Jesu Bophelo le Tšebeletso Tsa Hae

O Arabela Banģosi ba Hae

KE SABBATHA. Jesu o phekola monna ea neng a kutse ka lilemo tse 38. Empa baeta-pele ba bolumeli ba Bajode ba mo nģosa ka ho tlōla Sabbatha. Jesu o’a arabela: “Ntate o sa sebetsa le joale, le ’na kea sebetsa.”

Ho sa tsotellehe polelo ea Bafarisi, mosebetsi oa Jesu hase mosebetsi o ka thibeloang ke molao oa Sabbatha. Mosebetsi oa hae oa ho bolela le ho folisa ke kabelo e tsoang ho Molimo, ’me a etsisa mohlala oa Molimo, o o etsa ka mehla. Leha ho le joalo, karabelo ea hae e etsa hore Bajode ba halefe haholoanyane ho feta pele, ’me ba batla ho ’molaea. Hobane’ng?

Hobane hona joale ha ba lumele feela hore Jesu o tlōla Sabbatha empa hape ba nka hore polelo ea hae ea hore ke Mora oa Molimo ka seqo ke bonyefoli. Leha ho le joalo, Jesu ha a tšohe ’me o ba arabela hape mabapi le kamano ea hae e hlomphehang le Molimo. O re, “Ntate o rata Mora, ’me o ’montša tsohle tsee eena a li etsang.”

Jesu o tsoela pele, “Joale ka ha Ntate a tsosa bafu, le ho ba pholosa, le eena Mora o pholosa bao a ratang ho ba pholosa.” Ka sebele Mora o se a ntse a tsosa bafu ka kutloisiso ea moea! Jesu o re, “Ea utloang lentsoe la ka, ’me a lumela ea nthomileng, . . . o tlohile lefung ho kena bophelong.” E, o tsoela pele: “Nako ea tla, le joale e se e tlile, eo bafu ba tla utloa lentsoe la Mor’a Molimo, ’me ba le utloang ba tla phela.”

Le hoja ho tla fihlela nakong ena, ho se tlaleho ea hore Jesu ka sebele o tsositse mang kapa mang bafung, o bolella banģosi ba hae hore tsoho e joalo ea sebele ea bafu le eona e tla etsahala. O re, “Se makaleng ke hoo; hobane nako ea tla, eo bohle ba mabitleng ba tla utloa lentsoe la hae; ’me ba tla tsoa ho ’ona.”

Ho tla fihlela mona, Jesu ha a e-so hlalose ka ho hlaka pontšeng karolo ea hae ea bohlokoa morerong oa Molimo ka tsela e hlakileng le e tobileng hakana. Empa banģosi ba Jesu ha ba pakeloe lintho tsena ke Jesu a le mong feela. Jesu o’a ba hopotsa, “Lōna le rometse ho Johanne, ’me o pakile ’nete.”

Lilemo tse peli feela pejana, Johanne Mokolobetsi o ne a boleletse baetapele bana ba Bajode ka Ea neng a tla tla kamorao ho eena. Ha a ba hopotsa ka tlhompho eo ba kileng ba e fa Johanne ea seng a le litlamong joale, Jesu o re: “Lōna le ithatetse ho nyakalla leseling la hae ka mehla e se mekae.” Jesu o ba hopotsa sena ka tšepo ea ho ba thusa, e, ho ba pholosa. Empa ha a itšetleha ka bopaki ba Johanne.

“Mesebetsi eo ke e etsang [ho akarelletsa mohlolo oo a sa tsoa o etsa] ke eona e mpakang hore Ntate o nthomile.” Empa ntle le hoo, Jesu o tsoela pele: “Le eena Ntate ea nthomileng oa mpaka.” Ka mohlala, Molimo o pakile Jesu kolobetsong ea hae, a re: “Enoa ke Mora oa ka ea ratoang.”

Ka sebele, banģosi ba Jesu ha ba na lebaka la ho mo hana. Oona Mangolo ao ba ipolelang hore ba batlisisa ho oona aa mo paka! Jesu o qetella ka hore, “Hola le lumela ho Moshe, le ho ’na le ka be le lumela; hobane o ngolile taba tsa ka. Empa ekare ha le sa lumele mangolo a hae, le ka lumela mantsoe a ka joang?” Johanne 5:17-47; 1:19-27; Mattheu 3:17.

◆ Ke hobane’ng ha mosebetsi oa Jesu e se ho tlōla Sabbatha?

◆ Jesu o hlalosa karolo ea hae ea bohlokoa morerong oa Molimo joang?

◆ Ho paka hore ke Mora oa Molimo, Jesu o supa bopaking ba mang?