Na Lipaki Tsa Jehova li Fetotse Bibele Hore e Lumellane le Lithuto Tsa Tsona?
Che. Ho e-na le hoo, re ’nile ra fetola lithuto tsa rōna ha re hlokomela hore ha li lumellane le Bibele.
Re ile ra qeta lilemo tse ngata re ntse re hlahloba Bibele le pele re e-ba le Phetolelo ea Lefatše le Lecha ea Mangolo a Halalelang ka 1950. Re ne re sebelisa phetolelo leha e le efe e neng e fumaneha ’me ra theha lithuto tsa rōna ho latela seo re neng re ithuta sona. Ak’u hlahlobe tse ling tsa lithuto tseo haesale Lipaki Tsa Jehova li li lumela ’me u bone hore na li lumellana le seo Bibele e se rutang kapa che.
Seo re se lumelang: Molimo hase Boraro-bo-bong. Makasine ea Zion’s Watch Tower ea July 1882, e ile ea re: “Babali ba rōna baa hlokomela hore le hoja re lumela ho Jehova Molimo le Jesu, le Moea o halalelang, re hana ka ho feletseng thuto e sa lumellaneng le Mangolo, ea hore ke Melimo e meraro ho motho a le mong, kapa kamoo ba bang ba lumelang kateng hore, ke Molimo a le mong ho batho ba bararo.”
Seo Bibele e se rutang: “Jehova Molimo oa rōna ke Jehova a le mong.” (Deuteronoma 6:4, The Holy Bible, ea Robert Young) “Ho na le Molimo a le mong, Ntate, eo tsohle li tsoang ho eena, le rōna re tsoang ho eena; le Morena a le mong Jesu Kreste, eo tsohle li entsoeng ka eena, le rōna re leng teng ka eena.” (1 Bakorinthe 8:6, American Bible Union Version) Jesu o ile a re: “Ntate o moholo ho ’na.”—Johanne 14:28, Douay-Rheims Version.
Seo re se lumelang: Ha ho na tlhokofatso ea ka ho sa feleng mollong oa lihele. Makasine ea Zion’s Watch Tower ea June 1882, e ile ea theha sehlooho sa eona mantsoeng a hlahang ho Baroma 6:23 phetolelong ea King James Version, se neng se re “Moputso oa Sebe ke Lefu,” ’me e ile ea re: “Polelo ena e bonolo haholo ebile e hlakile. Ho makatsang ke hore batho ba bangata ba ipolelang hore baa lumela hore Bibele ke Lentsoe la Molimo, ba hanyetsa seo ’me ba tsitlella hore moputso oa sebe ke tlhokofatso ea ka ho sa feleng le hore Bibele e ruta seo.”
Seo Bibele e se rutang: “Moea o etsang sebe o tla shoa.” (Ezekiele 18:4, 20, King James Version) Kotlo ea ho qetela eo ba hanyetsang Molimo ba tla e fumana ke “pheliso e sa feleng,” eseng tlhokofatso ea ka ho sa feleng.—2 Bathesalonika 1:9, King James Version.
Seo re se lumelang: ’Muso oa Molimo ke puso ea sebele eseng ntho e ka pelong ea motho. Ha makasine ea Zion’s Watch Tower ea December 1881 e bua ka ’Muso oa Molimo e ile ea re: “Ha e le hantle, ’muso ona o tla felisa mebuso e meng eohle e lefatšeng.”
Seo Bibele e se rutang: “Mehleng ea marena ao, Molimo oa leholimo o tla hloma ’muso o ke keng oa senyeha ka ho sa eeng kae: ’me ’muso oo o ke ke oa fetela ho sechaba se seng; o tla robaka o felise mebuso eo kaofela, empa oona o tla ba teng ka ho sa feleng.”—Daniele 2:44, King James Version.
Na Lipaki Tsa Jehova li sebelisa Phetolelo ea Lefatše le Lecha feela ho tšehetsa lithuto tsa tsona?
Che, hobane re ntse re sebelisa liphetolelo tse ling tsa Bibele mosebetsing oa rōna oa boboleli. Ha e le hantle, le hoja re fa batho Bibele ea Phetolelo ea Lefatše le Lecha ntle ho tefo e le karolo ea mosebetsi oa rōna oa ho ithuta le bona Bibele mahala, re boetse re thabela ho ithuta le ba batlang ho sebelisa liphetolelo tse ling.