Ho Boloka Sephiri ka Lebitso La Morena
HO HLASELOA ha seporo se ka tlas’a lefatše sa Tokyo, Japane, ka khase e chefo ka March 1995 ho ile ha bolaea batho ba 12, ha kulisa ba bang ba likete, ha ba ha thusa ho senola sephiri. Sehlopha sa bokhelohi sa bolumeli se tsejoang e le Aum Shinrikyo (’Nete e Phahameng ka ho Fetisisa) ka sephiri se ne se hahile ntlo ea polokelo ea khase e chefo, bakeng sa ho e sebelisetsa ho finyella lipakane tsa sephiri.
Khoeli hamorao, ho qhoma ha bomo ho ile ha ripitla mohaho oa ’muso Oklahoma City, U.S.A., ’me ha bolaea batho ba 167. Ho ile ha bonahala eka bopaki bo bontša hore tlhaselo ena ka tsela e itseng e ne e amana le ho emisa ntho e ’ngoe le e ’ngoe ’musong ho ileng ha etsoa ke sehlotšoana sa borapeli sa Branch Davidian se leng Waco, Texas, lilemong tse peli hantle pejana. Ka nako eo litho tse ka bang 80 tsa sehlotšoana sena sa borapeli li ile tsa e-shoa. Ho qhoma hona ha bomo ho ile ha boela ha senola seo e neng e le sephiri ho batho ba bangata: Lihlopha tse ngata tse hlometseng tse hlophisitsoeng ka tsela ea sesole tse ka sebelisoang maemong a tšohanyetso hona joale lia sebetsa United States, bonyane tse ling tsa tsona li belaelloa ka hore ka sephiri li rera ho nka bohato ba ho hanyetsa ’muso.
Hamorao, ho ella bofelong ba 1995, litopo tse chesitsoeng tsa batho ba 16 li ile tsa fumanoa libakeng tsa meru pel’a Grenoble, Fora. E ne e le litho tsa Order of the Solar Temple, e leng sehlotšoana sa borapeli seo ka October 1994 ho neng ho buuoa ka sona litabeng Switzerland le Canada ha litho tsa sona tse 53 li ne li ipolaea kapa li bolaoa. Empa esita le ka mor’a koluoa ena, sehlopha sena sa bokhelohi se ’nile sa tsoela pele ka mesebetsi ea sona. Ho fihlela kajeno sepheo le lipakane tsa sona li ntse li bolokiloe e le sephiri.
Likotsi Tsa ho Boloka Sephiri sa Bolumeli
Ha ho talingoa liketsahalo tse joalo, na hoa makatsa hore ebe batho ba bangata ba belaella lihlopha tsa bolumeli? Ka sebele ha ho ea neng a ka batla ho tšehetsa mokhatlo oa sephiri—oa bolumeli kapa oo e seng oa bolumeli—o sebelisang tšepo ea hae hampe le o etsang hore a phehelle lipakane tseo a sa lumellaneng le tsona. Leha ho le joalo, batho ba ka etsa eng ho qoba ho oela lerabeng la ho ameha mekhatlong ea sephiri ea mofuta o belaetsang?
Ho totobetse hore mang kapa mang ea nahanang ka ho ba setho sa mokhatlo oa sephiri e ne e tla ba ho bohlale hore a tiisehe ka lipakane tsa oona tsa sebele. Khatello ea metsoalle kapa batho bao a ba tsebang e lokela ho thibeloa, ’me liqeto ha lia lokela ho thehoa maikutlong empa li thehoe linneteng. Hopola, ho ka etsahala hore e be motho ka boeena—eseng ba bang—ea tla biletsoa ho latsoa liphello leha e le life tse ka hlahang.
