Re Mofuta o Nang le Tumelo
Ho Fana ka Molaetsa oa Matšeliso Italy
JEHOVA ke “Molimo oa matšeliso ’ohle.” Ka ho ithuta ho mo etsisa, bahlanka ba hae ba “khona ho tšelisa ba mofuteng leha e le ofe oa matšoenyeho.” (2 Bakorinthe 1:3, 4; Baefese 5:1) Ena ke e ’ngoe ea lipakane tse ka sehloohong tsa mosebetsi oa ho bolela o etsoang ke Lipaki tsa Jehova.
Ho Thusa Mosali ea Hlokang
Haholo-holo lilemong tsa morao tjena bofutsana, ntoa le takatso ea ho phela hamolemo li susumelitse ba bangata ho fallela linaheng tse ruileng haholoanyane. Empa ha ho bonolo ho tloaela tikoloho e ncha. Manjola o ne a lula le Maalbania a habo Borgomanero. Kaha o ne a lula Italy ntle le tumello ea molao, o ile a qeaqea ho bua le Wanda, eo e leng e mong oa Lipaki tsa Jehova. Leha ho le joalo, Wanda o ile a qetella a entse tokisetso ea ho teana le Manjola, eo kapele a ileng a bontša thahasello e khōlō ea ho ithuta Lentsoe la Molimo, le hoja ho se bue puo e le ’ngoe ho ne ho etsa hore sena se be thata. Leha ho le joalo, ka mor’a ho mo etela ka makhetlo a seng makae, Wanda o ne a se a sa fumane motho lapeng. Ho ne ho etsahetse eng? Wanda o ile a utloa hore bohle ba neng ba lula ntlong eo ba ne ba balehile hobane e mong oa bona—e leng mohlankana oa Manjola—o ne a batloa ka lebaka la ho bolaea!
Ka mor’a likhoeli tse ’nè, Wanda o ile a boela a teana le Manjola. Wanda oa hopola: “Kaha o ne a le moputsoa a bile a otile, o ne a bonahala joaloka motho ea hlileng a pulufaletsoeng.” Manjola o ile a hlalosa hore eo e neng e le mohlankana oa hae o ne a le teronkong le hore metsoalle eo a ileng a retelehela ho eona bakeng sa thuso e ile ea mo soetsa haholo. Ka lebaka la ho tlalloa ke nōka, o ile a kōpa thuso ho Molimo ka thapelo. Eaba o hopola Wanda, ea neng a ile a bua le eena ka Bibele. Manjola o ile a thaba hakaakang ha a mo bona hape!
Ho ile ha qalisoa thuto ea Bibele bocha, ’me kapele Manjola o ile a qala ho ba teng libokeng tsa Bokreste. O ile a atleha ho fumana tumello ea molao ea ho lula Italy. Ka mor’a selemo, Manjola e ile ea e-ba Paki e kolobelitsoeng. Ka lebaka la ho tšelisoa ke litšepiso tsa bomolimo, o khutletse Albania ho ea kopanela molaetsa oa Bibele o tšelisang le batho ba habo.
Ho Paka Kampong ea Bajaki
Liphutheho tse ngata tsa Italy li entse litokisetso tsa ho pakela bajaki ba kang Manjola. Ka mohlala, phutheho e ’ngoe ea Florence e ile ea etsa litokisetso tsa ho etela kampo e ’ngoe ea bajaki kamehla. Baahi ba kampo ena—bao boholo ba bona bo tsoang Europe Bochabela, Macedonia le Kosovo—ba ne ba e-na le mathata a sa tšoaneng. Ba bang ba ne ba e-na le mathata a bakoang ke lithethefatsi le tahi. Boholo ba bona bo ne bo iphelisa ka ho utsoa lintho tse nyenyane.
Ho bolela sechabeng sena ke phephetso. Leha ho le joalo, ’moleli oa nako e tletseng ea bitsoang Paola o ile a qetella a teane le Jaklina, mofumahali e mong oa Macedonia. Ka mor’a ho buisana ka makhetlo a seng makae, Jaklina o ile a khothalletsa motsoalle oa hae Susanna ho ithuta Bibele. Susanna le eena o ile a bua le beng ka eena ba bang. Kapele, litho tsa lelapa la hae tse hlano li ile tsa ithuta Bibele kamehla, tsa e-ba teng libokeng tsa Bokreste, tsa ba tsa sebelisa seo li neng li ithuta sona. Ho sa tsotellehe mathata ao ba tlamehang ho talimana le ’ona, ba fumana matšeliso ho Jehova le Lentsoeng la hae.
Moitlami o Amohela Matšeliso a Tsoang ho Jehova
Toropong ea Formia, ’moleli e mong oa nako e tletseng ea bitsoang Assunta o ile a buisana le mosali e mong ea neng a tsamaea ka thata. Mosali eo e ne e le moitlami oa sehlopha sa bolumeli se thusang ba kulang le ba fokolang ’meleng ba leng lipetlele le malapeng.
Assunta o ile a re ho moitlami enoa: “Le uena u utloa bohloko, na ha ho joalo? Ho utloisa bohloko hore ebe kaofela re na le mathata ao re lokelang ho a mamella.” Ha a utloa seo, moitlami enoa o ile a bokolla ’me a hlalosa hore o kula haholo. Assunta o ile a mo khothatsa, a bolela hore Molimo oa Bibele a ka mo tšelisa. Moitlami enoa o ile a amohela limakasine tse thehiloeng Bibeleng tseo Assunta a ileng a mo fa tsona.
Moqoqong oa bona o latelang, moitlami enoa eo lebitso la hae e leng Palmira, o ile a lumela hore o mahlomoleng a maholo. O ne a ile a lula lehaeng la baitlami ka nako e telele. O ile a tlameha ho tloha ka nakoana ka lebaka la ho kula, empa ha aa ka a lumelloa ho khutla. Leha ho le joalo, Palmira o ne a e-na le maikutlo a hore o tlamelletsoe ho Molimo ke likano tseo a neng a li entse. O ile a retelehela ho bafolisi bakeng sa “phekolo” empa o ne a sithabelitsoe ke seo a fetileng ho sona. Palmira o ile a lumela ho ithuta Bibele, ’me o ile a ba teng libokeng tsa Bokreste ka nako e etsang selemo. Eaba o fallela sebakeng se seng, ’me Paki ea se ke ea hlola e teana le eena. Ho ile ha feta lilemo tse peli pele Assunta a mo fumana hape. Palmira o ile a hanyetsoa haholo ke lelapa labo le baruti. Leha ho le joalo, o ile a qala ho ithuta Bibele hape, a tsoela pele moeeng, ’me a kolobetsoa ea e-ba e mong oa Lipaki tsa Jehova.
E, ba bangata ba khothatsoa ke molaetsa oa ‘Molimo ea fanang ka matšeliso.’ (Baroma 15:4, 5) Kahoo, Lipaki tsa Jehova tsa Italy li ikemiselitse ho tsoela pele ho etsisa Molimo ka ho bolella ba bang molaetsa oa hae oa matšeliso o babatsehang.