) O ne a sitisa moea oa phutheho eo oa ho amohela baeti oa Bokreste. Ha ho makatse ha Johanne a ile a bua ka sebete tjena khahlanong le bobe bona le ho buella lerato la sebele la Bokreste phuthehong eo. Le kajeno lena re lokela ho ba le cheseho e tšoanang mabapi le ho boloka boikokobetso, ho tsamaea ’neteng, le ho sebelisa lerato la bomolimo le ho fana, ho lumellana le molao oa motheo o boletsoeng ke Johanne: “Ea etsang hantle o tsoa ho Molimo; empa ea etsang hampe ha a ka a bona Molimo.”—3 Johanne 11.

[Mongolo o botlaaseng ba leqephe]