Litho Tse Peli Tse Ncha Tsa Sehlopha se Busang

KA LA 5 OCTOBER 2024, ho ile ha etsoa tsebiso e khethehileng sebokeng sa selemo le selemo: Mor’abo rona Jody Jedele le Mor’abo rona Jacob Rumph ba ile ba khethoa hore e be litho tsa Sehlopha se Busang sa Lipaki Tsa Jehova. Ka bobeli bara bana ba bo rona ba sebelelitse Jehova ka botšepehi ka lilemo tse ngata.

Mor’abo rona Jedele o hlahetse Missouri, naheng ea Amerika. O holisitsoe ke batsoali ba Lipaki. Lelapa labo le ne le lula haufi le tšimo e sa sebetsoeng hangata. Kahoo, o ile a kopana le bana ba bo rona ba bangata ba tsoang linaheng tse fapaneng ba neng ba chakela moo ho tla thusetsa ho bolela litaba tse monate. Lerato la bona le momahano ea bona li ile tsa mo ama haholo. O ile a kolobetsoa a sa le mocha ka la 15 October 1983. O ne a rata tšimo ’me ha a qeta sekolong se phahameng, e ile ea e-ba pula-maliboho ea kamehla ka September 1989.

Ha Mor’abo rona Jedele a ntse a le mocha, batsoali ba hae ba ne ba atisa ho ea Bethele ba tsamaea le eena le ausi oa hae. Maeto ana a ile a ba susumetsa hore ba batle ho e’o sebeletsa Bethele ha ba se ba holile, e leng ntho e ileng ea etsahala. Mor’abo rona Jedele o ile a fihla Bethele e Wallkill ka September 1990. Kabelo ea hae ea pele e ile ea e-ba ho sebetsa lefapheng la ho hloekisa ’me hamorao a sebetsa Lefapheng la Tsa Bongaka.

Ka nako eo, liphutheho tsa puo ea Sepanishe tse haufi li ne li hola ’me li hloka bara ba bo rona. Kahoo, Mor’abo rona Jedele o ile a ea ho e ’ngoe ea tsona ’me a qala ho ithuta puo ea Sepanishe. Nakoana ka mor’a moo, o ile a kopana le Morali oa bo rona Damaris, eo e neng e le pula-maliboho hona potolohong eo. Hamorao ba ile ba nyalana ’me ba sebeletsa Bethele ba le babeli.

Ka 2005, ba ile ba tlohela ho sebetsa Bethele e le hore ba il’o hlokomela batsoali ba bona ba neng ba sebeletsa Jehova ka botšepehi. Ka nako eo, ba ile ba sebeletsa e le bo-pula-maliboho ba kamehla. Mor’abo rona Jedele o ile a thusetsa ka ho ruta Sekolong sa Tšebeletso sa Bopula-maliboho a ba a sebeletsa Komiting ea Bohokahanyi le Lipetlele le Komiting ea Kaho ea Lebatooa.

Ka 2013, Mora le Morali oa bo rona Jedele ba ile ba bitsoa Bethele hape ha Warwick e ne e hahoa. Ho tloha ka nako eo, ba ile ba boela ba sebetsa Patterson le Wallkill. Mor’abo rona Jedele o ile a sebetsa Lefapheng la Meralo le Kaho le Lefapheng la Boitsebiso ba Litšebeletso Tsa Lipetlele. Ka March 2023, o ile a khethoa hore e be mothusi Komiting ea Tšebeletso. Ha a bua ka likabelo tseo a ileng a li fuoa o re: “Ha u fuoa kabelo e ncha, ka linako tse ling u ka utloa u tšohile. Empa ha seo se etsahala, u lokela ho hopola ho itšetleha ka Jehova hobane ke eena ea re thusang hore re etse lintho tseo a reng re li etse.”

Mor’abo rona Rumph o hlahetse California, naheng ea Amerika. Ha a ntse a hola, ’mè oa hae o ile a khaotsa ho ea libokeng le tšimong empa o ne a ntse a leka ho mo ruta Bibele. Hape, selemo le selemo o ne a chakela nkhono oa hae eo e neng e le Paki ea Jehova. O ile a mo thusa hore a be le thahasello ea ho ithuta Bibele ’me ha a le lilemo li 13 o ile a kopa ho khanneloa thuto. O ile a kolobetsoa ha a ntse a le mocha ka la 27 September 1992. Taba e thabisang ke hore ’mè oa hae o ile a boela a ea libokeng le tšimong le ba lelapa labo ba ile ba qalella ho hatela pele eaba baa kolobetsoa.

Ha e ntse e le mocha, Mor’a bo rona Rumph o ile a bona kamoo bo-pula-maliboho ba thabileng kateng. Kahoo, ha a qeta sekolong se phahameng, o ile a nkela bo-pula-maliboho ka September 1995. Ka 2000, o ile a ea Ecuador ho e’o sebeletsa moo ho nang le tlhokahalo. Ke hona teng moo a ileng a kopana le morali oa bo rona oa pula-maliboho ea bitsoang Inga, ea tsoang Canada. Hamorao ba ile ba nyalana. Ka mor’a hore ba nyalane, ba ile ba sebeletsa toropong e Ecuador e neng e e-na le sehlopha se senyenyane sa bahoeletsi. Hona joale, phutheho eo e se e e-na le bahoeletsi ba chesehang.

Ha nako e ntse e ea, Mora le Morali oa bo rona Rumph ba ile ba khethoa hore e be bo-pula-maliboho ba khethehileng ’me hamorao ba etsa mosebetsi oa potoloho. Ka 2011, ba ile ba memeloa ho ea tlelaseng ea bo132 ea Gileade. Ka mor’a ho fuoa mangolo, ba ile ba sebeletsa linaheng tse fapaneng ’me ba thabela mefuta e fapaneng ea tšebeletso e kang tšebeletso ea Bethele, ho ba baromuoa le mosebetsi oa potoloho. Hape, Mor’abo rona Rumph o ile a ba le tokelo ea ho ba morupeli oa Sekolo sa Baevangeli ba ’Muso.

Ka lebaka la seoa sa COVID-19, Mora le Morali oa bo rona Rumph ba ile ba khutlela Amerika. Ba ile ba memeloa ho ea Bethele e Wallkill moo Mor’abo rona Rumph a ileng a fumana koetliso Lefapheng la Tšebeletso. Hamorao ba ile ba khutlela lekaleng la Ecuador moo Mor’abo rona Rumph a ileng a sebeletsa e le setho sa Komiti ea Lekala. Ka 2023, ba ile ba isoa Warwick. Ka January 2024, Mor’abo rona Rumph o ile a khethoa hore e be mothusi Komiting ea Tšebeletso. Ha a nahana ka mesebetsi eo a e entseng, o re: “Ntho e etsang hore kabelo e ikhethe ha se sebaka seo u sebetsang ho sona empa ke batho bao u sebetsang le bona.”

Re ananela mosebetsi o boima o etsoang ke bara bana ba bo rona ’me ‘re tla ’ne re bontše banna ba tšoanang le bana hore rea ba rata.’—Bafil. 2:29.