Jehova o Utloa Mehoo ea Rōna e Tiileng ea Hore a re Thuse
THUSO e ne e hlokahala ka potlako. Seo se ne se bontšoa ke ho hlomoha ho hoholo ha sefahleho sa moqhatsetsi oa morena. Ha a botsoa hore na molato ke eng, moqhatsetsi o ile a hlalosa hore ho soaba ha hae ho bakoa ke ho etsoa ha Jerusalema le marako a eona lesupi. Joale potso e ile ea hlaha: ‘Kōpo ea hao u kōpa’ng?’ Hamorao Nehemia eo e neng e le moqhatsetsi o ile a ngola: “Eaba ke rapela Molimo oa maholimo.” Oo e ne e le mohoo o potlakileng, o khutsitseng, o entsoeng kapele bakeng sa thuso ea Jehova. ’Me phello e ile ea e-ba efe? Hang-hang Artaxerxese morena oa Persia o ile a neha Nehemia tumello ea ho tsosolosa marako a Jerusalema!—Nehemia 2:1-6.
E, Molimo o utloa likōpo tse potlakileng tsa ba o ratang. (Pesaleme ea 65:2) Kahoo haeba teko e bonahala e le khōlō hore u ka e mamella, mohlomong u ka rapela joalokaha mopesaleme Davida a ile a rapela ho Pesaleme ea 70, ha a ne a hloka thuso e potlakileng ea Molimo. Sehlooho sa pesaleme ena se bontša hore morero oa eona ke “ho hopotsa.” (NW) E pheta Pesaleme ea 40:13-17 le hoja e na le liphetoho tse nyenyane. Empa Pesaleme ea 70 e ka re thusa joang joaloka batho ba Jehova?
Kōpo ea ho Lopolloa ka Potlako
Davida o qala ka kōpo e reng: “Oho Molimo, u ke u mpoloke; Jehova, phakisa ho tla nthusa!” (Pesaleme ea 70:1) Ha re le tsietsing, re ka rapela Molimo hore o re thuse kapele. Jehova ha a re leke ka lintho tse mpe, ’me “o tseba ho loela barapeli molekong.” (2 Petrose 2:9; Jakobo 1:13) Empa ho thoe’ng haeba a lumella teko ho tsoela pele, na mohlomong o e lumella hore e tle e re rute ho hong? Joale re ka kōpa hore a re fe bohlale ba hore re sebetsane le eona ka katleho. Haeba re kōpa ka tumelo, o re fa bohlale. (Jakobo 1:5-8) Molimo o boetse o re fa matla a hlokahalang ho mamella liteko tsa rōna. Ka mohlala, o ‘re tšehetsa ha re le liphateng tsa boloetse.’—Pesaleme ea 41:1-3; Ba-Heberu 10:36.
Boetsalibe ba rōna boo re bo futsitseng, hammoho le ho pepesehela ho sa khaotseng molekong le boiteko ba Diabolose ba ho senya kamano ea rōna le Jehova, li lokela ho re susumelletsa ho rapella thuso ea Molimo letsatsi le leng le le leng. (Pesaleme ea 51:1-5; Ba-Roma 5:12; 12:12) Mantsoe ana a Jesu a thapelo ea mohlala a lokela ho eloa hloko: “U se ke ua re isa molekong; u mpe u re loele ho e mobe.” (Mattheu 6:13) E, re ka kōpa Molimo hore o se re lumelle ho inehela ha re lekoa hore re se o mamele le hore o thibele Satane, “e mobe,” ho re hlōla. Empa a re etseng hore likōpo tsa rōna tsa topollo li tsamaee hammoho le mehato ea ho qoba maemo a tla re pepesetsa molekong le marabeng a Satane ho sa hlokahale.—2 Ba-Korinthe 2:11.
Ba Reng, “Aha!”
Re ka ’na ra lekoa habohloko hobane lira li re nyatsetsa tumelo eo re nang le eona. Haeba seo se ka etsahala ho uena, nahana ka mantsoe a Davida: “Ba tsomileng bophelo ba ka ba ke ba hlajoe ke lihlong, ba ferekane; ba ntakaletsang bobe ba ke ba cheche, ba tlontlolohe. Ba ke ba khutlisoe ke ho tlontloloha, bana ba reng ka ’na: ‘Aha! Aha!’” (Pesaleme ea 70:3, 4, BPN) Lira tsa Davida li ne li batla ho ’mona a shoele; li ne li ‘batla sephefumolohi sa hae,’ kapa bophelo. Leha ho le joalo, ho e-na le hore a leke ho iphetetsa, o ne a lumela hore Molimo o tla li hlabisa lihlong. Davida o ile a rapella hore lira tsa hae li ‘hlajoe ke lihlong ’me li ferekane’—li soetsehe, li tsielehe, li ferekane, li nyahame ha li leka ho phetha merero ea tsona e khopo. E, ba batlang hore a tsoe kotsi le ba thabelang tsietsi ea hae a ba ke ba ferekane ’me ba tlotlolohe.
