Nka Etsa’ng ho Laola Bohale ba ka?

Tlhahlobo

• U halefa hangata hakae?

  • ho hang

  • ka linako tse ling

  • letsatsi le leng le le leng

• U halefa haholo hakae?

  • hanyenyane

  • haholo

  • tuka ke bohale

• Ke mang eo hangata u mo halefelang?

  • motsoali oa hao

  • banab’eno

  • motsoalle

Haeba u e-na le bothata ba ho halefa, sehlooho sena se tla u thusa. Qala ka ho hlahloba bohlokoa ba ho khoba matšoafo ha batho ba bang ba u halefisa.

Ke hobane’ng ha e le habohlokoa

Bophelo ba hao bo botle. Liproverbia 14:30 [BPN] e re: “Pelo e nang le khotso e phelisa motho hantle.” Buka ea Journal of Medicine and Life e re “bohale bo ka etsa hore motho a tšoaroe ke mafu a amang pelo.”

Metsoalle ea hao. Bibele e re: “U se ke ua ba le setsoalle le mang kapa mang ea ineheletseng bohale; ’me u se ke ua kena setsoalleng le motho ea tlakolohang ka bohale.” (Liproverbia 22:24) Haeba u na le bothata ba ho halefa, u se ke ua makala ha batho ba bang ba sa batle ho ba metsoalle ea hao. Ngoanana e mong ea bitsoang Jasmine o re: “Ha u sa laole bohale ba hao u tla lahleheloa ke monyetla oa ho ba le metsoalle ea sebele.

Botumo ba hao. Ethan ea lilemo li 17 o re: “Haeba u sitoa ho laola bohale ba hao, batho ba bang ba tla tseba ka hona ’me seo se ka ama tsela eo ba u talimang ka eona.” Kahoo ipotse, ‘Ke batla ho tsejoa ke le motho ea joang; ea nang le khotso kapa ea halefang habonolo?’ Bibele e re: “Ea liehang ho halefa o tletse temoho, empa ea felang pelo o phahamisa booatla.”​—Liproverbia 14:29.

Seo u ka se etsang

Bala Mangolo a latelang le seo bacha ba bang ba se buang, ka mor’a moo u ipotse lipotso tse tla latela.

• Liproverbia 29:22: “Motho ea ineheletseng bohale o tsosa ho hloka kutloano, ’me mang kapa mang ea ratang ho halefa o na le litlōlo tse ngata.”

  “Ha ke ntse ke hōla, ho ne ho le thata ho laola bohale ba ka. Beng ka ’na ba na le bothata bo tšoanang. Re re ke lefutso. Re thatafalloa ke ho laola bohale ba rōna!”​—Kerri.

  Na ke tloaetse ho halefa? Ha ho utloahale hore ebe ha motho a rorisoa ka mekhoa ea hae e metle o re ke ka lebaka la boiteko boo a bo etsang empa ha a etsa lintho tse fosahetseng teng a re ke lefutso.

• Liproverbia 15:1: “Karabo, ha e le bonolo, e leleka khalefo, empa lentsoe le utloisang bohloko le baka bohale.”

  “Ntho ea bohlokoa ke hore u ithute ho laola maikutlo. Ha u leka ho ba le botho bo botle ’me u nahana ka lintho tse molemo, u ke ke oa ba motho ea bohale.”​—Daryl.

  Ke hobane’ng ha ke lokela ho ela hloko tsela eo ke arabang ka eona ha ke halefile?

• Liproverbia 26:20: “Moo ho se nang patsi mollo oa tima.”

  “Ha ke arabela ka tsela e bonolo, sena se etsa hore motho ea halefileng a theole maikutlo ’me re khona ho buisana hantle ho se ea halefelang e mong.”​—Jasmine.

  Tsela eo ke buang le ho arabela batho ka eona e ka mpefatsa lintho joang?

• Liproverbia 22:3: “Ea masene ke ea boneng tlokotsi ’me a ipata, empa ba se nang phihlelo ba fetetse pele ’me ba tla fumana kotlo.”

  “Ka linako tse ling ha ho hlaha qabang kea itsamaela e le hore ke nahane ka se etsahetseng, ebe ke sebetsana le bothata boo ha ke se ke theotse moea.”​—Gary.

  Ke neng ho loketseng hore motho a itsamaele ha ho hlaha qabang, empa a sa fane ka maikutlo a hore oa ngala?

• Jakobo 3:2: “Kaofela re khoptjoa hangata.”

  “Re lokela ho soabela liphoso tsa rōna ’me re li bakele. Ha re entse liphoso ha rea lokela ho nyahama empa re lokela ho leka ka matla ho etsa se nepahetseng.”​—Kerri.

Keletso: Ipehele pakane ea ho lula u khobile matšoafo nako e ka etsang khoeli. Ngola khatelo-pele ea hao bukeng.