Josiase ea Ikokobelitseng o Ile a Ratoa ke Jehova

E TLAMEHA ebe Khosana Josiase oa Juda ea lilemo li hlano o tšohile. ’Mè oa hae Jedida o bofifing. Jedida o llisoa ke lefu la ntate-moholo oa Josiase, e leng Morena Manase.—2 Marena 21:18.

Joale Amone, ntat’a Josiase, e tla ba morena oa Juda. (2 Likronike 33:20) Ka mor’a lilemo tse peli (ka 659 B.C.E.), Amone o bolaoa ke bahlanka ba hae. Batho ba bolaea balotsana bana ’me ba etsa Josiase e monyenyane morena. (2 Marena 21:24; 2 Likronike 33:25) Pusong ea Amone, Josiase o ne a tloaelane le monko oa libano o neng o tlala hohle Jerusalema ka lebaka la lialetare tse ngata tse holim’a marulelo tseo batho ba neng ba khumamela melimo ea bohata ho tsona. Baprista ba bahetene ba ne ba ee ba bonoe ba leba koana le koana, ’me barapeli—esita le ba neng ba bolela hore ba rapela Jehova—ba ne ba ikana ka molimo Malkame.—Sofonia 1:1, 5.

Josiase oa tseba hore Amone o ile a etsa bokhopo ka ho rapela melimo ea bohata. Morena e monyenyane oa Juda le eena o utloisisa hamolemo liphatlalatso tsa moprofeta oa Molimo, Sofonia. Ha Josiase a le lilemo li 15 (ka 652 B.C.E.), o selemong sa borobeli sa puso ea hae ’me o ikemiselitse ho ela hloko mantsoe a Sofonia. Josiase o qala ho batla Jehova boshemaneng ba hae.—2 Likronike 33:21, 22; 34:3.

Josiase o Qala ho Nka Bohato!

Ho feta lilemo tse ’nè ’me Josiase o qala ho felisa bolumeli ba bohata Juda le Jerusalema (ka 648 B.C.E.). O pshatla litšoantšo, lipalo tse halalelang le lialetare tsa libano tse sebelisoang borapeling ba Baale. Litšoantšo tsa melimo ea bohata li siloa hore e be phoofo eo ka mor’a moo e qhalloang mabitleng a ba neng ba li etsetsa mahlabelo. Lialetare tse neng li sebelisetsoa borapeli bo litšila lia silafatsoa ebe lia qhaqhoa.—2 Marena 23:8-14.

Josiase o ne a ntse a hloekisa ka ho feletseng ha Jeremia, mora oa moprista oa Molevi, a e-tla Jerusalema (ka 647 B.C.E.). Jehova Molimo o khethile Jeremia e monyenyane ho ba moprofeta oa hae, ’me o bolela molaetsa oa Jehova khahlanong le bolumeli ba bohata ka matla a makaakang! Morena enoa e monyenyane, Josiase, o ne a batla a lekana le Jeremia. Leha ho le joalo, ho sa tsotellehe ho hloekisa ha Josiase ka sebete le liphatlalatso tsa Jeremia tse bontšang ho hloka tšabo, batho ba ile ba khutlela borapeling ba bohata ka potlako.—Jeremia 1:1-10.

Ho Sibolloa Ntho ea Bohlokoahali!

Ho feta lilemo tse hlano. Josiase ea lilemo li 25 o ’nile a busa ka lilemo tse ka bang 18. O bitsa mongoli, e leng Shafane; ramotse, e leng Maaseia; le motlalehi, e leng Jooa. Morena o laela Shafane: ‘Bolella Hilkia, moprista e moholo, hore a nke lichelete tseo balebeli ba tempele ba li nkileng ho sechaba; a li bee matsohong a basebetsi, e le hore ba tle ba lokise likheo tsa ntlo ea Jehova.’—2 Marena 22:3-6; 2 Likronike 34:8.

Ho tloha esale hoseng, ba lokisang tempele ba sebetsa ka khothalo. Ka sebele Josiase o leboha Jehova hore ebe basebetsi ba lokisa tšenyo eo ba bang ba baholo-holo ba hae ba khopo ba ileng ba e etsa ntlong ea Molimo. Ha mosebetsi o ntse o tsoela pele, Shafane a tla tlaleha. Empa o tšoere’ng? Ka sebele, o tšoere moqolo! O hlalosa hore Moprista ea Phahameng Hilkia o fumane “buka ea molao oa Jehova e fanoeng ka letsoho la Moshe.” (2 Likronike 34:12-18, NW) Ho sibolotsoe ntho e kaakang—eo ho seng pelaelo ea hore ke kopi ea pele ea Molao!