Haeba re ka ba le se ka bitsoang thabo ea ho lakaletsa sera sa rōna tsietsi, re tla lokela ho ikarabella ho Jehova bakeng sa sebe sa rōna. (Liproverbia 17:5; 24:17, 18) Leha ho le joalo, ha lira li nyatsa Molimo le batho ba oona, re ka rapella hore molemong oa lebitso la hae le halalelang, Jehova ‘a ba khutlise ’me ba tlotlolohe’ mahlong a batho bao ba batlang thoriso ho bona. (Pesaleme ea 106:8) Phetetso ke ea Molimo, ’me o ka ferekanya le ho tlotlolla lira tsa oona le tsa rōna. (Deuteronoma 32:35) Ka mohlala, Adolf Hitler moeta-pele oa Bonazi o ne a batla ho felisa Lipaki tsa Jehova Jeremane. O ile a hlōleha ka ho soabisang hakaakang, hobane hona joale ba likete tse ngata ho tsona ba phatlalatsa molaetsa oa ’Muso moo!
Ka nyeliso e phoqang, lira tsa rōna li ka ’na tsa re: “Aha, Aha!” Kaha ba soma Molimo le batho ba oona, baetsalibe bao a ba ke ba “khutlisoe ke ho tlontloloha,” ba hlajoe ke lihlong. Ha re ntse re rapella sena, a re bolokeng botšepehi ba rōna ’me re thabise pelo ea Jehova, hore a tle a arabe Satane leha e le mang ea Mo somang. (Liproverbia 27:11) ’Me le ka mohla ha rea lokela ho tšaba lira tsa rōna tse ikhohomosang, hobane “ea tšepang Jehova o beiloe phahameng.” (Liproverbia 29:25) Nebukadnezare morena oa Babylona ea ikhohomosang, ea neng a isitse batho ba Molimo botlamuoeng, o ile a hlajoa ke lihlong ’me o ile a tlameha ho lumela hore ‘Morena oa leholimo o na le matla a ho kokobetsa ba tsamaeang ka tsela ea boikhohomoso.’—Daniele 4:37.
“Molimo o Moholo!”
Le hoja lira li ka re bakela mathata, a re tlotliseng Jehova ka mehla hammoho le barapeli-’moho. Ho e-na le hore Davida a itumelle ho sitisoa ke mahlomola hore a tlotlise Molimo, o ile a re: “Bohle ba u batlang ba ke ba nyakalle, ba u thabele. Ba ratang ho pholosoa ke uena ba ’ne ba re: ‘Molimo o moholo!’” (Pesaleme ea 70:5, BPN) Batho ba Jehova ba tsoela pele ho thaba haholo hobane ba ‘nyakallela le ho thabela’ ho eena. Joaloka Lipaki tsa hae tse inehetseng, tse kolobelitsoeng, ba na le thabo e khōlō e tlisoang ke ho ba le kamano e haufi-ufi le eena. (Pesaleme ea 25:14) Leha ho le joalo, ba ka ’na ba talingoa joaloka batho ba batlang Molimo ba ikokobelitseng. Kaha ke balumeli ba bolokang melao ea Molimo, ba tsoela pele ba batla tsebo e eketsehileng ea oona le Lentsoe la oona.—Moeklesia 3:11; 12:13, 14; Esaia 54:13.
Ha Lipaki tsa Jehova li phatlalatsa litaba tse molemo, ha e le hantle li phehella ho re: “Molimo o moholo!” Li tlotlisa Jehova, li mo nka e le ea phahameng haholo. Ka thabo, li thusa ba batlang ’nete ho ithuta ka Molimo hammoho le ho o tlotlisa. Ho fapana le batho ba lefatše ba ratang monyaka, batho ba Jehova ‘ba rata topollo ea hae.’ (2 Timothea 3:1-5) Kaha ba hlokomela boetsalibe ba bona boo ba bo futsitseng, ba leboha haholo ka tokisetso ea Jehova Molimo e lerato ea ho lopolleloa bophelong bo sa feleng, e entsoeng hore e fumanehe ka sehlabelo sa topollo sa Mora oa hae ea ratoang, Jesu Kreste. (Johanne 3:16; Ba-Roma 5:8; 1 Johanne 2:1, 2) Na u tlotlisa Molimo le ho bontša hore u ‘rata topollo ea oona’ ka ho sebelisa borapeli ba ’nete bo mo tlisetsang thoriso?—Johanne 4:23, 24.
