O Ile a Thusa ho Jala Leseli “ho Isa Pheletsong ea Lefatše”
MOAPOSTOLA PAULUSE o ile a sebelisetsoa ho jala leseli “ho isa pheletsong ea lefatše.” Ka lebaka leo, ba bangata ba “neng ba e-na le tšekamelo e nepahetseng bakeng sa bophelo bo sa feleng ea e-ba balumeli.”—Liketso 13:47, 48; Esaia 49:6.
Takatso e matla ea ho jala leseli la moea e ne e boetse e totobetse bophelong ba boinehelo le boitekong bo sa khaotseng ba Bokreste ba William Lloyd Barry, setho sa Sehlopha se Busang sa Lipaki tsa Jehova. Mor’abo rōna Barry o shoele ka la 2 July, 1999, a ntse a fana ka puo kopanong ea setereke eo a neng a nkile karolo ho eona Hawaii.
Lloyd Barry o hlahetse New Zealand ka la 20 December, 1916. E ne e le nako ’mè oa hae le ntate oa hae ba ile ba e-ba le thahasello ea sebele linneteng tsa Bibele tse neng li le ho lingoliloeng tsa C. T. Russell, tse neng li ajoa ke Watch Tower Bible and Tract Society. Kahoo, Mor’abo rōna Barry o hōletse lelapeng la Bokreste le inehetseng.
Le hoja a ne a thahasella lipapali le thuto, a bile a e-na le lengolo la degree saenseng, Mor’abo rōna Barry o ile a lula a lebisitse tlhokomelo e matla linthong tsa moea. Kahoo, ka la 1 January, 1939, o ile a kenela tšebeletso ea nako e tletseng, ea e-ba setho sa lelapa la Bethele ofising ea Mokhatlo ea Australia. Ka mor’a hore ’muso o thibele Mokhatlo ka 1941, Mor’abo rōna Barry o ile a lula a tšoarehile mosebetsing oa ofisi, ka linako tse ling a bile a abeloa ho ngola boitsebiso bo khothatsang balumeli-’moho le eena. Hape e bile mohlala ketello-peleng ea tšebeletso ea phatlalatsa.
Ka February 1942, Mor’abo rōna Barry o ile a nyala mosebeletsi e mong oa nako e tletseng. Mosali oa hae ea lerato, Melba, o sebelelitse haufi le eena ka botšepehi ka lilemo tsena tsohle likarolong tse ngata tsa lefatše. Ba ile ba nka bohato bo boholo ba ho sebeletsa masimong a linaha tse ling ka ho ba karolo ea sehlopha sa bo11 sa Sekolo sa Bibele sa Gileade sa Watchtower se United States. Kabelo ea bona e ile ea e-ba moo ba bangata ba neng ba ka nka e le “pheletsong ea lefatše”—Japane. Ka mor’a ho fihla moo ka November 1949, ba ile ba qala ho sebeletsa e le baromuoa motseng oa Kobe o pel’a kou ea leoatle. Ka nako eo, ke batho ba 12 feela ba neng ba bolela litaba tse molemo Japane. Mor’abo rōna Barry o ile a ithuta puo le mekhoa ea lehae lena la hae le lecha ’me a hlaolela lerato le tebileng bakeng sa Majapane, ao a ileng a sebetsa le ’ona ka lilemo tse latelang tse 25. Lerato la hae bakeng sa ba “neng ba e-na le tšekamelo e nepahetseng bakeng sa bophelo bo sa feleng” le ile la totobala ho hōleng ha mokhatlo oa bara ba motho ba Bakreste Japane, la mo thusa ho atleha ho lebela lekala leo ka lilemo tse mashome.
Bohareng ba 1975, ha ho ne ho e-na le Lipaki tse ka bang 30 000 Japane, ba ha Barry ba ile ba isoa Brooklyn, New York. E le Mokreste ea tlotsitsoeng ka moea, Mor’abo rōna Barry o ile a memeloa ho sebeletsa e le setho sa Sehlopha se Busang sa Lipaki tsa Jehova. (Baroma 8:16, 17) Phihlelo ea hae ea bongoli e ile ea e-ba molemo haholo mosebetsing oa hae o mocha Lefapheng la Bongoli. ’Me phihlelo ea hae ea ho sebetsa lekaleng le linaheng tse ling ka nako e telele e ile ea mo hlomella hore a phethe karolo ea bohlokoa e le setho sa Komiti e Hatisang ea Sehlopha se Busang.
Ho theosa le lilemo, Mor’abo rōna Barry o ile a lula a rata Bochabela le batho ba teng. Liithuti tsa Sekolo sa Gileade hammoho le litho tsa lelapa la Bethele li ne li ka tiiseha hore lipuo tsa hae le litlhaloso li ne li tla lebisa tlhokomelo lipaleng tse thobang pelo tse buang ka ba bangata ba ’nileng ba etsa mosebetsi oa boromuoa. Mesebetsi ea boboleli ba ’Muso “pheletsong ea lefatše” e ne e phela ha Mor’abo rōna Barry a ne a pheta liphihlelo tsa hae ka cheseho. Ho buuoe ka tse ling tsa tsona tlalehong ea hae e hatisitsoeng ho Molula-Qhooa (oa Senyesemane) oa September 15, 1960.
Re kholisehile hore kaha ke ‘mojalefa hammoho le Kreste,’ thahasello ea Mor’abo rōna Barry ho ba ‘nang le tšekamelo e nepahetseng bakeng sa bophelo’ e tla tsoela pele. Ka sebele, bohle ba neng ba mo tseba le ho mo rata e le monna oa moea, ea inehetseng ka ho feletseng ho Jehova le ea nang le lerato le mofuthu bakeng sa batho ba Molimo, ba tla mo hloloheloa. Empa, re thabela hore ebe Mor’abo rōna Barry o mameletse ka botšepehi ho fihlela qetellong ea tsela ea hae ea lefatšeng.—Tšenolo 2:10.
[Setšoantšo se leqepheng la 16]
Lloyd Barry le John Barr ha ho ne ho lokolloa “Insight on the Scriptures” ka 1988
[Setšoantšo se leqepheng la 16]
Ba abetsoeng mangolo sehlopheng sa bo11 sa Gileade, ba kopana Japane ka mor’a lilemo tse 40