Ho Fumana ba Thahasellang ka Bopaki bo Atlehang ba Seterateng
1 Jesu o ile a laela barutuoa ba hae hore ba batle ba tšoanelang ho utloa litaba tse molemo tsa ’Muso. (Matt. 10:11) Leha ho le joalo, libakeng tse ngata kajeno, ho ntse ho e-ba thata haholoanyane ho fumana batho malapeng a bona. Kahoo, ho ka etsoa eng ho fihla ho ba tšoanelang bao e ka ’nang eaba ha ba fumanoe?
2 Bopaki ba seterateng e ka ba tsela e atlehang ea ho fumana batho ba sa fumanoeng mosebetsing oa ntlo le ntlo. Re ka paka seterateng liemelong tsa libese, haufi le lifolete tseo ho seng bonolo ho kena ka hare, lirapeng tsa boikhathollo tsa sechaba, le libakeng tse ling moo batho ba fumanehang ba tšoarehile mesebetsing ea bona ea letsatsi le letsatsi.
3 Ha ho buuoa ka bopaki ba seterateng, ba bang baa tšoha. Ba ka ’na ba ba leqe ho kopanela mosebetsing ona hobane ba ba lihlong kapa ba nahana hore ba tla khoboloa ke batho ba sa rateng molaetsa oa ’Muso. Hangata lintho tsena tseo ba tšoenyehileng ka tsona ha li na motheo. Ba nang le phihlelo mosebetsing ona ba tlaleha hore ha o thata ho feta bopaki ba ntlo le ntlo. Ha e le hantle, ba fumane hore batho ba bangata ba tloaetse ho atameloa seterateng ka mabaka a fapaneng, ’me ba bang ba ka sekamela haholoanyane hore ba qoqe kapa ba mamele ho feta kamoo ba neng ba tla etsa kateng ha re ne re kokota monyakong oa bona. Kahoo haeba re ‘iteta sebete,’ re ka ’na ra makatsoa ke liphello tse thabisang.—1 Ba-Thess. 2:2, NW.
4 Mosebetsi oa seterata o ka etsoa ka tsela e atlehang joang? Ke habohlokoa ho lokisetsa hantle. Bala limakasine esale pele, ’me u khethe ntlha e le ’ngoe kapa tse peli tse ka totobatsoang tseo u nahanang hore li tla etsa hore batho bao u teanang le bona ba be le thahasello. Nehelano ea metsotsoana e 30 e batla e loketse. Kaha pakane ke ho buisana ka ho toba le ba bang, khetha sebaka seo batho ba bangata ka ho lekaneng ba fetang ho sona kamehla. Le hoja ho ka ’na ha e-ba bohlale hore mohoeletsi e mong a be haufi, hangata ho molemo hore le sebetse le arohane. Bahoeletsi ba emang hammoho ba ka ’na ba sekamela ho senya nako ba qoqa ’me ba sa hlokomele batho ba ka ’nang ba sekamela ho mamela molaetsa oa ’Muso.
5 Ho ema sebakeng se le seng feela u hlahisitse limakasine ha ho atlehe joaloka ho nka bohato ba ho atamela batho. Leka ho sheba batho mahlong. E ba ea mofuthu, ea nang le botsoalle, le ea tobang ha u leka ho qalisa moqoqo. Maemong a mang, u ka ’na ua tlameha ho tsamaea mehato e se mekae le motho ha u ntse u bua le eena. Haeba a arabela hantle, nehelana ka limakasine. Haeba a hana limakasine, u ka ’na ua nehelana ka pampitšana.
6 Hangata ho molemo ho lokisetsa nehelano e khutšoaane e phahamisang potso kapa polelo e tla tsosa thahasello. Haeba ho e-na le karabelo e ntle, leka ho fumana lebitso la motho eo, aterese, mohlomong le nomoro ea hae ea thelefono e le hore u ka khutlela moo ho bontšitsoeng thahasello. U ka ’na ua re: “Haeba u rata ho ithuta ho eketsehileng, nka thabela ho u etela lapeng ha hao kapa ka lokisetsa hore Paki e ’ngoe e etse joalo.”
7 Moholo e mong ea neng a paka seterateng o ile a atamela mosali e mong ’me a fumana hore ha ho mohla a kileng a buisana le Lipaki lapeng ha hae. O ile a amohela buka ’me a lumela hore khaitseli a ka mo etela lapeng ha hae ka nako e loketseng. Ka sebele ba bangata ba tšoanelang ba ka fumanoa ’me ba thusoa haeba re atleha bopaking ba seterata.—Lik. 17:17.