Tšepa Molopolli
Ha Davida a ne a itlhalosa pesalemeng ena, o ne a utloa tlhokahalo e khōlō hoo a ileng a re: “Ha e le ’na ke mohlōphehi le mofutsana: Oho, Molimo, ak’u mpotlakele. Ke uena mothusi le molopolli oa ka; oho, Morena, se liehe.” (Pesaleme ea 70:6, BPN Ps 70:5, NW) Ha re hlokofalitsoe ke liteko tse hlaselang balumeli—matšoenyeho a kang mahloriso, liteko le litlhaselo tsa Satane—re ka bonahala re le ‘mafutsana.’ Le hoja mohlomong re sa futsaneha, re bonahala re sa sireletseha khahlanong le lira tse sa tsotelleng. Leha ho le joalo, re ka kholiseha hore Jehova a ka re pholosa ebile o tla re pholosa joaloka bahlanka ba hae ba tšepahalang.—Pesaleme ea 9:17-20.
Jehova ke “molopolli” ha re hloka topollo. Mohlomong mefokolo ea rōna ke eona e re kentseng maemong a lekang. Empa haeba ‘booatla ba rōna bo khelositse tsela ea rōna,’ lipelo tsa rōna a li se ke ‘tsa hlonamela Jehova.’ (Liproverbia 19:3) A ke ke a jarisoa molato, ’me o lula a itokiselitse ho re thusa haeba re mo rapela ka tumelo. (Pesaleme ea 37:5) Ho thoe’ng haeba re loanela ho qoba sebe? Joale a re tobeng sena lithapelong, re kōpe thuso ea Molimo hore re tsoele pele re phehella tsela e lokileng. (Mattheu 5:6; Ba-Roma 7:21-25) Molimo o tla arabela lithapelo tsa rōna tse tsoang pelong, ’me re tla atleha moeeng haeba re ikokobeletsa tataiso ea moea oa hae o halalelang.—Pesaleme ea 51:17; Ba-Efese 4:30.
Ha re loana le teko ea tumelo, re ka ’na ra ikutloa hore re ke ke ra mamella ho feta moo. Kaha nama ea rōna ea boetsalibe ea fokola, e ka laba-labela topollo e potlakileng. (Mareka 14:38) Kahoo re ka rapela: “Oho, Morena, se liehe.” Haholo-holo haeba re amehile ka thohako lebitsong la Molimo, re ka ’na ra susumeletseha ho rapela joalokaha moprofeta Daniele a ile a rapela: ‘Jehova, ak’u mamele! Jehova, u tšoarele! Jehova, u ele hloko, u etse! Se liehe ka baka la hao, Molimo oa ka, sechaba sa hao se bitsitsoe ka lebitso la hao!’ (Daniele 9:19) Re ka ba le tumelo ea hore Ntate oa rōna oa leholimo a ke ke a lieha, hobane moapostola Pauluse o fane ka tiiso ena: “A re atameleng ka tšepo terone ea mohau, hore re tle re bone mohau, ’me re fumane lereko, re tle re thusoe nakong e loketseng.”—Ba-Heberu 4:16.
Le ka mohla u se lebale hore Jehova ke molopolli. Joaloka bahlanka ba hae, ho tla re tsoela molemo ho hopola sena le maikutlo a thapeli a Pesaleme ea 70. Ka linako tse ling ho ka ’na ha hlokahala hore re rapele khafetsa ka taba ea bohlokoa bo tebileng. (1 Ba-Thessalonika 5:17) Ho ka ’na ha bonahala ho se na tharollo bothateng bo itseng, ho se na tsela ea ho tsoa har’a qaka ea rōna. Empa Ntate oa rōna ea lerato oa leholimo o tla re matlafatsa ’me a ke ke a re lumella hore re lekoe ho feta kamoo re ka mamellang ka teng. Kahoo, le ka mohla u se khathale ho ea pel’a terone ea Morena oa ka ho sa Feleng ka thapelo e tsoang pelong. (1 Ba-Korinthe 10:13; Ba-Filippi 4:6, 7, 13; Tšenolo 15:3) Rapela ka tumelo, ’me u mo tšepe ka ho felletseng, hobane Jehova o utloa mehoo ea rōna e potlakileng ea hore a re thuse.