Matla a ho Timetsa—“Jehova ke Mohale ea Matla”

1-3. (a) Baiseraele ba ile ba tobana le tšoso efe e tsoang ho Baegepeta? (b) Jehova o ile a loanela batho ba hae joang?

BAISERAELE ba ne ba qabeletsoe—ba thibeletsoe ke lithaba tse matsaranka a tšabehang le leoatle le sa tšeleheng. Lebotho le matla la sesole la Egepeta le ne le ba jahelletse, le ikemiselitse ho ba ripitla.a Leha ho le joalo, Moshe o ile a phehella batho ba Molimo hore ba se ke ba lahla tšepo. O ile a ba tiisetsa: “Jehova o tla le loanela.”—Exoda 14:14.

² Leha ho le joalo, ho bonahala eka Moshe o ile a ipiletsa ho Jehova, ’me Molimo a mo arabela ka ho re: “Ke hobane’ng ha u ntse u hoeletsa ho ’na? . . . U phahamise molamu oa hao ’me u otlollele letsoho la hao holim’a leoatle u le arole.” (Exoda 14:15, 16) Joale nahana ka se ileng sa etsahala ka mor’a moo. Kapele-pele Jehova o laela lengeloi la hae, ’me leru le ema ka mor’a Baiseraele, mohlomong le teteane hoo ekang ke lebota ’me le sira lebotho la Egepeta le hlaselang. (Exoda 14:19, 20; Pesaleme ea 105:39) Moshe o otlolla letsoho. Moea o matla o arola leoatle ka lehare. Ka tsela e itseng, metsi ao aa hoama ’me a ema joaloka lebota, a bula tsela e lekaneng hore sechaba sohle se tšele!—Exoda 14:21; 15:8.

³ Ha a bona ketsahalo ena e bontšang matla a Molimo, Faro o ile a lokela ho laela mabotho a hae hore a khutlele hae. Ho e-na le hoo, Faro ea ikhohomosang o a laela hore a hlasele. (Exoda 14:23) Baegepeta ba itšohlometsa ka leoatleng ba ba jahelletse, empa ho hlasela ha bona kapele-pele ho fetoha molubalube feela ha mabili a likoloi tsa bona tsa ntoa a qala ho tsoa. Hang ha Baiseraele ba se ba tšeletse ka lehlakoreng le leng ba sireletsehile, Jehova o laela Moshe: “Otlollela letsoho la hao holim’a leoatle e le hore metsi a ka khutlela holim’a Baegepeta, likariking tsa bona tsa ntoa le ho banna ba bona ba palameng lipere.” Metsi a emeng joaloka mabota a boea sekoele, a koahela Faro le mabotho a hae!—Exoda 14:24-28; Pesaleme ea 136:15.

4. (a) Jehova o ile a ipaka ho ba eng Leoatleng le Lefubelu? (b) Ba bang ba ka ’na ba ikutloa joang ka tsela ee eo Jehova a hlalosoang ka eona?

⁴ Ho lopolloa ha sechaba sa Iseraele Leoatleng le Lefubelu e ne e le ketsahalo e ikhethang tlalehong ea litšebelisano tsa Molimo le moloko oa batho. Moo Jehova o ile a ipaka ho ba “mohale ea matla.” (Exoda 15:3) Leha ho le joalo, u ikutloa joang ka tsela ee eo Jehova a hlalosoang ka eona? Ke ’nete hore ntoa e tliselitse moloko oa batho mahlomola le mesarelo e mengata. Na ekaba ho sebelisa ha Molimo matla a timetsang ho ka bonahala eka ke tšitiso ho e-na le ho ba tšusumetso ea hore u atamele ho eena?

Ntoa ea Molimo ha e Bapisoa le Likhohlano Tsa Batho

5, 6. (a) Ke hobane’ng ha ka nepo Molimo a bitsoa “Jehova oa mabotho”? (b) Lintoa tse loanoang ke Molimo li fapana joang le tse loanang ke batho?

