Ntlafatsa Bokhoni ba Hao Boboleling​—Thusa Liithuti Tsa Bibele Hore li Inehele li be li Kolobetsoe

KE HOBANE’NG HA E LE HABOHLOKOA?: Hore liithuti tsa Bibele li khahlise Jehova, li lokela ho inehela ho eena le ho kolobetsoa. (1Pe 3:21) Ba phelang tumellanong le boinehelo ba bona ba tla lula ba e-na le kamano e ntle le Molimo. (Pes 91:1, 2) Mokreste o lokela ho inehela ho Jehova, eseng ho motho, mosebetsi kapa mokhatlo. Ka lebaka leo, liithuti li lokela ho ikemisetsa ho rata Molimo.—Bar 14:7, 8.

RE KA HO ETSA JOANG?:

• Ha u khanna thuto, bolela hore na taba eo le buisanang ka eona e re ruta’ng ka Jehova. Khothalletsa seithuti ho bala Bibele kamehla le ho rapela Jehova ‘se sa phetse.’—1Th 5:17; Jak 4:8

• Se khothalletse ho inehela ho Jehova le ho kolobetsoa se be se ikemisetse ho ba le kamano e ntle le eena. Hape u ka se thusa ho finyella sepheo seo ka ho se tataisa hore se arabe libokeng kapa se pakele baahelani le basebetsi-’moho. Hopola hore Jehova ha a qobelle batho hore ba mo sebeletse. Motho o lokela ho iketsetsa qeto ea ho inehela.—De 30:19, 20

• Khothalletsa seithuti sa hao ho etsa liphetoho e le hore se khahlise Jehova ’me se tšoanelehe hore se kolobetsoe. (Lipr 27:11) Ho ka etsahala hore ebe seithuti se na le mekhoa e mebe eo ho leng thata ho e tlohela, kahoo motho ea se khannelang thuto o lokela ho tsoela pele ho se thusa ho lahla botho ba khale le ho apara bo bocha. (Ef 4:22-24) Buisana le sona ka lihlooho tse hlahang Molula-Qhooeng tse reng “Bibele e Fetola Batho”

• Se bolelle hore na ke lintho life tse ’nileng tsa u thabisa ha u ntse u sebeletsa Jehova.—Esa 48:17, 18