Moo U ka Retelehelang Teng Bakeng sa Likarabo

“Khopolo ea ho ba mahlomoleng ka ho sa feleng ha e lumellane le tumelo leratong la Molimo bakeng sa lintho tse bōpiloeng. . . . Ho lumela kotlong e sa feleng ea moea bakeng sa liphoso tsa lilemo tse seng kae, ka ntle le ho o fa monyetla oa ho lokisoa, ke ho ba khahlanong le melao-motheo eohle e nang le mabaka.”—NIKHILANANDA, RAFILOSOFI OA MOHINDU.

1, 2. Ka lebaka la litumelo tse sa tšoaneng tse buang ka Bophelo ka Mor’a Lefu, ho phahama lipotso life?

JOALOKA rafilosofi oa Mohindu Nikhilananda, ba bangata kajeno ha baa phutholoha ka thuto ea tlhokofatso e sa feleng. Ba bang ka lebaka leo, ba ba le bothata ba ho utloisisa likhopolo tse joalo tse kang ho finyella Nirvana le ho ba bonngoeng le Tao.

² Leha ho le joalo, ka lebaka la khopolo ea hore moea ha o shoe, malumeli a Bochabela le a Bophirimela a qapile molubalube o emisang hlooho oa litumelo tse feto-fetohang ka Bophelo ka Mor’a Lefu. Na hoa khoneha ho tseba ’nete ka se etsahalang ka rōna ha re e-shoa? Na e hlile moea ha o shoe? Re ka retelehela hokae bakeng sa likarabo?

Saense le Filosofi

3. Na saense kapa mokhoa oa saense oa patlisiso li fana ka likarabo lipotsong tse mabapi le bophelo ka mor’a lefu?

³ Na saense kapa mokhoa oa saense oa patlisiso o na le likarabo lipotsong tse amanang le Bophelo ka Mor’a Lefu? Motheong oa litlaleho tsa morao tjena tsa ho ba lintšing tsa lefu kapa liphihlelo tsa ho ‘haptjoa kelellong,’ bafuputsi ba bang ba lekile ho fana ka litlhaloso ka bophelo ka mor’a lefu. Ha a hlahloba tse ling tsa lipolelo tsa bona puong ea hae e reng “Na Lefu le Talingoa e le Monyetla oa ho Kena Leseling?,” moruti oa thuto ea bolumeli oa Mok’hatholike Hans Küng o ile a qetella ka hore: “Liphihlelo tsa mofuta ona ha li pake letho ka hore ho ka ba le bophelo ka mor’a lefu: ena ke taba ea metsotso e mehlano ea ho qetela pele ho lefu eseng ea bophelo bo sa feleng ka mor’a lefu.” O ile a phaella: “Taba ea hore e ka ’na eaba ho na le bophelo ka mor’a lefu ke ea bohlokoa bo boholo bakeng sa bophelo pele ho lefu. E hloka karabo e tlamehang ho batloa kae-kae haeba e sa fanoe ke lingaka.”

4. Na filosofi e ka re thusa ho fumana likarabo har’a menyetla e mengata ea bophelo ka mor’a lefu e fanoang ke malumeli a sa tšoaneng?

⁴ Ho thoe’ng ka filosofi? Na e ka re thusa ho fumana likarabo har’a lintho tse ngata tsa menyetla ea bophelo ka mor’a lefu e fanoang ke malumeli a sa tšoaneng? Rafilosofi oa Brithani Bertrand Russell oa lekholong la bo20 la lilemo o re patlisiso ea filosofi e akarelletsa “tšebetso ea khopolo-taba.” Ho latela The World Book Encyclopedia, filosofi ke “mokhoa oa ho batla—tšebetso ea tlhahlobo, ho hlahlobisisa, tlhaloso le khopolo-taba.” Mabapi le sehlooho sa Bophelo ka Mor’a Lefu, litebello tsa filosofi li ’nile tsa fapana ho tloha ho bitseng ho se shoe monahano feela o lakatsoang ho isa ho boleleng hore ke tokelo ea tsoalo ea motho e mong le e mong.

