Litšupiso Tsa Bukana ea Seboka sa Bophelo le Tšebeletso ea Rona
LA 2-8 MAY
MATLOTLO A TSOANG BIBELENG | 1 SAMUELE 27-29
“Leqheka la Davida la Ntoa”
it-1-E 41
Akishe
Ha Saule a ne a batla ho bolaea Davida, Davida o ile a balehela naheng ea Morena Akishe ka makhetlo a mabeli. Lekhetlong la pele bahlanka ba Akishe ba ile ba mo qosa ka hore ke sera, kahoo Davida o ile a iphetola lehlanya ’me Akishe o ile a re ba mo tlohele. (1Sa 21:10-15; Pes 34:Sehloohoana; 56:Sehloohoana) Ha Davida a ea naheng ea Akishe ka lekhetlo la bobeli o ne a e-na le banna ba 600 ba ntoa le malapa a bona. Akishe o ile a re ba lule Ziklage ’me ba ile ba lula moo selemo le likhoeli tse ’nè. Nakong eo, Davida o ne a ntse a futuhela Bageshure, Bagireze le Baamaleke empa o ile a etsa hore Akishe a nahane hore o ntse a hlasela metse ea Juda. (1Sa 27:1-12) Akishe o ile a mo kholoa hoo qetellong a ileng a etsa Davida mohlokomeli oa hae ha Bafilista ba ne ba il’o hlasela Morena Saule. “Likhosana” tsa Bafilista li ne li sa batle hore Davida le bahlanka ba hae ba ee ntoeng le bona. Kahoo li ile tsa phehella Akishe hore a re ba khutlele morao eaba ka motsotso oa ho qetela, Akishe o re ba khutlele Ziklage. (1Sa 28:2; 29:1-11) Ha Davida e se e le morena o ile a loantša Bagathe empa Akishe ha aa ka a bolaoa. Le nakong eo Solomone e neng e le morena, o ne a ntse a phela.—1Ma 2:39-41; sheba GATH.
Barabʼabo Rona ba Bacha, le ka Etsaʼng Hore Batho ba Bang ba le Tšepe?
8 Nahana ka bothata bo bong boo Davida a ileng a ba le bona. Ka mor’a hore a tlotsoe hore e be morena, o ile a lokela ho ema lilemo tse ngata pele e ka ba morena oa Juda. (1 Sam. 16:13; 2 Sam. 2:3, 4) Nakong eo eohle, o ile a thusoa ke’ng hore a lete ka mamello? Ho e-na le hore a nyahame, Davida o ile a nahana haholo ka hore na a ka etsa’ng. Ka mohlala, ha e ntse e le mophaphathehi naheng ea Bafilista, o ile a sebelisa monyetla oo a neng a e-na le oona ho loantša lira tsa Baiseraele. Ka ho etsa joalo, o ne a sireletsa meeli ea Juda.—1 Sam. 27: 1-12.
it-2-E 245 ¶6
Leshano
Bibele e khahlanong le leshano, haholo haeba le le kotsi. Empa sena ha se bolele hore motho o qobelletsoe ho bua ’nete ho motho ea se nang tokelo ea ho tseba taba e itseng. Jesu Kreste o ile a re: “Le se ke la fa lintja se halalelang, kapa la lahlela liperela tsa lona ka pel’a likolobe, e le hore le ka mohla li se ke tsa li hatakela ka maoto eaba lia reteleha ’me lia le rusolla.” (Mat 7:6) Ke kahoo ka linako tse ling Jesu a sa kang a fana ka lintlha tse feletseng kapa hona ho araba lipotso tse itseng haeba li ne li ka beha ba bang kotsing. (Mat 15:1-6; 21:23-27; Joh 7:3-10) Ba bang ba ileng ba etsa se tšoanang ke Abrahama, Isaka, Rahaba le Elisha hobane le bona ha baa ka ba bolella batho bao e neng e se barapeli ba Jehova lintlha tse feletseng ka taba e itseng.—Ge 12:10-19; khaolo ea 20; 26:1-10; Jos 2:1-6; Jak 2:25; 2Ma 6:11-23.
Matlotlo a Patiloeng
Na Bafu ba ka Thusa ba Phelang?
