Liithuti tsa Gileade li Amohela Mpho ea Tšebeletso ea Boromuoa
KA MARCH 1, 1992, litho tse 22 tse amohetseng mangolo tsa sehlopha sa bo92 sa Sekolo sa Bibele sa Gileade sa Watchtower li ile tsa amohela mpho—e leng mpho ea tšebeletso ea boromuoa. Ha a bua le sehlopha seo, Lloyd Barry oa Sehlopha se Busang o itse: “E se eka le ka amohela mpho eo e babatsehang ka thabo e khōlō, ’me e se eka le ka e sebelisa molemong oa ho tlisetsa ba bang thabo.”
Baeti ba ka bang 4 662 ba menngoeng le litho tsa lelapa la Bethele ba ne ba bokane Holong ea Kopano e Motseng oa Jersey, New Jersey, bakeng sa lenaneo la kabo ea mangolo. Ba bang ba 970 ba neng ba le meahong ea Mokhatlo oa Watchtower e New York, Brooklyn, Wallkill, le Patterson ba ne ba hokahantsoe ka thelefono. Bohle ba ne ba mametse ka hloko ha liithuti li ntse li fuoa keletso ea ho qetela e tlang ho li thusa ho nka mpho ea tšebeletso ea boromuoa e le ea bohlokoa haholo le ho e sebelisa ka bohlale.
Lenaneo le ile la qala ka ho binoa ho mafolo-folo ha pina ea 155, “‘Le Amohelane’!” Ka mor’a moo, bohle ba ile ba ameha ha Frederick W. Franz, mopresidente oa Sekolo sa Gileade ea lilemo li 98, a etsa thapelo e tsoang pelong. Joale, molula-setulo, Carey Barber oa Sehlopha se Busang, o ile a amohela bohle lenaneong la kabo ea mangolo eaba o re: “Ha ho mohla ho kileng ha ba le tlhoko e khōlō ea baromuoa ba Gileade ho feta kajeno.” Ka mor’a litlhaloso tsa hae, o ile a suthela letoto la lipuo tse khutšoaane le tse molemo.
Curtis Johnson oa Komiti la Lehae la Bethele o ile a bua pele, a tšohla sehlooho se reng “Hlokomela Jarete ea Hao Hantle.” Moena Johnson o ile a bolela hore ha baromuoa bana ba bacha ba fihla likabelong tsa bona, e mong le e mong oa bona o tla ba le jarete ea moea eo a tla e lema. (1 Ba-Korinthe 3:9) Batho ba Jehova lefatšeng ka bophara ke jarete ea moea e hlahisang ho loka le thoriso pel’a lichaba tsohle. (Esaia 61:11) Sebui se ile sa hatisa: ‘Tsela eo u tla hlokomela jarete ea hao ea moea ka eona nakong e tlang, e tla ama katleho ea hao haholo kabelong ea hao ea boromuoa.’ Ke eng se tla ba thusa ho hlokomela jarete ea bona ea moea hantle? ‘Jehova e ka ba lekhoakhoa le sirelelitseng jarete ea hao ea moea. Haeba u ikemiselitse ho hlaolela mesebetsi e nepahetseng, ipoloke haufi le eena ka thapelo, ebe u sebetsa tumellanong le lithapelo tsa hao.’
Joale, Lloyd Barry o ile a bua tlas’a sehlooho se reng “Ithabeleng Moreneng ka Mehla.” (Ba-Filippi 4:4) Ka baka la phihlelo eo a e bokelletseng ea ho ba moromuoa ka lilemo tse fetang 25 Japane, o ile a fana ka litlhahiso tse sebetsang tse tla thusa liithuti ho thabela mpho ea tšebeletso ea boromuoa. O itse: ‘Le tla fumana hore thabo eo le nang le eona tšebeletsong ea Molimo e le thusa ho hlōla likhatello tse ngata mohlomong le mathata a mang ao le thulanang le ’ona nameng.’ (Liproverbia 17:22) O ile a hopotsa liithuti hore li ka ’na tsa thulana le maemo a fapaneng haholo le ao li a tloaetseng. Ho ka ’na ha hlokahala hore li ithute puo e ncha. ‘Le tla lokela ho sebetsa ka thata hore le ithute puo e ’ngoe. Empa ha le se le khona ho buisana le batho ka bolokolohi ka puo ea bona, sena le sona se tla tlatsetsa thabong ea lōna.’