Mohloli o Ikhethang oa Likarabo

5. Ke buka efe ea khale ka ho fetisisa e kileng ea ngoloa?

⁵ Leha ho le joalo, ho na le buka e nang le likarabo tsa ’nete lipotsong tsa bohlokoa tse buang ka bophelo le lefu. Ke buka ea khale ka ho fetisisa e kileng ea ngoloa, likarolo tsa eona li ile tsa hlophisoa lilemong tse ka bang 3 500 tse fetileng. Karolo ea pele ea buka ena e ile ea ngoloa lilemo tse makholo a seng makae pele ho qaptjoa lifela tsa pele-pele tsa mangolo a Bohindu, li-Veda, le lilemo tse ka bang sekete pele Buddha, Mahāvīra le Confucius ba e-ba teng lefatšeng. Buka ena e ile ea phethoa ka 98 C.E., lilemo tse fetang 500 pele Muḥammad a theha Boislamo. Mohloli ona o ikhethang oa bohlale bo phahameng ka ho fetisisa ke Bibele.a

6. Ke hobane’ng ha re ka lebella hore Bibele e re bolelle hore na moea ke eng?

⁶ Bibele e na le histori ea boholo-holo e nepahetseng ea buka leha e le efe e teng. Histori e tlalehiloeng ka Bibeleng e khutlela morao qalong ea lelapa la motho ’me e hlalosa hore na re bile teng joang mona lefatšeng. Ebile e re khutlisetsa morao nakong ea pele batho ba bōptjoa. Buka e joalo ka sebele e ka re fa temohisiso ka hore na motho o entsoe joang le hore na moea ke eng.

7, 8. Ke hobane’ng ha ka tšepo re ka retelehela Bibeleng bakeng sa likarabo tsa ’nete le tse khotsofatsang mabapi le hore na ho etsahala’ng ha re e-shoa?

⁷ Ho phaella moo, Bibele ke buka ea boprofeta e phethahetseng ka mokhoa o sa foseng. Ka mohlala, e ile ea bolela esale pele ka ho phahama le ho oa ha ’muso oa Medo-Persia le oa Greece ka mokhoa o batsi. Mantsoe ana a ne a nepahetse hoo bahlahlobisisi ba bang ba ileng ba leka ntle ho katleho ho paka hore a ngotsoe ka mor’a hore liketsahalo tseo li etsahale. (Daniele 8:1-7, 20-22) Boprofeta bo bong bo tlalehiloeng ka Bibeleng bo ntse bo phethahala ka mokhoa o batsi nakong eona ena ea rōna.b—Matheu, khaolo ea 24; Mareka, khaolo ea 13; Luka, khaolo ea 21; 2 Timothea 3:1-5, 13.

⁸ Ha ho motho, ho sa tsotellehe hore na o bohlale hakae, ea ka bolelang liketsahalo tsa ka moso ka nepo hakaalo. Ke ’Mōpi ea matla ’ohle feela le ea bohlale bohle oa bokahohleng ea neng a ka ho etsa. (2 Timothea 3:16, 17; 2 Petrose 1:20, 21) Ka sebele Bibele ke buka e tsoang ho Molimo. Ka sebele, buka e joalo e ka re fa likarabo tsa ’nete le tse khotsofatsang mabapi le hore na ho etsahala’ng ka rōna ha re e-shoa. Pele a re boneng hore na e re’ng ka moea.

[Mongolo o botlaaseng ba leqephe]

[Setšoantšo se leqepheng la 18]

Buka ea khale ka ho fetisisa e kileng ea ngoloa

[Setšoantšo se leqepheng la 18]

Buka e fanang ka likarabo tse tšepahalang le tse khotsofatsang