Josiase o labalabela ho utloa lentsoe le leng le le leng la buka ena. Ha Shafane a ntse a bala, morena o leka ho bona kamoo taelo ka ’ngoe e sebetsang kateng ho eena le ho sechaba. Haholo-holo o khahloa ke tsela eo ka eona buka ena e totobatsang borapeli ba ’nete kateng le ho bolela esale pele likotlo le botlamuoa tse neng li tla tla haeba sechaba se ne se kopanela bolumeling ba bohata. Joale ha a hlokomela hore hase litaelo tsohle tsa Molimo tse phethiloeng, Josiase o hahola liaparo tsa hae ’me o fa Hilkia, Shafane le ba bang taelo ena: “Le mpotsetse Jehova, . . . holim’a litaba tsa buka ena . . . etsoe Jehova a re halefetse haholo ka baka la hobane bo-ntat’a rōna ha ba ka ba mamela litaba tsa buka ena.”—2 Marena 22:11-13; 2 Likronike 34:19-21.

Ho Fetisoa Lentsoe la Jehova

Eaba manģosa a Josiase a ea Jerusalema ho Hulda moprofeta oa mosali ’me a khutla le tlaleho. Hulda o fetisitse lentsoe la Jehova, a bontša hore litlokotsi tse tlalehiloeng bukeng e sa tsoa fumanoa li tla oela sechaba seo sa bakoenehi. Leha ho le joalo, ka lebaka la ho ikokobetsa ka pel’a Jehova Molimo, Josiase a ke ke a oeloa ke tlokotsi ena. O tla orohela ho baholo-holo ba hae ’me a isoe lebitleng ka khotso.—2 Marena 22:14-20; 2 Likronike 34:22-28.

Na boprofeta ba Hulda bo ne bo nepahetse, kaha Josiase o ile a shoela ntoeng? (2 Marena 23:28-30) E, hobane “khotso” eo a ileng a isoa lebitleng ka eona e fapane le “tlokotsi” e neng e tla tlela Juda. (2 Marena 22:20, NW; 2 Likronike 34:28, NW) Josiase o ile a shoa pele tlokotsi ea 609-607 B.C.E. e fihla, ha Bababylona ba ne ba thibella Jerusalema le ho e timetsa. ‘Hore motho a orosetsoe ho baholo-holo ba hae’ ha ho hlile ha ho qhelele ka thōko ho shoa lefu le mabifi. Polelo e tšoanang le eo e sebelisitsoe mabapi le lefu le mabifi le le seng mabifi.—Deuteronoma 31:16; 1 Marena 2:10; 22:34, 40.

Borapeli ba ’Nete bo Tsoela Pele

Josiase o bokella sechaba sa Jerusalema tempeleng ’me o se balla “taba tsohle tsa buka ea selekane” e neng e fumanoe ka tlung ea Jehova. Joale o etsa selekane sa “ho latela Jehova, le sa ho boloka litaelo tsa hae, le likahlolo tsa hae, le melao ea hae, ka pelo eohle le ka moea oohle, le sa ho etsa le ka taba tsa selekane tse ngoliloeng bukeng eo.” Sechaba sohle se ema selekaneng seo.—2 Marena 23:1-3.

Joale Morena Josiase o qalisa phutuho e ’ngoe eo ka ho totobetseng e leng matla haholoanyane khahlanong le borapeli ba litšoantšo. Khoebo ea baprista ba Juda ba melimo esele ea oa. Baprista ba Balevi ba keneletseng borapeling bo litšila ba lahleheloa ke tokelo ea bona ea ho sebeletsa aletareng ea Jehova, ’me libaka tse phahameng tse ahiloeng nakong ea puso ea Morena Solomone li etsoa tse sa tšoaneleng borapeli. Tlhoekiso ena e boetse e akarelletsa sebaka sa pele sa meloko e leshome ea ’muso oa Iseraele, oo pejana o ileng oa lihuoa ke Baassyria (ka 740 B.C.E.).

