Khotsofatsa Litlhoko Tsa Hao Tsa Moea
1 Kopano ea rōna ea Setereke ea “Baboleli ba ’Muso ba Chesehang” e tla re fa monyetla o babatsehang oa ho khotsofatsa litlhoko tsa rōna tsa moea. Joaloka lijo tsa nama tse matlafatsang, lenaneo lena ka sebele le tla re matlafatsa moeeng “ka mantsoe a tumelo.” (1 Tim. 4:6) Le tla re nolofalletsa ho atamela haufi le Jehova. Re ka lebella ho fumana keletso le khothatso e tla re thusa ho mamella liteko bophelong ba rōna. Jehova oa re tiisetsa: “Ke tla etsa hore u be le temohisiso ’me ke u rupele ka tsela eo u lokelang ho tsamaea ka eona. Ke tla u fa keletso leihlo la ka le le holim’a hao.” (Pes. 32:8) Re hlohonolofalitsoe hakaakang ka tataiso ea hae e lerato bophelong ba rōna! Ak’u nahane ka lintho tse molemo tseo re ka li etsang hore re rue molemo o moholo lenaneong la kopano.
2 Re Lokela ho Lokisa Lipelo Tsa Rōna: Kaofela re na le boikarabelo ba ho sireletsa lipelo tsa rōna tsa tšoantšetso. (Liprov. 4:23) Sena se hloka hore re ikhalemele ’me re se ke ra ithetsa. Kopano e fana ka monyetla oa ho nahanisisa ka kamano ea rōna le Jehova, le ho ‘nyarela ka molaong o phethahetseng oa tokoloho.’ E le ho lokisetsa lipelo tsa rōna hore ‘li amohele ho hlongoa ha lentsoe,’ re lokela ho ipiletsa ho Jehova hore a re hlahlobisise, a senole ka ho rōna “tsela leha e le efe e bohloko” e hlokang ho lokisoa, le ho re tsamaisa “tseleng ea nako e sa lekanyetsoang.”—Jak. 1:21, 25; Pes. 139:23, 24.
3 Mamela ’me U Thuise: Jesu o ile a babatsa Maria ka ho mamelisisa mantsoe a hae, a re: “Maria o khethile karolo e ntle, ’me a ke ke a e amohuoa.” (Luka 10:39, 42) Haeba re e-na le boikutlo bo tšoanang re ke ke ra lumella lintho tse sa reng letho ho re sitisa. Re tla tiisa hore rea lula le ho mamela ka hloko ha lenaneo lohle le tsoela pele. Re tla qoba ho bua kapa ho nyolosa re theosa ho sa hlokahale ’me re tla ela hloko hore re se ke ra sitisa ba bang ka lithelefono tsa cellular, li-pager, lik’hamera le li-camcorder.
4 Ha re ntse re mametse lipuo, ho molemo ho ngola lintlha tse khutšoanyane ho re thusa ho seka-seka kamoo taba e hōlisoang kateng. Re lokela ho amahanya seo re se utloang le seo re seng re ntse re se tseba. Sena se tla re thusa ho utloisisa taba le ho e hopola. Ha re hlahloba lintlha tseo re li ngotseng, re lokela ho etsa seo ka morero oa ho li sebelisa. E ka ba hantle hore kaofela re ipotse: ‘See se ama kamano ea ka le Jehova joang? Ke lokela ho etsa liphetoho life bophelong ba ka? Nka sebelisa boitsebiso boo joang ha ke sebelisana le ba bang? Nka bo sebelisa joang tšebeletsong?’ Re lokela ho buisana le ba bang ka lintlha tseo re li thabetseng. Ho etsa lintho tsena ho tla re thusa ho boloka lipolelo tsa Jehova ‘ka har’a lipelo tsa rōna.’—Liprov. 4:20, 21.
5 A re Sebeliseng Seo re Ithutang Sona: Ka mor’a hore mor’abo rōna e mong a be teng kopanong ea setereke o itse: “Lenaneo le ne le ama motho e mong le e mong, le khothalletsa motho hore a hlahlobe boemo ba pelo ea hae le ba lipelo tsa litho tsa lelapa la hae, ’me a fane ka thuso ea Mangolo e lerato ha e hlokahala. Le entse hore ke elelloe boikarabelo ba ka ba ho thusa phutheho haholoanyane.” Mohlomong ba bangata ho rōna ba kile ba ikutloa ka tsela e tšoanang. Empa ha hoa lekana hore re tsamaee re ikutloa re khothalitsoe re bile re khatholohile. Jesu o itse: “Haeba le tseba lintho tsena, lea thaba haeba le li etsa.” (Joh. 13:17) Ka mafolofolo re lokela ho sebelisa lintlha tse re amang. (Bafil. 4:9) Ena ke eona tsela ea ho khotsofatsa litlhoko tsa rōna tsa moea.
[Lebokose le leqepheng la 5]
Thuisa ka Seo U se Utloang:
■ See se ama kamano ea ka le Jehova joang?
■ See se ama litšebelisano tsa ka le ba bang joang?
■ Nka se sebelisa joang bophelong ba ka le tšebeletsong?