“Thuso ea ka e Tsoa ho Jehova”

Ke Masoha Ebile ba Khotsofetse Tšebeletsong ea Jehova

MOSALI e mong oa Spain o itse: “Bongata ba rōna re thabile ka ho feletseng le hoja re se lenyalong.” Lebaka la ho khotsofala ha hae ke lefe? “Rea thaba hore ebe re lokolohile matšoenyehong a mangata e le hore re ka sebeletsa Molimo oa rōna, Jehova, ka botlalo.”

Maikutlo ana a lumellana le seo Lentsoe la Molimo le se buang ka bosoha. Ha moapostola Pauluse a ne a bua ka litaba tse amanang le lenyalo, o ile a fana ka tlhokomeliso ena e latelang e bululetsoeng: “Ke re ho batho ba seng lenyalong le bahlolohali, ho molemo bakeng sa bona hore ba lule kamoo ’na ke leng kateng.” Pauluse ka boeena o ne a sa nyala. Empa o ile a re o buella bosoha ka lebaka lefe? O ile a bontša hore motho ea lenyalong o arohane, empa monna kapa mosali oa lesoha “o tšoenyeha ka lintho tsa Morena.” (1 Bakorinthe 7:8, 32-34) Ho sebeletsa Jehova ke lona lebaka le ka sehloohong le etsang hore lesoha le thabe le ho khotsofala.

Ho ba Lesoha ka Sepheo se Setle

Mantsoe a Pauluse a ka ’na a makatsa batho litsong tseo ho tsona lenyalo le ho ba le lelapa li nkeloang holimo. Leha ho le joalo, Jesu Kreste—eo eena ka boeena e neng e le lesoha empa a thabile a bile a khotsofetse—o ile a bolela sepheo se setle seo Bakreste ba masoha ba nang le sona. O itse: “Ho na le maqhalaha a ikentseng maqhalaha ka lebaka la ’muso oa maholimo. Ea ka e etsetsang sebaka a ke a e etsetse sebaka.”—Matheu 19:12.

Tumellanong le mantsoe ao, ba bangata ba fumane hore bosoha bo ba lumella ho sebeletsa Molimo ntle ho litšitiso tsa bophelo ba lenyalo. (1 Bakorinthe 7:35) Bakreste ba likete ba rapela Jehova ba thabile ntle ho molekane oa lenyalo, ’me ba thabela ho thusa ba bang ka ho ba etsetsa lintho tse itseng.a

Bakreste ba bangata ba masoha baa elelloa hore batho ba lenyalong hase bona feela ba thabileng le hore hase masoha ’ohle a sa thabang. Lihlopheng tsena ka bobeli, ka linako tse ling, ba bang ba ba le thabo hammoho le mesarelo. Ha e le hantle, ka ho utloahalang Bibele e re lenyalo ka bolona le baka “matšoenyeho nameng.”—1 Bakorinthe 7:28.

Ho ba Lesoha ka Lebaka la Maemo

Ba bangata ke masoha eseng kahobane ba rata empa ka lebaka la maemo. Ba ka ’na ba lakatsa mofuthu, botsoalle le lerato le ka fumanoang tokisetsong ea lenyalo. Leha ho le joalo, ho ba bang, chelete kapa mabaka a mang a ka ’na a ba thibela ho kenela lenyalo hona joale. Bakreste ba bang—bao boholo ba bona e leng baralib’abo rōna ba ratehang ba moea—ba lutse e le masoha kahobane ba ikemiselitse ho mamela keletso ea Bibele ea ho nyala “feela Moreneng.” (1 Bakorinthe 7:39) Ka botšepehi ba batla molekane oa lenyalo feela har’a barapeli ba Jehova ba inehetseng, le ba kolobelitsoeng.