Ho latela melao-motheo ea Bibele ke mokhoa o sireletsehileng ka ho fetisisa oa ho qoba lihlopha tse kotsi tseo lipakane tsa tsona li sa bontšeng botšepehi. (Esaia 30:21) Sena se akarelletsa ho lula u sa nke lehlakore lipolotiking, ho rata ba bang, esita le lira, ho qoba “mesebetsi ea nama” le ho hlaolela litholoana tsa moea oa Molimo. Ka holimo ho tsohle, Bakreste ba ’nete ba tlameha ho se be karolo ea lefatše, esita le joalokaha Jesu e ne e se karolo ea lona, ’me tsela ena e thibela motho ho ba le karolo mekhatlong ea sephiri ea lefatše.—Bagalata 5:19-23; Johanne 17:14, 16; 18:36; Baroma 12:17-21; Jakobo 4:4.
Lipaki tsa Jehova ke liithuti tsa Bibele tse tšepahalang tse nkang tumelo ea tsona ka ho teba le tse lekang ho phela tumellanong le eona pontšeng. Lefatšeng ka bophara, li tsebahala haholo e le sehlopha sa bolumeli se ‘batlang khotso ’me se e phehella.’ (1 Petrose 3:11) Buka ea tsona ea Lipaki tsa Jehova—Baboleli ba ’Muso oa Molimo ka nepo e bontša hore: “Ho hang Lipaki tsa Jehova hase mokhatlo oa sephiri. Litumelo tsa tsona tse thehiloeng Bibeleng li hlalositsoe ka ho hlaka libukeng tseo batho bohle ba ka li fumanang. Ho phaella moo, li etsa boiteko bo khethehileng ba ho memela batho libokeng hore ba bone se etsahalang le ho mamela.”
Bolumeli ba ’nete ho hang hase sephiri. Barapeli ba Molimo oa ’nete ba rutiloe ho se pate seo ba leng sona leha e le ho pata morero oa bona e le Lipaki tsa Jehova. Barutuoa ba Jesu ba pele ba ile ba tlatsa Jerusalema ka thuto ea bona. Ba ne ba pepesa litumelo tsa bona le mosebetsi. Hoa tšoana le ka Lipaki tsa Jehova kajeno. Hoa utloahala hore ha mebuso ea khatello ka phoso e thibela bolokolohi ba borapeli, Bakreste ba tlameha hore ka hloko le ka sebete ba tsoele pele ka tšebetso ea bona, ba mamela “Molimo e le ’musi ho e-na le batho,” e leng boemo boo ba qobelloang ho bona ka lebaka la ho paka ha bona ka sebete phatlalatsa.—Liketso 5:27-29; 8:1; 12:1-14; Matheu 10:16, 26, 27.
Haeba le ka mohla u kile ua nahana hore e ka ’na eaba Lipaki tsa Jehova ke sehlotšoana sa borapeli kapa sehlopha sa bokhelohi sa sephiri, ho ka etsahala hore ebe ke hobane u ne u tseba ho honyenyane haholo ka tsona. E tlameha ebe boo e bile boemo ba ba bangata lekholong la pele la lilemo.
Liketso khaolo ea 28 e re bolella ka seboka seo moapostola Pauluse a bileng le sona Roma le “banna ba ka sehloohong ba Bajuda.” Ba ile ba re ho eena: “Re nahana hore ho loketse ho utloa ho uena hore na menahano ea hao ke efe, etsoe kannete ha e le mabapi le sehlopha sena sa bokhelohi rea tseba hore hohle ho buuoa khahlanong le sona.” (Liketso 28:16-22) Ha a arabela Pauluse “o ba hlalosetsa taba eo ka ho paka ka ho phethahetseng malebana le ’muso oa Molimo” ’me “ba bang ba qala ho lumela.” (Liketso 28:23, 24) Ka sebele ho ne ho le molemong oa bona oa ka ho sa feleng hore ba fumane linnete mabapi le Bokreste ba ’nete.
Kaha li inehetse tšebeletsong ea Molimo ea phatlalatsa, Lipaki tsa Jehova li tla thabela ho senola linnete tse totobetseng tsa mosebetsi le litumelo tsa tsona ho e mong le e mong ea thahasellang ho tseba linnete. Ke hobane’ng ha u sa iketsetse lipatlisiso, ka tsela eo u be boemong ba ho ba le tsebo e nepahetseng ka tumelo ea tsona?
[Setšoantšo se leqepheng la 6]
Lipaki tsa Jehova li thabela ho senola seo li leng sona le seo li se etsang