Liithuti tsa Gileade li Phehelloa ho Hlaolela Tsebo e Ntle ea Puisano

KA SONTAHA, la 4 March, 1990, batho ba fetang 4 100 ba ile ba tlala Holong ea Kopano ea Lipaki tsa Jehova Jersey City bakeng sa ho abuoa ha mangolo ho sehlopha sa bo88 sa Sekolo sa Bibele sa Gileade sa Watchtower. Liithuti tse 24 li ne li tsoa linaheng tse 6 ’me joale li ne li romeloa linaheng tse 13.

Lenaneo le simolotse ka 10:00 hoseng. Ka mor’a pina, George Gangas, eo ha joale a nang le lilemo tse fetang 90 ’me ebile e le setho sa Sehlopha se Busang, o ile a bula seboka ka thapelo e mofuthu ho Jehova. Ka mor’a sena, molula-setulo, C. W. Barber, eo le eena e leng setho sa Sehlopha se Busang ’me ka boeena e le seithuti sa Gileade sa sehlopha sa bo26, ka bokhutšoane o ile a bua ka liphetoho tse potlakileng boemong ba lefatše. O ile a phethela ka hore: “Ha ho mohla ho kileng haeba le monyetla o babatsehang haholo oa ho ba lipaki tsa boholo ba Jehova le ho loka ha hae joaloka ona.” A tsoela pele ho kenyelletsa libui tse fapaneng lenaneong la hoseng.

Vernon Wisegarver, setho sa Komiti ea Fektheri Brooklyn, o ile a bua ka sehlooho “Ebang le Tsebo e Hloahloa Mosebetsing oa Lōna.” Ha a bua ka setšoantšo sa motho ea teang litšepe motseng ea ileng a etsa ketane e matla eo, ka ho hokelloa ankoreng, e ileng ea pholosa bophelo ba bohle ba neng ba palame sekepe nakong ea sefefo, o ile a tšoantša liithuti tsa Gileade le motei eo oa litšepe. Ka ho ruta batho Bibele, ba tla ba thusa ho etsa ketane e pholosang bophelo ea litšobotsi tsa bomolimo ka ho sebelisa tsebo eo ba ithutileng eona nakong ea koetliso ea bona ea Gileade. O ile a khothalletsa liithuti ho tsoela pele ho leotsa tsebo ea tsona ea ho ruta le ho ema ka pel’a Morena e moholo ho feta bohle e le “basebeletsi ba nang le tsebo.”

Ea hlahlamang, John Barr, setho sa Sehlopha se Busang, o ile a bua sehloohong “Latsoang ’me le Bone Hoba Jehova o Molemo.” Mantsoe a hae a ne a theiloe ho Pesaleme ea 34:8 e reng: “Latsoang, le bone hoba Jehova o molemo! Ho lehlohonolo motho ea tšabelang ho eena!” O ile a ba eletsa: “Latsoang ntho e ’ngoe le e ’ngoe kabelong ea lōna ea boromuoa. Lekang lintho tsohle. Le se ke la li tšaba. Joale le tla tseba ho latsoa molemo oa Jehova ka tsela eo ho seng mohla le kileng la o latsoa ka eona le pele. Le se be batho ba khethang. Le ka mohla le se re, ‘Ha ke rate sena.’ Se latsoeng.”

Charles Woody, setho sa Komiti ea Lefapha la Tšebeletso Brooklyn, o ile a bua ka sehlooho, “Ho ba le Pono e Leka-lekaneng ka Rōna.” O ile a re: “Re thaba ho ba le ba nang le pono e leka-lekaneng ka bona, bao ka mehla ba sa itsamaeleng ka tsela ea bona, ba potlakelang ho fana ka litlhaloso le ho haha ba bang, le bao, le hoja ba na le tsebo, ba sa etseng hore ba bang ba ikutloe ba se na eona.” O ile a tsoela pele ka hore: “Joaloka baromuoa le tla rata ho hulela batho ’neteng, eseng ho ba sitisa. Boikokobetso ba lōna e tla ba bohlokoa haholo ho le thusa ho finyella sena.”