⁵ Molimo o bitsoa ka tlotla “Jehova oa mabotho” ka makhetlo a ka bang 260 ka Mangolong a Seheberu le ka makhetlo a mabeli ka Mangolong a Segerike a Bakreste. (1 Samuele 1:11) E le ’Musi oa Lintho Tsohle, Jehova o laola lebothohali la makhotla a mangeloi. (Joshua 5:13-15; 1 Marena 22:19) Tsela eo lebotho lena le nang le matla a ho timetsa ka eona ea hlolla. (Esaia 37:36) Ha ho thabise ho nahana ka ho timetsoa ha batho. Leha ho le joalo, re lokela ho hopola hore lintoa tsa Molimo ha li tšoane le likhohlano tse sa reng letho tsa batho. Baeta-pele ba sesole le ba lipolotiki ba ka ’na ba leka ho etsa eka sepheo sa bona sa ho loana sea utloahalang. Empa kamehla ho loana ha batho ho akarelletsa meharo le boithati.

⁶ Ka lehlakoreng le leng, Jehova ha a khannoe ke ho nkeha maikutlo. Deuteronoma 32:4 e re: “Ke Lefika, lintho tsohle tseo a li etsang li phethahetse hobane litsela tsohle tsa hae li na le toka. Ke Molimo ea tšepahalang le ea se nang leeme, o lokile ’me oa hlompheha.” Lentsoe la Molimo le nyatsa khalefo e sa laoleheng, sehloho le mabifi. (Genese 49:7; Pesaleme ea 11:5) Kahoo ha ho mohla Jehova a nkang khato ho se lebaka. O sebelisa matla a hae a ho timetsa ka tekanyetso le hona e le tharollo ea ho qetela. Ho joalokaha a boletse ka moprofeta oa hae Ezekiele: “Jehova ’Musi oa Lintho Tsohle o re: ‘Ha ke thabele ho bona motho ea khopo a shoa. Nka thabela hore a fetole litsela tsa hae tse mpe ’me a tsoele pele a phela.”—Ezekiele 18:23.

7, 8. (a) Ka phoso Jobo o ile a fihlela qeto efe ka mahlomola a mo hlahelang? (b) Elihu o ile a lokisa monahano oa Jobo joang ntlheng ee? (c) Re ka ithuta thuto efe phihlelong ea Jobo?

⁷ Joale, ke hobane’ng ha Jehova a sebelisa matla a ho timetsa? Pele re araba potso eo, re ka ’na ra hopola monna ea lokileng, Jobo. Satane o ile a qosa Jobo le batho bohle ka hore ba ke ke ba lula ba tšepahala ha ba lekoa. Jehova o ile a araba phephetso eo ka ho lumella Satane hore a leke botšepehi ba Jobo. Ka lebaka leo, Jobo o ile a kula, a lahleheloa ke leruo a ba a hlokahalloa ke bana. (Jobo 1:1–2:8) Ka ho se lemohe liqoso tse amehang, Jobo ka phoso o ile a nahana hore lebaka la mahlomola a hae e ne e le hobane Molimo a ne a mo otla ka tsela e hlokang toka. O ile a botsa Molimo hore na ke hobane’ng ha A ‘shebane le eena,’ a mo entse “sera.”—Jobo 7:20; 13:24.