Ak’u nahane ka taba ena hantle. Bibele e bolela hore motho ha a shoa “o khutlela leroleng la hae” le hore “menahano ea hae ea timela.” (Pesaleme ea 146:4) Saule le Samuele ba ne ba tseba hantle hore Molimo o nyatsa batho ba ikopanyang le batho ba buisanang le bafu. Etsoe pejana Saule o ne a ile a etella pele ha ho ne ho tlosoa lintho tse sebelisanang le meea naheng eo.—Levitike 19:31.
Ak’u ipotse: Haeba Samuele e ne e le moea o neng o ntse o phela, na o ne a tla tlola molao oa Molimo ebe o sebelisana le motho ea buisanang le bafu e le hore a kopane le Saule? Jehova o ne a hanne ho bua le Saule. Na ho ne ho ka etsahala hore motho ea buisanang le bafu a qobelle Molimo ea Matla ’Ohle hore a bue le Saule a sebelisa Samuele ea shoeleng? Che. Ka ho hlakileng, motho eo ea neng a shebahala eka ke Samuele, e ne e se moprofeta oa Molimo ea tšepahalang. E ne e le sebopuoa sa moea, e leng modemona ea khopo ea ileng a iketsa eka ke Samuele.
LA 9-15 MAY
MATLOTLO A TSOANG BIBELENG | 1 SAMUELE 30-31
“Lumella Jehova Hore a U Matlafatse”
Tšaba Jehova ’me U Thabe!
12 Ho tšaba Jehova ha hoa ka ha etsa feela hore Davida a se ke a etsa liphoso. Ho ile ha mo matlafatsa hore ha a le maemong a thata a nke khato e matla le e bohlale. Ka nako e etsang selemo le likhoeli tse ’nè, Davida le banna ba hae ba ile ba ipatela Saule Ziklage naheng ea Bafilista. (1 Samuele 27:5-7) Ka lekhetlo le leng ha banna ba Davida ba le sieo, Baamaleke ba futuhileng ba ile ba chesa motse eaba ba nkela banna bao basali, bana le mehlape kaofela. Ha Davida le banna ba hae ba khutla ’me ba bona se etsahetseng, ba ile ba bokolla. Ka potlako feela masoabi a ile a fetoha khalefo, ’me banna ba Davida ba bolela hore ba tla mo tlepetsa ka majoe. Le hoja Davida a ile a tšoenyeha, ha aa ka a nyahama. (Liproverbia 24:10) Ho tšaba Molimo ho ile ha mo susumelletsa hore a rapele Jehova, ’me o ile “a imatlafatsa ka Jehova.” Ka thuso ea Molimo, Davida le banna ba hae ba ile ba tšoara Baamaleke eaba ba khutlisa ntho e ’ngoe le e ’ngoe.—1 Samuele 30:1-20.
Jehova o re Sireletsa Bakeng sa Poloko
14 Davida o ile a thulana le maemo a mangata a sithabetsang bophelong ba hae. (1 Sam. 30:3-6) Mantsoe a hae a bululetsoeng a bontša hore Jehova o ne a tseba kamoo a ikutloang kateng. (Bala Pesaleme ea 34:18; 56:8.) Le rona Molimo oa tseba hore na re ikutloa joang. Ha re ‘robehile lipelo’ kapa re ‘sithabetse moeeng,’ o ba haufi le rona. Sena se ka ’na sa re khothatsa joalokaha se ile sa khothatsa Davida ea ileng a bina a re: “Ke tla thaba ’me ke nyakalle ka lebaka la mosa oa hao o lerato, ka hore ebe u bone mahloreho a ka; u tsebile ka mahlomola a moea oa ka.” (Pes. 31:7) Empa Jehova ha a hlokomele mahlomola a rona feela. O re matlafatsa ka hore a re tšelise a be a re khothatse. Tsela e ’ngoe eo a etsang sena ka eona ke ka liboka tsa Bokreste.
Matlotlo a Patiloeng
Lintlha-kholo Tsa Buka ea Samuele oa Pele
30:23, 24. Qeto ena, e thehiloeng ho Numere 31:27, e bontša hore Jehova o ananela ba etsang mesebetsi e tšehetsang ba bang ka phuthehong. Kahoo, eng kapa eng eo re e etsang, a re e ‘sebetseng ka moea oohle joalokaha eka re sebeletsa Jehova, eseng batho.’—Bakolose 3:23.
