Kamoo U ka Sebelisang Livideo Tsa ho Ithuta Bibele le Batho

Re na le livideo tse ’ne tseo re li sebelisang tšimong ha re ithuta Bibele le batho. Video ka ’ngoe e phetha morero ofe?

• 

  Ke Hobane’ng ha U Lokela ho Ithuta Bibele?—E Feletseng e etselitsoe ho thusa batho hore ba batle ho ithuta Bibele ho sa tsotellehe seo ba se lumelang. E khothalletsa batho ho batla likarabo tsa lipotso tsa bohlokoa ka Bibeleng. Hape e ba thusa ho bona hore na ba ka kopa thuto ea Bibele joang.

• 

  Ke Hobane’ng ha U Lokela ho Ithuta Bibele? (video e khutsufalitsoeng) e tšoana le e feletseng empa eona e khutšoanyane. E ka sebetsa haholo tšimong ea batho ba se nang nako kapa ba phathahaneng.

• 

  Ho Etsahala’ng Thutong ea Bibele? e thusa batho hore ba batle thuto ea Bibele e sa lefelloeng le ho ba bontša hore na ba ka e kopa joang.

• 

  Thabela Thuto ea Bibele e bontšoa batho ba seng ba qalile ho ithuta Bibele. Video ena e hlaha leqepheng la bobeli la buka ea U ka Thaba ka ho sa Feleng! Empa e ntse e ka sebelisoa le ha ho baloa bukana ea U ka Thaba ka ho sa Feleng! E hlalosa lintlha tse hlahang bukeng le hore na moithuti a ka lebella eng thutong.

Video ka ’ngoe e etselitsoe ho sebelisoa maemong a itseng empa e ’ngoe le e ’ngoe ea tsona e ntse e ka bapaloa kapa ea romelloa motho ha ho loketse. Bahoeletsi ba khothaletsoa ho tseba livideo tsena hantle e le hore ba ka li sebelisa hamolemo ha ba le tšimong.