Phethahatsong ea mantsoe ao “monna oa Molimo” ea sa boleloang ka lebitso a a buileng lilemong tse 300 pejana, Josiase o chesa masapo a baprista ba Baale aletareng eo Morena Jeroboame oa I a e hahileng Bethele. Ho qhaqhoa libaka tse phahameng tse moo le metseng e meng, ’me baprista ba rapelang litšoantšo ba etsoa sehlabelo hona lialetareng tseo ba neng ba sebeletsa ho tsona.—1 Marena 13:1-4; 2 Marena 23:4-20.

Ho Tšoaroa Paseka e Khōlō

Molimo o tšehetsa liketso tsa Josiase ha a ntšetsa pele borapeli bo hloekileng. Hafeela a ntse a phela, morena o tla leboha Molimo ka hore ebe sechaba ‘ha sea ka sa kheloha tšebeletso ea Jehova, Molimo oa bo-ntat’a sona.’ (2 Likronike 34:33) Josiase a ka lebala joang ketsahalo e tsotehang e ileng ea etsahala selemong sa bo18 sa puso ea hae?

Morena enoa o laela sechaba: “Etsetsang Jehova, Molimo oa lōna, Paseka, joalo ka ha ho ngoliloe bukeng ena [e sa tsoa fumanoa] ea selekane.” (2 Marena 23:21) Josiase o thabela ho bona karabelo e ntle. Bakeng sa mokete ona, eena ka boeena o fana ka liphoofolo tse 30 000 tsa Paseka le likhomo tse 3 000. Ke Paseka e kaakang! Ka linyehelo, litokisetso tse reriloeng hantle, le palo ea barapeli, e feta Paseka efe kapa efe e kileng ea tšoaroa ho tloha mehleng ea moprofeta Samuele.—2 Marena 23:22, 23; 2 Likronike 35:1-19.

A Lleloa Haholo Lefung

Lilemong tsohle tse 31 tsa puso ea hae (e leng 659-629 B.C.E.), Josiase o busa e le morena ea molemo. Ho ella qetellong ea puso ea hae, o hlokomela hore Faro Neko o rera ho feta le Juda ha a il’o thibella mabotho a ntoa a Babylona ka tsela eo a thusa morena oa Assyria Karkemishe e Nōkeng ea Eufrate. Ka lebaka le sa boleloang, Josiase oa tsoa ho ea loantša Egepeta. Neko o romela manģosa ho eena, o re: “Lesa, uena, ho hanela Molimo o nang le ’na, e se re oa u timetsa.” Empa Josiase oa ikhakanya ’me o leka ho khutlisa Baegepeta Megido.—2 Likronike 35:20-22.

Ke bomalimabe bo bokaakang bakeng sa morena oa Juda! Eaba lira tse sebelisang liqha li mo otla botsekeng, eaba o re ho bahlanka ba hae: “Ntloseng, hobane ke hlabiloe habohloko.” Ba tlosa Josiase koloing ea hae ea ntoa, ba mo kenya ka ho e ’ngoe, ba leba Jerusalema. Ha ba le moo kapa ba le tseleng e eang motseng, Josiase o nehela moea. Tlaleho e bululetsoeng e re: “A shoa, a patoa mabitleng a bo-ntat’ae, ’me ba-Juda le ba Jerusalema kaofela ba mo llela.” Jeremia a mo binela koli-ea-malla, ’me morena a rokoa liketsahalong tse khethehileng ka mor’a moo.—2 Likronike 35:23-25.

E, Morena Josiase o ile a etsa phoso e utloisang bohloko ha a ne a loantša Baegepeta. (Pesaleme ea 130:3) Leha ho le joalo, boikokobetso ba hae le ho tiea ha hae borapeling ba ’nete li ile tsa etsa hore Molimo a mo amohele. Bophelo ba Josiase bo bontša hamolemo hakaakang hore Jehova o rata bahlanka ba hae ba inehetseng ba lipelo li ikokobelitseng!—Liproverbia 3:34; Jakobo 4:6.

[Setšoantšo se leqepheng la 29]

Morena Josiase e monyenyane o ile a batla Jehova ka tieo

[Setšoantšo se leqepheng la 31]

Josiase o ile a qhaqha libaka tse phahameng ’me a ntšetsa pele borapeli ba ’nete