Lengolo le Tsoang Lekaleng
Bahoeletsi ba ’Muso ba Ratehang:
Qalong ea selemo sena se secha sa tšebeletso, ho ile ha thehoa potoloho e ’ngoe e ncha tšimong ea lekala la Afrika Boroa, e etsang hore lipotoloho tse thehiloeng lilemong tse tšeletseng tse fetileng li be 14. Hona joale tšimo ea lekala la Afrika Boroa e na le lipotoloho tse 84 le litereke tse tšeletseng.
Ho etsoa mosebetsi o tsoileng matsoho oa ho bolela litaba tse molemo tšimong ea litholo. Ho ile ha thehoa liphutheho tse ling tse peli tsa puo ea matsoho, e ’ngoe ea thehoa Pretoria e ’ngoe Cape Town. Ho phaella liphuthehong tse tharo tsa puo ea matsoho, hona joale ho na le lihlopha tsa puo ea matsoho tse fetang 30 tse kopanelang le liphutheho tse sa tšoaneng Afrika Boroa le linaheng tsa boahelani tse tlas’a lekala la rōna. Na u ka ithaopela ho ithuta puo ea matsoho e le hore u thuse tšimong ee e hlokang boiteko bo matla?
Baeti ba ’nile ba tla ka bongata bo hlollang ho tla bona mohaho o phethiloeng oa setsi sa khatiso se atolositsoeng. Haesale mochine o mocha oa khatiso oa MAN o qala ho sebetsa ka June 2004 le oa ho kopanya libuka ka September 2004, ho bile le batho ba fetang likete tse leshome ba ’nileng ba etela lekaleng. Letsatsing le leng la phomolo re ile ra thabela ho ba le baeti ba 2 519. Haeba ha u e-s’o etele Bethele haufinyane, re u memela hore u etse joalo. Leha ho le joalo, hopola hore ha ho na tokisetso ea ho bona sebaka ka Moqebelo. Mechine ea khatiso, mochine o kopanyang libuka le mafapha a mang a mangata ha a sebetse ka Moqebelo.
Ka August 2005, ho ile ha qalisoa kaho ea mohaho oa bolulo o mocha le katoloso ea holo ea ho jela. Mehaho ena e hahoa ke likonteraka tse hiriloeng. Barab’abo rōna ba tšoanelehang ba hlahloba boleng ba mosebetsi o etsoang ho etsa bonnete ba hore ke oa boleng bo phahameng. Ho hakanyetsoa hore morero ona oa kaho o tla phethoa ka likhoeli tse ka bang 15.
Ka la 4 June, 2005, sehlopha sa bone ebile e le sa ho qetela sa sekolo sa balebeli ba tsamaeang se ile sa qeta sekolong. Sena se bolela hore joale balebeli ba setereke le ba potoloho ba 91 ba sebeletsang tlas’a lekala la Afrika Boroa, ba fumane koetliso ena e khethehileng ea libeke tse robeli ’me ba hlomeletsoe hamolemo bakeng sa ho hlokomela mesebetsi e hlokahalang tšimong.
Tšebetso ena eohle e etsoang ka cheseho ea ho ntšetsa pele mesebetsi e amanang le ’Muso ea babatseha! Re ananela haholo tsela eo ka eona le tšehetsang mosebetsi ona ka menehelo e fanoang ka seatla se bulehileng. (Liprov. 3:9, 10) E se eka Jehova a ka tsoela pele ho hlohonolofatsa boiteko ba rōna bo kopanetsoeng ba ho ‘sebeletsa thoriso ea khanya ea hae.’—Baef. 1:12.
Barab’abo lōna,
Ofisi ea Lekala ea Afrika Boroa