Lyman Swingle, setho sa Sehlopha se Busang, o ile a bua ka sehlooho “Likhaolo tse Latelang, li Tla Re Bolella Eng?” O ile a simolla ka hore: “Kajeno le simolla khaolo e ncha bophelong ba lōna. Ke eng seo le tla se ngola likhaolong tsena ho tloha joale ho fihlela nakong e tlang?” O ile a ba hopotsa: “Ntho e ’ngoe le e ’ngoe eo le e etsang e lokela ho tlisa tlotla le thoriso ho Jehova,” ’me o ile a phaella: “Tiisang hore liqeto tsa lōna li theiloe Lentsoeng la Molimo. Hopolang Liproverbia 3:7, e reng: ‘U se ke ua ipona bohlale.’ Tšepahalang ho phethahatsa likabelo tsa lōna.” O ile a phethela ka hore: “Re tšepa hore le ke ke la khaotsa ho ngola pale ea bophelo ba lōna, hore le tla phela ka ho sa feleng.”

Ea latelang, Jack Redford, e mong oa barupeli ba sekolo, o ile a phehella liithuti: “E-bang Mahlabelo a Phelang.” O ile a simolla ka hore: “Tšebeletso ea boromuoa ke bophelo ba sehlabelo. . . . Re rata moea oa lōna oa ho iketsa sehlabelo.” Ha a qotsa ho Ba-Filippi 2:17 (NW), moo moapostola Pauluse a bolelang hore o ile a tšolloa joaloka seno sa sehlabelo, e leng se bolelang hore o ne a ikemiselitse ho itšebelisa joaloka sehlabelo se phelang, o ile a botsa: “Empa ke joang hangata baromuoa ba tšoanang le seno sa sehlabelo?” Joale o ile a pheta liphihlelo tse peli tsa baromuoa ba ileng ba itšebelisa ho feta kamoo ho hlokahalang. E mong o ile a etsa litene tse 16 000 ka matsoho ’me a haha Holo ea pele ea ’Muso naheng eo a abetsoeng ho eona. Phihlelo e ’ngoe ke ea khaitseli e mong ea ileng a tsamaea le monna oa hae ho ea kampong ea mafutsana a batsamai, moo boemo ba bophelo bo neng bo le tlaase haholo. Bo-khaitseli bohle ba sebaka seo ba ile ba mo ananela hobane ba ile ba elelloa hore o iketsa ‘sehlabelo se phelang.’ Empa sebui se ile sa hopotsa liithuti hore sehlabelo ha se na molemo haeba se sa tsamaee le kutlo. Ka ho sebelisa tlaleho ea Morena Saule le Baamaleke, o ile a ba phehella: “Ka mehla hopolang hore kutlo e molemo ho feta sehlabelo. Le se leke ho phehisana le Jehova. Ka mehla etsang seo a le bolellang hore le se etse.”

Joale molula-setulo o ile a kenyelletsa morupeli e mong oa sekolo, Ulysses Glass. Moena Glass o ile a simolla ka hore: “Sehlopha sa bo88 ebile se thabileng ’me e ntse e le se thabileng. Lihlopha tse ling le tsona li ne li thabile. Joale ke hobane’ng ha thabo ea lōna e le e khethehileng?” O bontšitse hore thabo “hase pakane empa ke phello ea mesebetsi e nepahetseng. Ke mokhoa oa ho fihla moo o tlisang moputso.” O ile a qotsa mongoli eo bophelo ba hae bo ileng ba fetoloa ke ho bona mantsoe: “Katleho ke leeto, hase qetello ea lōna.” Mongoli o ile a etsa qeto ea hore a ke ke a khaotsa ho lekanyetsa thabo motheong oa ho fihla qetellong ea leeto ho e-na le ho bona bophelo ba hae bohle e le leeto le tsoelang pele. O itse: “Ha ho tsela e isang thabong. Thabo ke eona tsela.” Joale eaba Moena Glass o hlalosa hore sehlopha sena se hlile se utloisisa moko oa mantsoe ao. O ile a phethela ka mantsoe a Pesaleme ea bo84 ’me a re: “Tsoelang pele ho tsamaea lilibeng tsa metsi. Ho sa tsotellehe mathata leha e le afe ao le thulanang le oona, e se e ka thabo ea ba ratang Jehova le ba mo tšabang e ka tsoela pele ho ba ea lōna.”