⁸ Mohlankana e mong ea bitsoang Elihu o ile a pepesa monahano oa Jobo o fosahetseng, a re: “Na kannete u lumela hore u lokile hoo u ka reng, ‘Ke lokile ho feta Molimo’?” (Jobo 35:2) E, ke booatla ho nahana hore re tseba ho feta Molimo kapa ho nka hore o bontšitse leeme. Elihu o ile a re: “Ha se ntho e utloahalang hore Molimo oa ’nete a etse bokhopo le hore Ea Matla ’Ohle a etse ntho e fosahetseng!” Hamorao o ile a re: “Ha ho motho ea ka utloisisang Ea Matla ’Ohle. O matla haholo, o lokile ebile o lula a etsa lintho ka toka.” (Jobo 34:10; 36:22, 23; 37:23) Re ka kholiseha hore ha Molimo a loana, o na le lebaka le utloahalang la ho etsa seo. Re hopotse seo, a re hlahlobeng a mang a mabaka a etsang hore ka linako tse ling Molimo oa khotso a nke boemo ba mohlabani.—1 Bakorinthe 14:33.

Lebaka Leo ka Lona Molimo oa Khotso a Tlamehang ho Loana

9. Ke hobane’ng ha Molimo ea halalelang a loana?

⁹ Ka mor’a ho rorisa Molimo e le “mohale ea matla,” Moshe o ile a phatlalatsa: “Ke molimo ofe har’a melimo ea joaloka uena, Jehova? Ke mang ea joaloka uena, ea halalelang ka ho fetisisa?” (Exoda 15:11) Moprofeta Habakuke le eena o ile a ngola: “U hloekile haholo hore u ka bona lintho tse fosahetseng ebile ha u khone ho mamella bokhopo.” (Habakuke 1:13) Le hoja Jehova e le Molimo ea lerato, hape ke Molimo oa khalalelo, ho loka le toka. Ka linako tse ling, litšobotsi tseo li mo qobella ho sebelisa matla a hae a ho timetsa. (Esaia 59:15-19; Luka 18:7) Kahoo Molimo ha a silafatse khalalelo ea hae ha a loana. Ho e-na le hoo, o loana hobane a halalela.—Exoda 39:30.

10. Lehloeo le boletsoeng esale pele ho Genese 3:15 le ne le ka felisoa joang, hona hoo ho ne ho tla tlisa melemo efe ho batho ba lokileng?

¹⁰ Nahana ka boemo bo ileng ba hlaha ka mor’a hore banyalani ba pele Adama le Eva, ba fetohele Molimo. (Genese 3:1-6) Haeba Jehova a ne a ile a mamella ho se loke ha bona, o ne a tla be a theotse boemo ba hae e le ’Musi oa Bokahohle. Kaha ke Molimo ea lokileng, o ne a tlameha ho ba ahlolela lefu. (Baroma 6:23) Boprofeteng ba pele ba Bibele, o ile a bolela esale pele hore ho ne ho tla ba le lehloeo pakeng tsa bahlanka ba hae le balateli ba “noha,” e leng Satane. (Tšenolo 12:9; Genese 3:15) Qetellong, lehloeo lena le ne le tla felisoa feela ka ho timetsa Satane. (Baroma 16:20) Empa kahlolo eo e ne e tla fella ka litlhohonolofatso tse kholo ho batho ba lokileng, e tlose tšusumetso ea Satane lefatšeng ’me e bule tsela e isang paradeiseng ea lefatše lohle. (Matheu 19:28) Ho fihlela nakong eo, ba neng ba le ka lehlakoreng la Satane ba ne ba tla ’ne ba sokele boiketlo ba batho ba Molimo nameng le moeeng. Nako le nako, Jehova o ne a tla tlameha ho kenella.

Molimo o Nka Khato ea ho Tlosa Bokhopo

11. Ke hobane’ng ha Molimo a ile a ikutloa a tlameha ho tlisa moroallo oa lefatše lohle?

¹¹ Tsela e ’ngoe eo Jehova a ileng a kenella ka eona, e ile ea e-ba ka moroallo oa mehleng ea Noe. Genese 6:11, 12 e re: “Empa lefatše le ne le senyehile mahlong a Molimo oa ’nete le bile le tletse ntoa. Molimo a sheba lefatše ’me a bona hore le senyehile. Batho bohle ba ne ba etsa lintho tse mpe.” Na Molimo o ne a tla lumella ba khopo ho felisa mosaletsa oa ho qetela oa litekanyetso tsa boitšoaro lefatšeng? Che. Jehova o ile a ikutloa a tlameha ho tlisa moroallo oa lefatše lohle ho felisa batho ba mabifi le ba etsang boitšoarong bo hlephileng.

