Lula U Tsepamisitse Kelello ea Hao Linthong Tse Holimo
1 Ha se bua ka moloko o re potolohileng le pono ea oona ka bokamoso, sehlooho se ho The New York Times ea la 31 December, 1994, se ile sa re: “O tšaba bokamoso. O bo tšaba ka lebaka la mesebetsi, ka lebaka la boloetse, ka lebaka la moruo, ka lebaka la maemo a lefatše.” Hohle moo re shebang teng, ho na le boikutlo ba ho ba lekhonono ka bophelo. Tšebeletso ea rōna re le Lipaki tsa Jehova e re kopanya le batho ba ikutloang ka tsela ena letsatsi le letsatsi. Le hoja re talimana le mathata a tšoanang le ao ba talimanang le ’ona, tumelo ea rōna le tšepo ea rōna litšepisong tse tiileng tsa Lentsoe la Molimo li re nolofalletsa hore re be le pono e fapaneng haholo ka bophelo le bokamoso ba moloko oa batho.—Esa. 65:13, 14, 17.
2 Tebello ea rōna le pono ea rōna ka bokamoso mabapi le tšepo e tiileng li etsa hore batho ba bangata ba tšepahalang ba mamele molaetsa oo re ba tlisetsang oona. Batho ba bangata ba ikutloang ba tepelletse ’me ba hatelletsoe ba ho fumana ho tšelisa ho buisana le rōna. Kaha ba rata seo ba se utloang, ba bang ba lumela ho ithuta Bibele le rōna. Leha ho le joalo, ka linako tse ling, batho ba ka ’na ba batla ho ikimolla mathata a bona pele. Le hoja nako e ’ngoe e ka ’na ea sebelisetsoa ho mamela matšoenyeho a motho e mong, ha rea lokela ho lahleheloa ke pakane ea rōna, e leng ho ruta batho linnete tse hlakileng tsa Lentsoe la Molimo.
3 Re batla ho ba ba utloelang ba imetsoeng bohloko. Jesu o ile a beha mohlala ha a re, joalokaha ho tlalehiloe ho Mattheu 11:28: “Tloong ho ’na, lōna bohle ba khathetseng, ba imeloang.” Re batla ho khothatsa batho ka tsela e tšoanang. Leha ho le joalo, hlokomela, qetellong ea temana ea 28, Jesu o itse: “Ke tla le imolla.” Seo e lokela ho ba sepheo sa rōna. Re etsa joalo ka ho bolella ba bang litšepiso tse khathollang tse tsoang Lentsoeng la Molimo. Ho ba momameli ea molemo ho bontša thahasello ea rōna ea botho le kameho ’me ke habohlokoa ho phethahatseng thōmo ea rōna ea ho bolela litaba tse molemo tsa ’Muso, ho thusa ba bang ho hlokomela hore ’Muso ke oona feela pheko ea sebele mathateng ’ohle a moloko oa batho.—Matt. 24:14.
4 Mosebetsi oa rōna hase oa litsebi tsa mosebetsi oa tlhokomelo ea bophelo. Ho e-na le hoo, o joalokaha moapostola Pauluse a ile a hlalosa, joalokaha ho bontšitsoe ho 1 Timothea 4:6, ke tšebeletso e lebisang tlhokomelo ‘thutong e molemo,’ lithuto tse fumanoang Lentsoeng la Molimo. Ba nang le mathata a botho kapa a maikutlo ba ka ’na ba hloka ho khothaletsoa ho itšetleha ka Jehova. Ba ruteng hore ba lule ba ‘hopotse lintho tse holimo’—lintho tse amanang le tšepo ea ’Muso. (Ba-Kol. 3:2) Ha batho ba lula ba tsepamisitse tlhokomelo ea bona Lentsoeng la Molimo, ba ka hahuoa ka lebaka la tšusumetso e matla eo le bang le eona bophelong ba bona.—Ba-Heb. 4:12.
5 Kahoo pakane ea rōna ke ho thusa batho ho tsepamisa mehopolo ea bona linthong ‘tse lokileng, tse hloekileng, tse ratehang, le tse botumo bo botle.’ (Ba-Fil. 4:8) Haeba ba tsepamisa tlhokomelo tšepong ea ’Muso, ba tla hlohonolofatsoa ka tsela e tšoanang le ea rōna. Le bona ba tla ba le thabo e tsamaeang le tsebo ea hore Jehova qetellong o tla rarolla mathata ’ohle a bona ka ’Muso oa hae.—Pes. 145:16.