Joale ho ile ha latela puo ea hoseng, e ileng ea fanoa ke setho se seng sa Sehlopha se Busang, Karl Klein, ea ileng a khetha sehlooho “Ho Hlaolela Puisano ea Bokreste.” O ile a simolla ka ho hopotsa bohle hore Jehova ke sebui se seholohali ho libui tsohle. Mor’a oa hae ea tsoetsoeng a ’notši, Logos, o ile a sebelisoa e le ’Muelli e Moholo oa Jehova, ’me o ile a bua ka thato ea Molimo le litaelo pōpong ea lefatšeng. Ha Jesu a le lefatšeng, matšoele a batho a ne a makalla tsela eo a rutang ka eona. Ho ne ho se mohla a kileng a utloa motho ea buang joaloka eena. Ho Mattheu 28:19, 20, Jesu o ile a khothalletsa barutuoa ba hae ho ba libui tse molemo ka ho ea lefatšeng, ba rute batho ba bang litaelo tsa hae le ho boela ba etsa barutuoa.

Joale, a buisana ka ho tobileng le bao e neng e tla ba baromuoa ba nakong e tlang, Moena Klein o ile a bolela hore ho na le libaka tse ’ne tseo baromuoa ba lokelang ho li hlokomela ho hlaolela tsebo e ntle ea puisano ho tsona: puisano mahareng a monna le mosali, puisano le ba bang lehaeng la baromuoa, le ba leng ofising ea lekala moo ba abetsoeng teng, le bao ba kopanang le bona tšebeletsong ea tšimo. Moena Klein o ile a re: “U qala ho bua pele u bula molomo. Boemo ba hao le boitlhopho li bolella mong’a ntlo ho hongata.” Joale o ile a fana ka mehlala e mengata ho tiisa ntlha ena ’me a phethela ka mantsoe ana: “E-bang le boikutlo bo botle. Bolokang mecha ea puisano e bulehile. Hahamallang ho ba libui tse molemo.”

Hoba ho baloe litumeliso, molula-setulo o ile a neha seithuti se seng le seng lengolo la diploma. Joale sehlopha se ile sa fana ka qeto e lebisitsoeng ho Sehlopha se Busang le lelapa la Bethele, ’me e ile ea baloa ke Paul Angerville oa Guadeloupe.

Lenaneo la thapama le ile la simolla ka Thuto ea Molula-Qhooa. Ka mor’a moo, liithuti li ile tsa fana ka lenaneo le ileng la neha bamameli monyetla oa ho bona se etsahalang phaposing ea bona ea thupelo, ho bona ’moka ea bona ea botsoalle ka liphaposing, le ho utloa liphihlelo tsa bona tse ngata tsa tšebeletso ea tšimo ha esale ba fihla Gileade likhoeling tse hlano tse fetileng. Qetelong ho bile le tšoantšiso e nang le sehlooho Ho Etsa se Lokileng Mahlong a Jehova. Batšoantši e ne e le bahoeletsi ba Phutheho ea Lyndhurst, New Jersey. Letsatsi le ile la phetheloa ka pina, eaba ho latela thapelo ka Fred Franz, mopresidente oa Mokhatlo ea lilemo li 96.

[Lebokose le leqepheng la 27]

LIPALO TSE AMANG SEHLOPHA

Lenane la linaha tse emetsoeng: 6

Lenane la linaha tseo ba abetsoeng ho tsona: 13

Lenane la baena ba masoha: 2

Lenane la banyalani: 11

Lenane la liithuti: 24

Karolelano ea lilemo: 32,7

Karolelano ea lilemo ’neteng: 14

Karolelano ea lilemo tsa tšebeletso ea nako e tletseng: 9

[Setšoantšo se leqepheng la 26]

Sehlopha se Amohelang Mangolo sa bo88 sa Sekolo sa Bibele sa Gileade sa Watchtower

Lethathameng le ka tlaase mona, mela e baloa ho tloha ka pele ho ea ka morao, ’me mabitso a thathamisitsoe ho tloha ka letsohong le letšehali ho ea ka ho le letona moleng o mong le o mong.

(1) Magney, D.; Rogers, L.; Foster, S.; Foley, R.; Untch, L.; Jonasson, G. (2) Buri, H.; Buri, B.; Krammer, M.; Hudson, D.; Underkoffler, J. (3) Angerville, P.; Olsson, M.; Jones, A.; Untch, R.; Krammer, A.; Hudson, C. (4) Foley, L.; Magney, J.; Jones, A.; Jonasson, H.; Foster, M.; Rogers, M.; Underkoffler, R.