Tsebahatsa Lebitso la Jehova le Mesebetsi ea Hae

¹ “Lebohang Jehova, le ipiletse lebitsong la hae, tsebahatsang mesebetsi ea hae har’a lichaba. . . . Lipelo tsa ba batlang Jehova li ke li thabe.” (Pes. 105:1, 3) Mopesaleme ea ngotseng mantsoe ao o ile a fumana thabo e khōlō ka ho bolella ba bang ka Jehova le “mesebetsi” ea hae. Mesebetsi efe? Ha ho pelaelo hore ke e amanang le borena bo khanyang ba Molimo le “litaba tse molemo tsa poloko ea hae.”—Pes. 96:2, 3; 145:11, 12.

² Ha re atamela nakong ea Sehopotso sa 2001, re na le mabaka a mangata a ho thaba ka mesebetsi ea Jehova ho rōna. Joang? Ha ho pelaelo hore Lijo tsa Shoalane tsa Morena ke mokete o moholohali selemong ho Bakreste bohle ba ’nete. Ha ho ketsahalo e ’ngoe e tšoanang le eona ka bohlokoa, morero le tsela eo e phethoang ka eona. Ena ke nako eo kaofela ha rōna re lokelang ho hopola seo Jehova le Jesu ba se entseng ho re lokisetsa mokhoa oa poloko. Hase feela nakong ea Sehopotso ka tlhaho re lebellang ho bona keketseho tšebeletsong ea tšimo, ha re tsebahatsa “litaba tse molemo sa poloko”!

³ Na U Tla ba Pula-maliboho ea Thusang? Selemong se fetileng ka April palo e etsang rekoto ea 10 126 e ile ea ngolisa e le bo-pula-maliboho ba thusang Afrika Boroa. (Botswana e bile le bo-pula-maliboho ba thusang ba 173, Lesotho ba 237, Namibia ba 92, Sehlekehlekeng sa St. Helena ba 11 le Swaziland ba 286.) Selemong sena, na re ka etsa hore khoeli ea March le ea April e be likhoeli tse khethehileng tsa ho eketsa tšebeletso? March e na le Meqebelo e mehlano, April e na le Lisontaha tse hlano, ’me la 7 April e tla ba Letsatsi la rōna le Khethehileng la Limakasine. Ka ho lokisetsa ho sebetsa letsatsi lohle mafelo-bekeng, bahoeletsi ba bangata ba sebetsang nako e tletseng ba fumane bopula-maliboho bo thusang e le ntho eo ba ka e finyellang. Hore a finyelle lihora tse 50 tse hlokoang ka khoeli, pula-maliboho ea thusang o hloka karolelano ea lihora tse ka bang 12 ka beke. Hlahlobisisa likemiso tseo ho entsoeng litlhahiso ka tsona lebokoseng le leqepheng la 4. Na e ’ngoe ea tsona e tla lokela maemo a hao? Haeba ha ho joalo, mohlomong u ka iketsetsa kemiso hore u tle u be pula-maliboho ea thusang ka March le April.

⁴ Baholo ba lokela ho qala hona joale ho haha cheseho le tšehetso bakeng sa tšebeletso e eketsehileng. Selemong se fetileng phuthehong e ’ngoe eo baholo bohle le bahlanka ba sebeletsang ba ileng ba ngolisa e le bo-pula-maliboho ba thusang, bahoeletsi ba 64 ho ba 121 ba ile ba bula maliboho ka April! Phutheho e boetse ea thabela ho bona bahoeletsi ba sa kolobetsoang ba tšeletseng ba qala ho tlaleha ka March le April. Ka sebele ena ke nako e molemo ka ho fetisisa ho bana le ho ba bacha ’neteng hore ba kōpe baholo hore ba qale ho kopanela tšebeletsong ea ho paka phatlalatsa haeba ba tšoaneleha.

⁵ Boiteko bo Eketsehileng bo Tlisa Mahlohonolo: Liphutheho tse ipehelang lipakane tse khethehileng ’me li etsa boiteko bo eketsehileng li thabela mahlohonolo a mangata. Liphutheho tse ngata li ka ’na tsa lebisa tlhokomelo ho koaheleng tšimo e sa sebetsoeng kamehla, tsa tsepamisa maikutlo mekhoeng e sa tšoaneng ea ho paka, kapa tsa totobatsa ho paka ka thelefono—mekhoa e atlehang ea ho iteanya le batho ba sieo malapeng le baahi bao ho leng thata ho ba fumana.

⁶ Na ho fokolloa ke bophelo kapa ho tsofala ho ka hla ha thibela motho leha e le ofe hore a amehe ka hohle-hohle tšebeletsong? Hase mabakeng ’ohle. Ka mohlala, morali e mong oabo rōna ea lilemo li 86 ea tšoeroeng ke kankere e ile ea e-ba pula-maliboho ea thusang ka April ho sa tsotellehe ho ruruha maoto. Ho paka ka thelefono ho ile ha mo nolofalletsa ho kopanela ka botlalo tšebeletsong, a eketsa ho rorisa ha hae Jehova. Sena se bile le tšusumetso ho eena le ho phutheho.

⁷ Itokisetse Sehopotso Hantle: Selemong sena Sehopotso se ka la 8 April. Kaha se ka Sontaha, ho lokela ho be bonolo hore ba eketsehileng ba be teng. Re ka ’na ra ba le lenane le leholohali hafeela re phetha karolo ea rōna ka (1) hore rōna ka borōna re be teng le ka (2) ho mema ba bang hore ba be le rōna Sehopotsong. Re lokela ho mema bo-mang?