12. (a) Jehova o ile a bolela eng esale pele mabapi le “ngoana” oa Abrahama? (b) Ke hobane’ng ha Baamore ba ne ba lokela ho timetsoa?

¹² Ho ne ho tšoana le ka kahlolo ea Molimo khahlanong le Bakanana. Jehova o ile a senola hore ngoana eo malapa ’ohle a lefatše a neng a tla hlohonolofatsoa ka lebaka la hae o ne a tla hlaha ho Abrahama. Tumellanong le morero oo, Molimo o ile a laela hore litloholo tsa Abrahama li fuoe naha ea Kanana, eo ho eona ho neng ho ahile sechaba sa Baamore. Molimo o ne a ka lokafatsa ho lelekoa ha batho baa naheng ea habo bona joang? Jehova o ile a bolela esale pele hore ha ba na ho lelekoa naheng ho fihlela ka mor’a lilemo tse ka bang 400—ho fihlela “nako ea hore Baamore ba ahloloe” e ‘fihlile.’b (Genese 12:1-3; 13:14, 15; 15:13, 16; 22:18) Nakong eo, Baamore ba ile ba ’na ba tetebela le ho feta boitšoarong bo hlephileng. Kanana e ile ea fetoha naha ea borapeli ba litšoantšo, tšollo ea mali le mekhoa e litšila ea ho kopanela liphate. (Exoda 23:24; 34:12, 13; Numere 33:52) Baahi ba naha eo ba ne ba bile ba etsa mahlabelo ka bana ba bona ka ho ba chesa mollong. Na Molimo ea halalelang o ne a ka pepesetsa batho ba hae bokhopo bo joalo? Che! O ile a re: “Naha ha ea hloeka ’me ke tla tlisetsa baahi ba naha kotlo ka lebaka la phoso ea bona ’me ba tla lelekoa naheng ea bona.” (Levitike 18:21-25) Leha ho le joalo, Jehova ha aa ka a bolaea batho a sa khethe. Bakanana ba neng ba lokile, ba kang Rahaba le Bagibeone, ba ile ba pholosoa.—Joshua 6:25; 9:3-27.

Ho Loanela Lebitso la Hae

13, 14. (a) Ke hobane’ng ha Jehova a ne a tlameha ho halaletsa lebitso la hae? (b) Jehova o ile a tlosa thohako lebitsong la hae joang?

¹³ Kaha Jehova oa halalela, lebitso la hae lea halalela. (Levitike 22:32) Jesu o ile a ruta barutuoa ba hae ho rapela: “Lebitso la hao le halaletsoe.” (Matheu 6:9) Bofetoheli ba Edene bo ile ba silafatsa lebitso la Molimo, ba tsosa lipelaelo ka botumo ba Molimo le tsela eo a busang ka eona. Jehova o ne a ke ke a lumella ketselletso le bofetoheli tse joalo. O ne a tlameha ho tlosa thohako lebitsong la hae.—Esaia 48:11.

¹⁴ Nahana hape ka Baiseraele. Ha e ntse e le makhoba Egepeta, tšepiso ea Molimo ho Abrahama ea hore malapa ’ohle a lefatše a ne a tla hlohonolofatsoa ka lebaka la ngoana oa hae e ne e bonahala e le e sa reng letho. Empa ka ho ba lokolla le ho ba etsa sechaba, Jehova o ile a tlosa thohako lebitsong la hae. Kahoo, moprofeta Daniele o ile a rapela Molimo a re: ‘Jehova Molimo oa rona, u ntšitse batho ba hao naheng ea Egepeta ka matla a hao ’me oa etsa hore lebitso la hao le tsebahale.’—Daniele 9:15.

