Ho Tšaba Bafu ho Atile

E se e le khale letsatsi le liketse. U khutlela hae moraonyana ho nako eo u neng u ka rata ho khutla ka eona. Pelo ea hao e qala ho uba ka potlako haholoanyane ha tsela eo u e nkileng e u potisa setšeng sa moo sa mabitla. Ho khutsa ho bakoang ke bosiu bo lefifi ho etsa hore u utloe lerata leha le le lenyenyane haholo. Hōjana u potlakela ho utloa molumo o hlabang, o tšosang. Ua habeletsa—pelo ea hao le eona e uba ka potlako—e le ha u potlakela ho ea sireletseha lapeng.

NA HO na le mohla u kileng ua ikutloa u tšoenyehile ha u le setšeng sa mabitla kapa ha u le haufi le sona? Haeba ho joalo, mohlomong u susumelitsoe ke khopolo e tloaelehileng lefatšeng ka bophara ea hore meea ea bafu e ka thusa ba phelang kapa ea ba ntša kotsi.

Ho hlahile meetlo e mengata ea tumela-khoela ka lebaka la tumelo ea hore bafu ba hloka thuso ea batho ba phelang kapa hore ba ka ntša batho ba phelang kotsi haeba ba sa bōpe khotso le bona. Ka mohlala, linaheng tse ling tsa Latin America, batho ba bangata ba na le moetlo oa ho haha ntlo e nyenyane e nang le sefapano moo motho a ileng a shoela teng ka kotsi. Batho ba bonesa likerese ’me ba beha lipalesa teng ka boiteko ba ho bontša hore ba thahasella moea oa motho ea shoeleng kapa ba ho mo thusa. Mabakeng a mang, ho potolosoa litlaleho tse bolelang ka lithapelo tse arabetsoeng ka “mohlolo,” e le hore batho ba qale ho etela khafetsa sebakeng sa animita, ntlo e nyenyane ea moea oa motho ea shoeleng. Mono ba etsa mandas, kapa litšepiso tsa hore haeba motho ea shoeleng o tla ba thusa hore ba finyelle kapa ba fumane ho hong ho itseng—mohlomong pheko ea mohlolo—ba tla bontša teboho ea bona ka tsela e khethehileng. Ka lehlakoreng le leng, ho ka ’na ha tlalehoa hore moea oa motho ea shoeleng o bonahala lefifing la bosiu, o tšosa batho ba leng moo. Ho tloaelehile hore meea e joalo e bitsoe hore e penando, e tšoenya batho ba phelang ka lebaka la liketsahalo tsa nako e fetileng.

Linaheng tse ngata batho ba etsa boiteko bo matla ba ho bōpa khotso le “meea” ea bafu. Ho etsoa mekete e meholo, ho nyeheloa mahlabelo, ho buuoa mantsoe a khahlisang—sena sohle e le ho leka ho thibela boiphetetso ba moea oa motho ea shoeleng. Ba nahana hore ho khutsisa moea ho tla fella ka meputso le litlhohonolofatso ho ba setseng.

Tlaleho e ’ngoe e tsoang Afrika e re: “Ba bangata ba lumela hore ha ho na ketsahalo e etsahalang ‘ka tloaelo kapa ka tlhaho.’ Ketsahalo efe kapa efe—ebang ke ho kula, tlokotsi, ho se be le bana, mathata a tsa moruo, pula e nang e sa emise kapa letsatsi le chesang haholo, likotsi, ho se utloane ha lelapa, lefu—ba nahana hore li bakoa ke meea e sa bonahaleng e nang le matla a phahametseng a motho.” Tlaleho e ’ngoe e re: “Batho ba lumela hore meea ea baholo-holo ba bona e na le sebaka seo e lulang ho sona leholimong ’me e lula e alositse beng ka eona ba phelang lefatšeng. Ho na le tumelo ea hore baholo-holo bana ba na le matla a phahametseng tlhaho, ao ba ka a sebelisang ho hlohonolofatsa le ho sireletsa beng ka bona ba lefatšeng kapa ho ba otla, ho itšetlehile ka hore na beng ka bona ba hlompha bafu kapa ba ba lahlile hakae.”

Empa na see se lumellana le Lentsoe la Molimo? Pono ea hao ke efe?

[Setšoantšo se leqepheng la 4]

“Animita” Chile