Mangeloi a Tsebahatsa Tsoalo ea Jesu

’Musi oa Moroma ea bitsoang Sesare Augustase o ile a laela Bajuda bohle hore ba ee metseng ea habo bona ho ea ingolisa teng. Kahoo, Josefa le Maria ba ea Bethlehema, e leng moo lelapa labo Josefa le tsoang teng. Maria o ne a se a le haufi le ho ba le ngoana.

Ha ba fihla Bethlehema, ba fumana ho se moo ba ka fihlelang teng haese ka setaleng. Ha ba ntse ba le moo Jesu a hlaha. Maria a mo phuthela ka masela ’me a mo robatsa ka sejelong.

Ho ne ho e-na le balisa naheng, ba lisitse mehlape bosiu haufi le Bethlehema. Ka tšohanyetso, lengeloi la hlaha ka pel’a bona ’me ba pota-potoa ke khanya ea Jehova. Balisa bao ba tšoha empa lengeloi la re ho bona: ‘Le se ke la tšoha. Ke le tšoaretse litaba tse monate. Kajeno Mesia o hlahile Bethlehema.’ Ka eona nako eo, ha hlaha mangeloi a mang a mangata, a re: “Ho rorisoe Molimo ea maholimong le batho bao a ba ratang lefatšeng ba be le khotso.” Eaba mangeloi ao aa nyamela. Balisa bao ba ile ba etsa’ng?

Ba ile ba re: ‘A re eeng Bethlehema hang-hang.’ Eaba baa ea ’me ba fumana Josefa le Maria ka setaleng ba e-na le lesea la bona.

Batho bohle ba ileng ba utloa seo lengeloi le se boleletseng balisa bao ba makala. Maria o ile a nahana ka ho teba ka seo lengeloi le se buileng ’me ha aa ka a se lebala. Ka mor’a moo, balisa ba khutlela mehlapeng ea bona ’me ba leboha Jehova ka sohle seo ba se utloileng le ho se bona.