15. Ke hobane’ng ha Jehova a ile a lokolla Bajuda botlamuoeng Babilona?

¹⁵ Ka ho thahasellisang, Daniele o ile a rapela ka tsela ena ha Bajuda ba ne ba hloka hore Jehova a nke khato hape molemong oa lebitso la Hae. Bajuda ba sa mameleng ba ile ba iphumana ba le botlamuoeng, lekhetlong lena ba le Babilona. Motse-moholo oa bona, Jerusalema, e ne e le lithako. Daniele o ne a tseba hore ho khutlisetsa Bajuda naheng ea habo bona ho ne ho tla tlotlisa lebitso la Jehova. Kahoo, Daniele o ile a rapela: “Jehova re tšoarele. Re utloe hle Jehova. Molimo oa ka, u se ke oa lieha molemong oa lebitso la hao hobane motse oa hao le batho ba hao ba bitsoa ka lebitso la hao.”—Daniele 9:18, 19.

Ho Loanela Batho ba Hae

16. Hlalosa hore na ke hobane’ng ha ho thahasella ha Jehova ho sireletsa lebitso la hae ho sa bolele hore ha a na kutloelo-bohloko le hore ke moithati.

¹⁶ Na ho thahasella ha Jehova ho sireletsa lebitso la hae ho bolela hore ha a na kutloelo-bohloko ebile ke moithati? Che, kaha oa halalela ebile o rata toka o nka khato e le hore a sireletse batho ba hae. Nahana ka Genese khaolo ea 14. Moo re bala ka marena a mane a futuhang a ileng a hapa ngoana oa ngoan’abo Abrahama, Lota le lelapa la hae. Ka thuso ea Molimo, Abrahama o ile a hlola mabotho ao a matla ho feta la hae ka tlholo e tsoileng matsoho! Ho tlalehoa ha tlholo eo mohlomong e bile tlaleho ea pele “bukeng ea Lintoa tsa Jehova,” eo ho bonahalang eka ke buka eo hape e neng e tlaleha le litlhaselo tse ling tsa ntoa tse sa tlalehoang ka Bibeleng. (Numere 21:14) Tlholo ena e ile ea lateloa ke ho hlola lintoa tse ling tse ngata.

17. Ke’ng se bontšang hore Jehova o ile a loanela Baiseraele ka mor’a hore ba kene naheng ea Kanana? Fana ka mehlala.

¹⁷ Nakoana pele Baiseraele ba kena naheng ea Kanana, Moshe o ile a ba tiisetsa: “Jehova Molimo oa lona o tla tsamaea ka pel’a lona ’me o tla le loanela feela joalokaha le ile la bona ha a le loanela naheng ea Egepeta.” (Deuteronoma 1:30; 20:1) Ho qala ka mohlahlami oa Moshe, Joshua, ho theosa le mehla ea Baahloli le ea ho busa ha marena a tšepahalang a Juda, ka sebele Jehova o ile a loanela batho ba hae, ka makhetlo a mangata a ba fa tlholo e ikhethang ho lira tsa bona.—Joshua 10:1-14; Baahloli 4:12-17; 2 Samuele 5:17-21.

18. (a) Ke hobane’ng ha re ka leboha hore ebe Jehova ha aa fetoha? (b) Ho tla etsahala’ng ha lehloeo le hlalositsoeng ho Genese 3:15 le fihla sehlohlolong sa lona?

