Litaba Tse Molemo li Behiloe Tlhokomelong ea Rōna
1 Ke tokelo e kaakang hore ebe litaba tse molemo tsa Molimo li behiloe tlhokomelong ea rōna! (1 Bathes. 2:4) Le hoja ba bang ba ka hana molaetsa ona o matla, o hohela ba lipelo li tšepahalang joalokaha eka ke monko o monate. (2 Bakor. 2:14-16) Litaba tse molemo li bolela poloko ho ba li amohelang le ho li mamela. (Bar. 1:16) Re lokela ho etsa’ng ka litaba tsee tse molemo tse behiloeng tlhokomelong ea rōna?
2 Jesu le Baapostola: Jesu o ne a etelletsa boboleli ba litaba tse molemo pele. (Luka 4:18, 43) Leha a ne a khathetse ’me a lapile, lerato la hae ho batho le kananelo bakeng sa molaetsa ona li ile tsa mo susumelletsa ho o bolella ba bang. (Mar. 6:30-34) Ka lipolelo le ka liketso, o ile a etsa hore barutuoa ba hae ba utloisise bohlokoa ba mosebetsi oa boboleli ba ’Muso.—Mat. 28:18-20; Mar. 13:10.
3 Baapostola ba ile ba etsisa Jesu ka ho bolela molaetsa oa ’Muso ka cheseho. Esita leha ba ne ba shapuoa le ho laeloa ho khaotsa ho bolela, “ba tsoela pele ba sa khaotse ho ruta le ho bolela litaba tse molemo.” (Lik. 5:40-42) Moapostola Pauluse o ile a etsa mosebetsi ona ka mafolofolo. (1 Bakor. 15:9, 10; Bakol. 1:29) O ile a tšoantša tokelo ea ho bolela litaba tse molemo le molato oo a nang le oona ho motho e mong, ’me o ne a ikemiselitse ho tela boiketlo ba hae e le hore a o lefe.—Lik. 20:24; Bar. 1:14-16.
4 Tokelo ea Rōna Kajeno: Ho ananela mosebetsi ona o halalelang o behiloeng tlhokomelong ea rōna ho tla re susumelletsa ho batla litsela tsa ho eketsa karolo ea rōna mosebetsing oa boboleli. (Bar. 15:16) Edward, ea neng a holofetse o ne a tloaetse ho lula haufi le monyako oa hotele setulong sa hae sa likooa le ho bolella batho ka tumelo ea hae. Leha ho le joalo, kaha o ne a batla ho etsa ho eketsehileng, setuloana sa hae se ile sa etsetsoa sebaka se khethehileng ka har’a koloi, ’me a sebelisa koloi ena ho bula maliboho ka lilemo tse ngata, a tsamaea lik’hilomithara tse likete ha a ntse a etsa mosebetsi ona. Joaloka Edward, kajeno ba bangata ba lokisitse maemo a bona e le hore ba ka etsa ho eketsehileng ho phatlalatseng litaba tse molemo.
5 Joaloka Jesu le baapostola, kajeno e se eka kamehla re ka etelletsa mosebetsi oa boboleli pele bophelong ba rōna. Ka ho etsa joalo, re bontša hore re rata batho ’me re ananela litaba tse molemo tse behiloeng tlhokomelong ea rōna.