Tebello e Ikhethang!
“E mong le e mong ea phelang ’me a sebelisa tumelo ho ’na ho hang ha a na ho shoa le ka mohla.”—JOHANNE 11:26.
1. Ba limilione ba shoeleng hona joale ba tla tsosetsoa tikolohong ea mofuta ofe?
HA BA limilione ba tsosoa tsohong ea bafu, ba ke ke ba khutlisetsoa bophelong lefatšeng le se nang baahi. (Liketso 24:15) Ba tla tsohela tikolohong e ntlafalitsoeng e ntle ’me ba tla fumana ba lokiselitsoe matlo, liaparo le lijo tse ngata. Ke bo-mang ba tlang ho etsa litokisetso tsee kaofela? Ka ho hlakileng, ho tla tlameha hore ho be ho e-na le batho ba phelang lefatšeng leo le lecha pele tsoho ea lefatšeng e qala. Empa e tla be e le bo-mang?
2-4. Ke tebello efe e larileng ka pel’a ba phelang “matsatsing a ho qetela”?
2 Ho phethahala ha boprofeta ba Bibele ho bontša hore re phela “matsatsing a ho qetela” a tsamaiso ena ea lintho.a (2 Timothea 3:1) Haufinyane haholo, Jehova Molimo o tla kenella litabeng tsa batho ’me a fiele bokhopo lefatšeng. (Pesaleme ea 37:10, 11; Liproverbia 2:21, 22) Ka nako eo, ho tla etsahala’ng ka ba sebeletsang Molimo ka botšepehi?
3 Jehova a ke ke a timetsa ba lokileng hammoho le ba khopo. (Pesaleme ea 145:20) Ha ho mohla a kileng a etsa ntho e joalo, ’me a ke ke a e etsa ha a hloekisa lefatše bobe bohle. (Bapisa le Genese 18:22, 23, 26.) Ha e le hantle, buka ea ho qetela ea Bibele e bua ka “bongata bo boholo, boo ho seng motho ea neng a khona ho bo bala, bo tsoa lichabeng tsohle le melokong eohle le lihlopheng tsohle tsa batho le malemeng ’ohle,” e le bo tsoang “matšoenyehong a maholo.” (Tšenolo 7:9-14) E, letšoele le leholo le tla pholoha matšoenyeho a maholo ao lefatše la hona joale le khopo le fellang ho ’ona, ’me le tla kena lefatšeng le lecha la Molimo. Mono, moloko oa batho ba utloang o ka rua molemo ka botlalo tokisetsong e babatsehang ea Molimo ea ho lokolla moloko oa batho sebeng le lefung. (Tšenolo 22:1, 2) Kahoo, “bongata bo boholo” ha ho hlokahale hore bo latsoe lefu ho hang. Ke tebello e ikhethang hakaakang!
4 Na re ka kholiseha ka tšepo ee e hlollang? Hantle haholo! Jesu Kreste ka boeena o ile a bontša hore ho ne ho tla ba le nako eo ka eona batho ba neng ba tla phela ho se ho se mohla ba tla shoa. Pejana feela a tsosa motsoalle oa hae Lazaro, Jesu o ile a bolella Maretha hore: “E mong le e mong ea phelang ’me a sebelisa tumelo ho ’na ho hang ha a na ho shoa le ka mohla.”—Johanne 11:26.
Le Uena U ka Phela ka ho sa Feleng
5, 6. Haeba u rata ho phela ka ho sa feleng Paradeiseng lefatšeng, u lokela ho etsa’ng?
5 Na u rata ho phela ka ho sa feleng Paradeiseng lefatšeng? Na u labalabela ho bona baratuoa ba hao hape? Joale u tlameha ho ithuisa tsebo e nepahetseng ea thato ea Molimo le merero ea hae. Thapelong ho Molimo, Jesu o ile a re: “Sena se bolela bophelo bo sa feleng, ho tsoela pele ba ithuisa tsebo ka uena, Molimo eo e leng eena feela oa ’nete, le ka eo u mo romileng, Jesu Kreste.”—Johanne 17:3.
6 Ke thato ea Molimo hore “mefuta eohle ea batho e pholohe ’me e fihle tsebong e nepahetseng ea ’nete.” (1 Timothea 2:3, 4) Joale ke nako ea ho ithuta hore na uena, hammoho le ba bang ba limilione ba seng ba ntse ba etsa thato ea Molimo, le ka phela ka ho sa feleng joang Paradeiseng lefatšeng. Lipaki tsa Jehova li tla thabela ho u thusa ho ithuta ka ho eketsehileng ka Molimo le seo a se hlokang. Ke hobane’ng ha u sa iteanye le tsona Holong ea ’Muso e haufi le uena kapa u ngolle atereseng e haufi le uena ho tse thathamisitsoeng leqepheng le latelang?
[Mongolo o botlaaseng ba leqephe]
a Bona Tsebo e Isang Bophelong bo sa Feleng, leqepheng la 98-107, e hatisitsoeng ke Watchtower Bible and Tract Society of New York, Inc.
[Setšoantšo se leqepheng la 31]
Ha ho hlokahale hore “bongata bo boholo” bo latsoe lefu ho hang