Ho ile ha latela Eldor Timm oa Komiti ea Fektheri ’me a tšohla sehlooho se reng “Bolokang Mahlo a Lōna Moputsong.” Moputso ke ofe? Bophelo bo sa feleng! Hore re bo fumane re tlameha ho boloka mahlo a rōna a tsepame ho bona. Sebui se ile sa tšohla lintho tse ling tse tšoanang le tse fapaneng pakeng tsa Bakreste ba leng peisong ea bophelo le limathi tse tlhōlisanong ea mabelo lekholong la pele la lilemo. Joaloka limathi, Bakreste ba tlameha ho ikoetlisa ka matla, ba boloke litaelo, ’me ba itlhohlolle meroalo e ba imelang. Empa Bakreste ha ba tšoane le limathi tsa sebele kaha ba peisong ea bophelo bohle ’me ba batla moputso oa ka ho sa feleng. Ho e-na le hore ho be le a le mong ea hapang moputso, bohle ba mathang peisong ena ea bophelo ho fihlela qetellong ba tla fumana moputso. Moena Timm o ile a phetha ka ho re: ‘Hore re fumane moputso oa bophelo, re tlameha ho ba le khotso le Jehova, Mofani oa moputso. ’Me e le hore re ka ba le khotso le Jehova, re lokela ho ba le khotso le baena ba rōna.’
Milton Henschel oa Sehlopha se Busang ke eena ea ileng a latela ka ho bua tlas’a sehlooho se reng “Ka ho Tšelisoa ke Mangolo, re ba le Tšepo.” (Ba-Roma 15:4) Sebui se qalile ka ho re: ‘Likhoeling tse hlano tse fetileng, le ’nile la tšoareha ka Bibele. Le bile le katamelano e khōlō le eona. Le na le tšepo e matla. Ha le e-ea likabelong tsa lōna, ka kōpo hopolang lebaka leo ka lona tšepo ea lōna e leng matla hakana. Ke hobane le lutse haufi le Mangolo.’ Ha se bontša mohlala oa tlaleho ea Bibele e fanang ka tšepo, sebui se ile sa bua ka Baahloli likhaolo 6 ho ea ho 8, e tlalehang kamoo Gideone a ileng a rongoa ka teng hore a lopolle Iseraele khatellong ea Bamidiane. Ka mor’a ho tšohla tlaleho eo le seo e se bolelang mehleng ea rōna, se itse: ‘Ha le e-ba le monyetla oa ho atamela haufi le Mangolo le ho nahana ka lintho tsena, sena se tla le khatholla. Le tla ba le sebete.’
Bohle ba ne ba laba-labela ho utloa hore na barupeli ba ka sehloohong ba sekolo ba tla fana ka keletso efe ea ho qetela ho liithuti. Jack Redford o ile a bua pele tlas’a sehlooho se reng “Etsang se Nepahetseng.” O ile a hopotsa liithuti: ‘Gileade le koetlisitsoe ka ho phethahetseng mabapi le se nepahetseng ho latela Mangolo. Joale le ea likabelong tsa boromuoa tse nang le phephetso. ’Me rea tseba hore mohlomong le tla thulana le mathata a boima. Ho sa tsotellehe seo, ’me ho sa tsotellehe maikutlo a lōna, rea tseba hore le ka etsa se nepahetseng.’ Li tla thusoa ke eng? Tabeng ea pele, ho ba le pono e nepahetseng ka batho ba bang. Sebui se itse: ‘Le se ke la lebella phetheho ho se sa phethahalang.’ Ho ba le pono e nepahetseng ka maemo a boima le hona ho ka thusa. Se itse: ‘Kaofela ha rōna, ka linako tse ling lintho li re tsamaela hantle ’me ka linako tse ling li re tsamaela hampe. Mang le mang a ka khona ho tobana le lintho tse mo tsamaelang hantle. Tsela eo ka eona u tobanang le lintho tse sa u tsamaeleng hantle ke eona e tla bontša hore na u tla mamella tšebeletsong ea hao ea boromuoa kapa che.’—Jakobo 1:2-4.
Mongolisi oa sekolo, Ulysses Glass, o ile a khetha sehlooho se reng “Ho na le Tšepo Efe Bakeng sa Bokamoso?” Ka lentsoe la botsoali, o ile a khothalletsa liithuti ho boloka tšepo ea tsona e ntse e khanya. (Liproverbia 13:12) O ile a hlalosa: ‘U ka ’na ua se ke ua hlokomela habobebe ha u qala ho lahleheloa ke tšepo. Maemo a ka ’na a etsa hore re tšoarehe haholo lithahasellong tsa rōna ho e-na le ho tšoareha kamanong ea rōna le Molimo. Re ka ’na ra kula kapa ra ikutloa hore ba bang ha ba re tšoare hantle. Mohlomong ba bang ba ka ba le lintho tse ngata tse bonahalang ho re feta kapa mohlomong ba fumana liphello tse molemonyana tšebeletsong, ’me ka tsela e itseng re ka ’na ra ba mōna. Haeba le ka mohla re ka lumella lintho tse joalo ho re tepelletsa hanyane ka hanyane, kapele boleng ba sebele ba tšepo ea ’Muso bo tla fifala lipelong le likelellong tsa rōna, ’me re ka ba ra khaotsa ho mamella peisong ea bophelo.’ Ke’ng se ka etsoang? ‘Re tlameha ho nka khato e tiileng e le hore re ka tsosolosa tšepo ea rōna. Re tlameha ho tlatsa likelello le lipelo tsa rōna ka litšepiso tse tiileng tsa Molimo ’me re tsepamise tlhokomelo ea rōna e felletseng ho boleng ba ’nete ba ’Muso oa Molimo. ’Me re tlameha ho tsosolosa puisano ea rōna le Jehova, hobane sena kannete se tla lebisa thabong.’
