Ha U Nyahame

’Mè Adriana oa Brazil o ne a e-na le khatello ea maikutlo e etsang hore a lule a koatile. O ile a re: “Ha ho ntho e bohloko joaloka eo. Ke ile ka qeta le maikutlo a ka hore ke ipolaee.”

NA U KILE oa ikutloa u nyahame hoo u seng u sa batle ho phela? Haeba ho joalo, u tla utloisisa hantle hore na ’mè Adriana o ne a ikutloa joang. O ne a lula a nyahame habohloko, a sa thaba a bile a utloa eka ho felile ka eena.

Mohlala o mong ke oa ntate Kaoru oa Japane ea neng a hlokomela batsoali ba hae ba holileng ba bile ba kula. O re: “Ka nako eo mosebetsi o ne o ntletse matsoho moo ke neng ke sebetsa teng. Pelo ea ka e ne e lula e le ntšo ebile ke hlobaela. Ke ne ke nahana hore mathata a ka a tla fela haeba nka shoa.”

Ntate Ojebode oa Nigeria o re: “Ke ne ke lula ke utloile bohloko hoo ka linako tse ling ke neng ke lla, ke batla matsapa ’ohle a ho ipolaea.” Ka lehlohonolo ntate Ojebode, ntate Kaoru le ’mè Adriana ha baa ka ba ipolaea. Empa ka bomali-mabe, selemo le selemo batho ba likete baa ipolaea.

RE KA THUSOA KE ENG?

Hangata batho ba ipolaeang ke banna hobane ba soabela ho kopa thuso. Jesu o ile a re batho ba kulang ba hloka ngaka. (Luka 5:31) Le uena haeba u nyahame habohloko, u se ke oa soabela ho kopa thuso. Batho ba bangata ba nang le khatello ea maikutlo ba thusitsoe ke hore ba ee ngakeng. Ntate Ojebode, ntate Kaoru le ’mè Adriana le bona ba ile ba e-ba betere ka mor’a hore ba ee ngakeng.

Lingaka li phekola batho ba nang le khatello ea maikutlo ka litlhare le ka hore bakuli ba ntše maikutlo a bona. Batho ba nang le khatello ea maikutlo ba ka khothatsoa le ho thusoa ke beng ka bona le metsoalle. Motsoalle oa bohlokoa ka ho fetisisa ke Jehova hobane o re thusa ka lentsoe la hae e leng Bibele.

THAROLLO EA MOSHOELELLA

Batho ba bang ba nang le khatello ea maikutlo ba sebelisa litlhare nako e telele ebile ba tlameha ho fetola tsela eo ba phelang ka eona. Haeba u na le khatello ea maikutlo, le uena u ka ba le tšepo e tšoanang le ea ntate Ojebode kaha o re: “Ke lebeletse ho bona mantsoe a hlahang ho Esaia 33:24 a phethahala, a reng ha ho sa tla ba le motho ea tla re ‘kea kula.’ ” Le uena u ka kholiseha hore tšepiso ea Molimo ea ho tlisa “lefatše le lecha” moo re ke keng ra utloa “bohloko” e tla phethahala. (Tšenolo 21:1, 4) Ka nako eo ha re sa tla hlola re utloa bohloko ho hang. Re tla ke re re nk’hu! Lintho tsohle tse bohloko “li ke ke tsa hopoloa, kapa tsa fihla ka pelong.”—Esaia 65:17.

Litemana Tse ka U Thusang

Molimo o utloisisa hantle hore na u ikutloa joang.

“ ’Na, Jehova Molimo oa hao, ke u tšoara ka letsoho la hao le letona, ke ’na ea reng ho uena, ‘u se ke ua tšoha. Ke tla u thusa.’ ”—Esaia 41:13.

Ha ho na motho ea ka utloisisang mathata a rona joaloka Jehova ebile o batla ho re thusa.

Nahana ka lintho tseo u ithutileng tsona ka Bibeleng.

“[Elia a] kopa hore moea oa hae o shoe ’me a re: ‘Ho lekane! Joale, Jehova, tlosa moea oa ka.’ ”—1 Marena 19:4.

Ntate Ojebode o re: “Ke thusitsoe ke ho nahana ka lintho tseo ke ithutileng tsona ka Bibeleng. Ke hlokometse hore moprofeta Elia le eena o kile a ikutloa joaloka ’na.”

Ithute mehlaleng ea batho bao ho buuoang ka bona ka Bibeleng.

Jesu o ile a re ho Petrose: “Ke u etselitse thapeli hore tumelo ea hao e se ke ea fela.”—Luka 22:32.

Moapostola Petrose o ile a utloa bohloko a ba a lla haholo ka mor’a hore a latole Jesu ka makhetlo a mararo. Ntate Kaoru o re: “Ntho e ileng ea hlahela Petrose e ile ea nthusa ho hlokomela hore Jehova le Jesu ba ne ba mo rata, e leng se nkhothalitseng.”

Lintho tsohle tse bohloko “li ke ke tsa hopoloa, kapa tsa fihla ka pelong.”—Esaia 65:17.