¹⁸ Jehova ha aa fetoha; le morero oa hae oa ho etsa lefatše lena paradeise ea khotso ha oa fetoha. (Genese 1:27, 28) Molimo o ntse a hloile bokhopo. Leha ho le joalo, o rata batho ba hae ka lerato le tebileng ’me haufinyane o tla nka khato molemong oa bona. (Pesaleme ea 11:7) Ha e le hantle, lehloeo le hlalositsoeng ho Genese 3:15 le lebeletsoe ho fihla sehlohlolong ka ketsahalo e ikhethang le e mabifi haufinyane. E le hore a halaletse lebitso la hae le ho sireletsa batho ba hae, Jehova e tla ba “mohale ea matla” hape!—Zakaria 14:3; Tšenolo 16:14, 16.

19. (a) Bontša hore na ke hobane’ng ha ho sebelisa ha Molimo matla a ho timetsa ho ka re atametsa ho eena. (b) Ho ikemisetsa ha Molimo ho loana ho lokela ho re ama joang?

¹⁹ Nahana ka papiso ena: Ha re re lelapa la monna e mong le ne le hlaseloa ke phoofolo e hlaha ebe monna eo o loantšana le eona ’me oa e bolaea. Na u ne u tla lebella hore mosali oa hae le bana ba hae ba mo furalle ka lebaka la ketso eo? Che, u ne u tla lebella hore ba susumetsoe ke lerato la hae le se nang boithati ho bona. Ka ho tšoanang, ha rea lokela ho furalla Molimo ha a sebelisa matla a ho timetsa. Ho ikemisetsa ha hae ho loanela ho re sireletsa ho lokela ho tebisa lerato la rona ho eena. Ho hlompha ha rona matla a hae a se nang moeli le hona ho lokela ho teba haholoanyane. Kahoo, re ka ‘sebeletsa Molimo ka tlhompho e tebileng.’—Baheberu 12:28.

Atamela ho “Mohale ea Matla”

20. Ha re bala litlaleho tsa Bibele tsa lintoa tseo Molimo a li loanneng tseo mohlomong re ke keng ra li utloisisa ka ho feletseng, re lokela ho etsa joang, hona hobane’ng?

²⁰ Ke ’nete hore Bibele ha e hlalose makolopetso ’ohle a qeto e ’ngoe le e ’ngoe eo Jehova a e etsang mabapi le lintoa tseo a li loanang. Empa kamehla re ka kholiseha ka sena: Ha ho mohla Jehova a sebelisang matla a ho timetsa ka tsela e leeme, e kotsi kapa e sehloho. Hangata, ho hlahloba litemana tse potolohileng tlaleho ea Bibele kapa boitsebiso bo amehang ho ka re thusa ho utloisisa taba ka ho feletseng. (Liproverbia 18:13) Esita leha re se na makolopetso ’ohle, ho ithuta ho eketsehileng feela ka Jehova le ho thuisa ka litšobotsi tsa hae tsa bohlokoa ho ka re thusa ho tlosa lipelaelo leha e le life tse ka ’nang tsa hlaha. Ha re etsa joalo, rea hlokomela hore re na le mabaka a lekaneng a ho tšepa Molimo oa rona, Jehova.—Jobo 34:12.

21. Le hoja ka linako tse ling e e-ba “mohale ea matla,” ha e le hantle Jehova o joang?

²¹ Le hoja Jehova e le “mohale ea matla” ha ho hlokahala, sena ha se bolele hore ha e le hantle o rata ntoa. Ponong ea Ezekiele ea koloi ea leholimo, Jehova o hlalosoa a itokisetsa ho ea loantša lira tsa hae. Empa Ezekiele o ile a bona Molimo a pota-potiloe ke mookoli—oo e leng pontšo ea khotso. (Genese 9:13; Ezekiele 1:28; Tšenolo 4:3) Ho hlakile hore Jehova o lutse ka khutso ebile o na le khotso. Moapostola Johanne o ile a ngola: “Molimo ke lerato.” (1 Johanne 4:8) Litšobotsi tsohle tsa Jehova li teng ka teka-tekanyo e phethahetseng. Ka hona, ke tokelo e kaakang hore ebe re khona ho atamela ho Molimo ea matla joalo empa a le lerato!