E-ba ka Soule Eohle!

¹ Re na le mabaka a mangata haholo a ho leboha Jehova. Ana a akarelletsa lintho tseo a li entseng nakong e fetileng, tseo a li etsang hona joale, le tseo a tlang ho re etsetsa tsona kamoso. Teboho ea rōna e lokela ho re susumelletsa ho etsa eng? Pesaleme ea Davida ea arabela: “Ke tla rorisa Jehova ka mehla; thoko ea hae e tla ba molomong oa ka ka mehla.”—Pes. 34:1.

² Ka ho hlakileng Bibele e bontša hore re laetsoe ho bolela. Ona ke mosebetsi oo re o etsang ‘ka soule eohle joalokaha eka re sebeletsa Jehova.’ (Bakol. 3:23) Re tla etsa ho hokae tšebeletsong haeba kannete re le ka soule eohle? Ha re nahana ka lerato la Jehova molemong oa rōna, ka sebele lipelo tsa rōna li re susumelletsa ho kopanela ka boinehelo ho bolelleng ba bang ka eena le ka merero ea hae e babatsehang! Re susumelletseha ho etsa seo re ka se khonang.

³ E ne e tla ba ntho e utloahalang ho lebella hore motho ea leng ka soule eohle a batle ho lula a tsepamisitse tlhokomelo ea hae tšebeletsong e halalelang. Mopesaleme, eo ka ho totobetseng a ileng a ikutloa ka tsela eo, o ile a bolela: “Ke u rorisa hasupa ka letsatsi.” (Pes. 119:164) Ba nang le maikutlo a tšoanang le a mopesaleme ba batla ho sebelisa menyetla ea ho rorisa Jehova. Ha maemo a bona a ba lumella, ba sebeletsa ka cheseho ho fihlela moo ba ka khonang.

⁴ Re Pota-potiloe ke Menyetla ea ho Rorisa Jehova: Ha rea lokela ho ema ho fihlela re kopanela mosebetsing oa ntlo le ntlo ho bolela litaba tse molemo. Bao re sebetsang le bona, bao re kenang sekolo le bona, beng ka rōna le bao re tloaelaneng le bona kaofela ho hlokahala ba utloe molaetsa oa ’Muso. Ha re tsamaea, re ka qala moqoqo o ka lebisang ho faneng ka bopaki ho basebetsi ba hotele, basebetsi ba ntlo ea lijo, basebetsi ba likaraje kapa bakhanni ba litekesi. Ha re le lapeng, re ka ’na ra pakela baahelani kapa batho ba tlisetsang bareki thepa. Haeba re kene sepetlele, ho na le baoki, lingaka le bakuli ba bang bao re ka ba bolellang ka mokhoa o sa reroang.

⁵ Bopaki bo sa Reroang bo Hlahisa Litholoana: Ka letsatsi le leng Lipaki tse peli li ne li tsamaea phakeng ’me tsa qala moqoqo le monna e mong e mocha ea neng a ntse a tsamaea le ngoana oa hae. Qetellong, eena le mosali oa hae ba ile ba amohela ’nete. Hamorao monna eo e mocha o ile a senola hore nakoana pele a kopana le Lipaki tseo tse peli, o ne a ile a rapela Molimo, a kōpa, ‘Haeba u teng, ke kōpa u ntumelle ke u tsebe.’ O nahana hore ho kopana hoo ha phakeng ke karabelo ea Jehova thapelong ea hae.

⁶ Ba leng ka soule eohle takatsong ea bona ea ho thusa ba bang moeeng ba ba le thabo e khōlō. Baa tseba hore tšebeletso e joalo, “ka pelo eohle,” e thabisa Jehova.—1 Likron. 28:9.