Ka linako tse ling, ba bang ba bona ba jeoa ke bolutu. Mokreste e mong oa lesoha, ka mor’a ho bolela hore o ikutloa ka tsela ena, o ile a re: “Re tseba molao oa Jehova ’me ha re batle ho soabisa Jehova ka tsela leha e le efe. Ho ka etsahala hore ebe re batla botsoalle ba molekane, empa ho sa tsotellehe hore na batho lefatšeng ba leka hakae ho re ‘ratela batho ba bang,’ re eme re tiile. Ha re batle le ho ba har’a banna kapa basali ba sa lumelang.” Bakreste bao ba lokela ho babatsoa ka ho sebelisa keletso ea Bibele le ka ho boloka litekanyetso tse phahameng tsa boitšoaro e le hore ba khahlise Jehova ho sa tsotellehe khatello leha e le efe ea maikutlo eo ba ka ’nang ba e-ba le eona.

Molimo o Thusa Haholo

Jehova oa tšepahala ho ba tšepahalang ho eena litabeng tse kang ho se nyalane le batho ba sa mo sebeletseng. Ka lebaka la phihlelo eo a bileng le eona, Morena Davida o ne a ka fana ka bopaki bona: “Ho ea tšepahalang [Jehova] u tla etsa ka botšepehi.” (Pesaleme ea 18:25) ’Me Molimo o fana ka tšepiso e latelang ho ba mo mamelang ka botšepehi: “Ho hang nke ke ka u tlohela kapa ka u furalla.” (Baheberu 13:5) Re ka etsisa Jehova ka ho babatsa ka bolokolohi Bakreste ba masoha ba lilemo tsohle ba khomarelang Lentsoe la Molimo ka botšepehi. Hape re ka rapella hore Jehova a ba matlafaletse ho tobana le mathata a bona.—Baahloli 11:30-40.

Bakreste ba bangata ba masoha ba fumane hore ho kopanela ka botlalo mosebetsing oa ho ruta Bibele ho etsa hore bophelo ba bona bo be le morero. Ka mohlala, nahana ka Patricia, mosali ea sa nyaloang ea lilemong tsa bo-30 ebile e le pula-maliboho, kapa moevangeli oa nako e tletseng. O re: “Le hoja ho ba lesoha ho tlisa liteko tse ngata, ho mphile monyetla oa ho ba pula-maliboho oa kamehla. Kaha ke lesoha, kemiso ea ka e tenyetseha haholoanyane, ’me seo se mpha nako e eketsehileng ea ho ithuta. Hape ke ithutile ho itšetleha haholoanyane ka Jehova, haholo-holo linakong tse boima.”

Maikutlo ana a thehiloe tšepisong ena e latelang e khothatsang ea Bibele: “Rōlela tsela ea hao ho Jehova, u itšetlehe ka eena, ’me o tla nka bohato.” (Pesaleme ea 37:5) Ka sebele, barapeli bohle ba Jehova ba tšepahalang, ebang ba lenyalong kapa ke masoha, ba ka fumana matšeliso le matla mantsoeng a latelang a bululetsoeng: “Thuso ea ka e tsoa ho Jehova.”—Pesaleme ea 121:2.

[Mongolo o botlaaseng ba leqephe]

[Ntlha e Qolotsoeng e leqepheng la 9]

“Monna ea sa nyalang o tšoenyeha ka lintho tsa Morena, kamoo a ka fumanang kamohelo ea Morena.”—1 BAKORINTHE 7:32

[Lebokose le leqepheng la 8]

HO ETSA HORE BOSOHA EBE BO PUTSANG

Jesu, eo ho seng mohla a kileng a nyala, o ile a re: “Lijo tsa ka ke hore ke etse thato ea ea nthomileng le hore ke qete mosebetsi oa hae.”—Johanne 4:34.

Barali ba bane ba Filipi ba masoha ba ne ba tšoarehile ka ho “profeta.”—Liketso 21:8, 9.

Baralib’abo rōna ba Bakreste ba masoha ba bolelang molaetsa oa ’Muso ke karolo ea ‘lebotho le leholo la basali ba bolelang litaba tse molemo.’—Pesaleme ea 68:11.