⁸ Sheba tlaleho ea hao ea tšebeletso ea tšimo ’me u batle mabitso a ba bontšitseng thahasello ’neteng, le hoja e ka ’na eaba ha u ba etele kamehla. Libeke tse peli kapa tse tharo pele ho Sehopotso, ameha ka ho etela bana kaofela ho ba memela Sehopotsong. Haeba maemo a hao a u lumella, ithaopele ho lokisetsa lipalangoang ho ba ka ratang ho ba teng.

⁹ Liphuthehong tse ling, ha ho sebelisoe limemo tsohle tse hatisitsoeng tsa Sehopotso. Bangoli ba liphutheho ba lokela ho tiisa hore limemo li fumaneha nako esale teng bakeng sa hore bohle ba li abe. U ka ’na ua lakatsa ho thaepa kapa ho ngola ka makhethe nako le sebaka seo Sehopotso se tla tšoareloa ho sona botlaaseng ba sememo seo. Kapa u ka ’na ua akarelletsa le sememo se bontšang aterese ea Holo ea ’Muso haeba ke moo Sehopotso sa lōna se tla tšoareloa teng. E le khopotso, mabakeng a mangata limemo tsa Sehopotso li lokeloa ho fuoa mong’a ntlo matsohong.

¹⁰ Hopolang ba sa Kopaneleng Tšebeletsong: Hoa thabisa ha seithuti sa Bibele se inehela ho Jehova ’me se tšoantšetsa seo ka ho qoelisoa metsing. Leha ho le joalo, selemo le selemo ba bang har’a rōna ba khaotsa ho kopanela le rōna, ’me ba khaotsa ho bolella ba bang ka lebitso la Jehova le mesebetsi ea hae. Re na le lebaka le utloahalang la ho ameha. Le hoja ba bangata ba sa kopaneleng tšebeletsong ba sa lahla ’nete, e ka ’na eaba ba khaolitse ho bolela ka lebaka la ho nyahama, mathata a botho kapa matšoenyeho a mang a bophelo. (Mat. 13:20-22) Ba fokolang moeeng ba hloka thuso hore ba khutlele phuthehong pele ba koenngoa ke tsamaiso ea Satane. (1 Pet. 5:8) Nakong ena ea Sehopotso re batla ho etsa boiteko bo khethehileng ho thusa bohle ba sa kopaneleng tšebeletsong ba tšoanelehang hore ba boele ba bolele litaba tse molemo.

¹¹ Mongoli oa phutheho o lokela ho hlokomelisa bakhanni ba thuto ea buka ka leha e le bafe ba lihlopheng tsa bona ba sa kopaneleng tšebeletsong. Komiti ea Tšebeletso ea Phutheho e tla etella pele ho lokisetsa hore ho etsoe maeto a bolisa ho bohle ba sa kopaneleng tšebeletsong. Haeba ho fumanoa hore motho o tla rua molemo ka thuto ea botho ea Bibele, molebeli oa tšebeletso o tla lokisetsa hore ho fanoe ka thuso, ka mor’a ho iteanya le litho tse ling tsa komiti ea tšebeletso mabapi le hore na ke mang ea tla tšoaneleha hamolemo ho khanna thuto eo. Le hoja ho ka ’na ha se ke ha hlokahala hore thuto e tsoele pele nako e telele, ea abetsoeng ho e khanna a ka tlaleha nako, maeto a ho boela le thuto ea Bibele.

¹² Ka April selemong se fetileng morali e mong oabo rōna ea neng a sebetsa ka ntlo le ntlo o ile a fa mohlankana e mong limakasine seterateng. O ile a senola hore mosali oa hae ke Paki e seng e sa kopanele tšebeletsong. Eaba o botsa hore na Holo ea ’Muso e hokae ’me a kōpa morali’abo rōna hore a ba etele eena le mosali oa hae. Ka lebaka leo, banyalani bao ba ile ba e-ba teng sebokeng se latelang ’me ba lumela ho ithuta Bibele.

¹³ Itokisetseng Tšebeletso e Eketsehileng! Mopesaleme ea ileng a phatlalatsa hore re lokela ho tsebahatsa lebitso la Jehova le mesebetsi ea hae o ile a phaella: “Mo bineleng, mo tsanyaoleleng lipina tsa thoriso, le nahanisise ka mesebetsi eohle ea hae e hlollang. Ithoriseng ka lebitso la hae le halalelang.” (Pes. 105:2, 3) A re bontšeng ho ameha ha rōna ka lebitso le leholo la Jehova le ‘mesebetsi ea hae e hlollang’ ka ho eketsa boiteko ba rōna tšebeletsong, re etsa hore nako ena ea Sehopotso e be e ikhethang ho feta tsohle!

[Lebokose le leqepheng la 4]

Litsela Tse sa Tšoaneng Tsa ho Etsa Kemiso ea Lihora Tse 12 ka Beke Bakeng sa ho ba Pula-maliboho ea Thusang

Letsatsi Lihora

Mantaha 1 2 − −

Labobeli 1 − 3 −

Laboraro 1 2 − 5

Labone 1 − 3 −

Labohlano 1 2 − −

Moqebelo 5 4 3 5

Sontaha 2 2 3 2

Kakaretso: 12 12 12 12

Na ho na le kemiso e ka sebetsang ho uena ho tsee? Haeba ha ho joalo, ke hobane’ng ha u sa iketsetse kemiso?