Karl Klein oa Sehlopha se Busang o ile a fana ka puo ea kabo ea mangolo. Sehlooho sa hae se ne se re “Ke Hobane’ng ha u Lokela ho Ikokobetsa?” Karabelo ea potso eo ke efe? Mantsoeng a hae a qalang o hlalositse: ‘Hobane ke ntho e nepahetseng le e lokileng, ntho e bohlale le e lerato e lokelang ho etsoa.’ Bamameli ba ne ba hlolletsoe ha a ntse a tšohla mehlala e mene ea boikokobetso eo re tla beng re etsa hantle ha re e latela: (1) Jehova Molimo, eo ka sebele a neng a ikokobelitse ha a sebelisana le Abrahama le Moshe (Genese 18:22-33; Numere 14:11-21; Ba-Efese 5:1); (2) Jesu Kreste, ea ileng a ‘ikokobetsa ’me a bontša kutlo ho isa lefung thupeng ea tlhokofatso’ (Ba-Filippi 2:5-8; 1 Petrose 2:21); (3) moapostola Pauluse, ea ileng a ‘sebeletsa Morena ka boinyenyefatso bo boholo ba kelello’ (Liketso 20:18, 19; 1 Ba-Korinthe 11:1); le (4) ‘ba etelletseng pele har’a rōna,’ joaloka mopresidente oa pele oa Mokhatlo, Moena Russell, ea kileng a ngola: “Mosebetsi oo Morena a thabetseng ho sebelisa litalenta tsa rōna tse fokolang ho oona hase oo re iqapetseng oona empa e bile tsosoloso, tokiso, le momahano.” (Ba-Heberu 13:7) Moena Klein o ile a lokolisa mabaka a mang a matla a eketsehileng a ho ikokobetsa. Ruri, ho utloa keletso ea ho ikokobetsa ho tla thusa liithuti ho sebelisa mpho ea tšebeletso ea boromuoa ka bohlale!
Ka mor’a litlhaloso tseo, molula-setulo o ile a fetisa litumeliso tse tsoang likarolong tse sa tšoaneng tsa lefatše. Joale ho ne ho se ho fihlile nako ea hore liithuti li fumane mangolo a tsona a diploma. Li ne li tsoa linaheng tse supileng—Canada, Finland, Fora, Mauritius, Netherlands, Sweden, le United States. Empa likabelo tsa tsona tsa boromuoa li tla li isa linaheng tse 11—Bolivia, Estonia, Grenada, Guatemala, Honduras, Hungary, Mauritius, Peru, Togo, Turkey, le Venezuela.
Ka mor’a khefu, lenaneo la motšehare oa mantsiboea le ile la qala ka Thuto e khutsufalitsoeng ea Molula-Qhooa e fanoang ke Joel Adams oa Komiti ea Lefapha la Tšebeletso. Ka mor’a moo, liithuti li ile tsa etsa tšoantšiso ka liphihlelo tse ling tseo li bileng le tsona tšebeletsong ea tšimo nakong ea sekolo. Qetellong, tšoantšiso e reng Ke Hobane’ng ha U Lokela ho Hlompha Taolo ea Puso ea Molimo? e ile ea etsoa molemong oa ho aha bamameli ka kakaretso, ho akarelletsa le liithuti.
Kannete, liithuti tsena li ile likabelong tsa tsona tse linaheng lisele li fumane keletso le khothatso e tla li thusa ho sebelisa mpho ea tšebeletso ea boromuoa molemong oa ho tlisetsa ba bang thabo e seng tsona feela.
[Lebokose le leqepheng la 22]
Lipalo tse Amang Sehlopha
Lenane la linaha tse emetsoeng: 7
Lenane la linaha tseo li abetsoeng ho tsona: 11
Lenane-kakaretso la liithuti: 22
Karolelano ea lilemo: 33,4
Karolelano ea lilemo ’neteng: 16,7
Karolelano ea lilemo tšebeletsong ea nako e tletseng: 11,8
[Setšoantšo se leqepheng la 23]
Sehlopha se Amohelang Mangolo sa bo92 sa Sekolo sa Gileade sa Watchtower
Lethathamong le leng ka tlaase mona, mela e baloa ho tloha ka pele ho ea ka morao ’me mabitso a thathamisitsoe ho tloha ka ho le letšehali ho ea ka ho le letona moleng o mong le o mong.
(1) Chan Chin Wah, M.; Bouancheaux, N.; Chapman, B.; Östberg, A.; Cole, L.; Jackson, K.; Meerwijk, A. (2) Smith, J.; Wollin, K.; Chapman, R.; Gabour, N.; Chan Chin Wah, J.; Smith, C.; Edvik, L. (3) Bouancheaux, E.; Östberg, S.; Cole, K.; Jackson, R.; Gabour, S.; Edvik, V.; Meerwijk, R.; Wollin, G.