Rua Molemo ka ho Ithuta Buka ea Atamela ho Jehova
1 Kopanong ea Setereke ea “Baboleli ba ’Muso ba Chesehang,” re ile ra thabela ho amohela buka ea Atamela ho Jehova. Ba bangata ba ile ba bala buka ena hang-hang. Ntle ho pelaelo ba bang ba bangata ba ile ba susumelletsoa ho etsa joalo ke temana ea selemo ea 2003, e reng: “Atamelang ho Molimo, ’me o tla atamela ho lōna.”—Jak. 4:8.
2 Ka March re tla qala ho ithuta buka ea Atamela ho Jehova Thutong ea Buka ea Phutheho. Re ka rua molemo o moholo joang ha re ithuta eona? Ho lokisetsa ke habohlokoa. Khaolo ka ’ngoe e tla tšohloa ka libeke tse peli, ’me beke ka ’ngoe ho na le lirapa tse ’maloa tse reretsoeng ho ithutoa. Sena se tla le fa nako e lekaneng ea hore le fane ka litlhaloso tse tsoang pelong tse thehiloeng boitsebisong boo le ithutileng bona le boo le thuisitseng ka bona. Ho phaella moo, libekeng tseo ho hlahlojoang karolo e qetellang ea khaolo ho tla ithutoa lirapa tse seng kae, e le ho fana ka nako ea hore ho sebelisoe tšobotsi e khethehileng ea buka ena.
3 Ho tloha khaolong ea 2, ho na le lebokose le nang le sehlooho se reng “Lipotso Tsa ho Thuisa” ho elella bofelong ba khaolo ka ’ngoe. Ka mor’a ho hlahloba serapa sa ho qetela sa khaolo, molebeli oa thuto ea buka o tla kōpa hore sehlopha se tšohle lebokose leo. O tla botsa sehlopha lipotso, tse hlokang lintlha tse molemo tseo se li fumaneng ha se thuisa ka Mangolo. (Liprov. 20:5) Ho phaella lipotsong tse lebokoseng, ka linako tse ling a ka ’na a botsa lipotso tse kang tsena: “Boitsebiso boo bo u bolella eng ka Jehova? Bo ama bophelo ba hao joang? U ka bo sebelisa joang ho thusa ba bang?” Sepheo sa hae e tla ba ho fumana likarabo tse tsoang pelong, eseng ho botsa sehlopha lipotso lintlheng tse sa reng letho.
4 Buka ea Atamela ho Jehova ea ikhetha. Le hoja lingoliloeng tsohle tsa “lekhoba le tšepahalang le le masene” li tlotlisa Jehova, buka ena e reretsoe ho tšohla ka ho feletseng litšobotsi tsa Jehova. (Mat. 24:45-47) Re letetsoe ke monyetla o hlollang hakaakang! Re tla rua molemo o enneng ka ho ithuta botho ba Jehova ka ho tebileng. E se eka thuto ena e ka re thusa ho atamela haholoanyane ho Ntate oa rōna oa leholimo, ’me e se eka re ka atleha haholoanyane ho thuseng ba bang ho etsa se tšoanang.