LA 16-22 MAY
MATLOTLO A TSOANG BIBELENG | 2 SAMUELE 1-3
“Re Ithuta’ng ho Koli-ea-Malla e Bitsoang ‘Seqha’?”
Hlompha ba Filoeng Matla a ho U Laela
9 Na Davida o ile a ba mahlomoleng ha a ne a tujoa? Davida o ile a hoeletsa ho Jehova: “Batho ba sehloho ba batla bophelo ba ka.” (Pesaleme ea 54:3) O ile a tšollela pelo ea hae ho Jehova: “Ntoele ho bao e leng lira ho ’na, Molimo oa ka! . . . Banna ba bohale ba nkopanetse, ke se na molato, leha e le sebe. Leha ke se na molato, ba matha ba ntlhomeletse. Falimeha, u tle ho ’na, u talime!” (Pesaleme ea 59:1-4) Na u kile oa ikutloa ka tsela e joalo—hore ha ho phoso eo u e etselitseng motho ea nang le matla a ho laela, leha ho le joalo o u setse-setse morao? Davida ha aa ka a hloleha ho bontša tlhompho ho Saule. Ha Saule a shoa, ho e-na le hore Davida a nyakalle, o ile a qapa koli-ea-malla: “Saule le Jonathane ba ne ba rateha, ba khahleha ho pheleng ha bona . . . ba ne ba le lebelo ho feta lintsu, ba le matla ho feta litau. Oho, baroetsana ba Iseraele, llelang Saule.” (2 Samuele 1:23, 24) Ke mohlala o motle hakaakang oa ho bontša tlhompho ea sebele ho motlotsuoa oa Jehova, le hoja Saule a ne a foselitse Davida!
Ho Eka ke Pontšo e Tšosang ea Mehla ea Bofelo!
8 Bibele e boetse e bua ka batho ba bangata ba tšepahalang. A re ke re bueng ka ba babeli ba bona ’me re bone seo re ka ithutang sona ho bona, re qale ka monna ea ileng a tšepahala ho Davida. Mohlomong Jonathane, e leng mora e moholo oa Morena Saule, e ka be e bile mohlahlami boreneng ba Iseraele. Leha ho le joalo, Jehova o ile a khetha Davida hore e be eena morena oa Iseraele ea latelang. Jonathane o ile a hlompha qeto ea Molimo. Ha aa ka a ba lefufa eaba o nka hore Davida ke sera. Ho e-na le hoo, “moea oa Jonathane [o ile] oa tlamahana le moea oa Davida” ha Jonathane a ne a etsa kano ea hore o tla tšepahala ho Davida. O ile a ba a fa Davida liaparo tsa hae, sabole, seqha le lebanta, e le ha a mo apesa tlotla ea borena. (1 Sam. 18:1-4) Jonathane o ile a etsa sohle seo a neng a ka se khona ho ‘matlafatsa letsoho la Davida,’ hoo a bileng a beha bophelo ba hae kotsing hore a emele Davida ka pel’a Saule. Ka botšepehi Jonathane o ile a re ho Davida: “U tla ba morena oa Iseraele, ’me ke tla ba oa bobeli ho uena.” (1 Sam. 20:30-34; 23:16, 17) Ha ho makatse hore ebe ka mor’a lefu la Jonathane, Davida o ile a bolela kamoo a neng a mo rata kateng le kamoo a neng a utloile bohloko kateng ka hore a mo binele koli-ea-malla.—2 Sam. 1:17, 26.
Matlotlo a Patiloeng
it-1-E 369 ¶2
Mor’eso
Lentsoe “Mor’eso” le boetse le sebetsa ho batho ba sebetsang ’moho ho finyella morero o itseng. Ka mohlala, Morena Hirame oa Tyre o ile a re Morena Solomone ke mor’abo. Lebaka e ne e se feela hobane le eena e ne e le morena empa ho ka etsahala hore e ne e le hobane ka bobeli ba bona, ba ne ba fana ka patsi le lintho tse ling bakeng sa tempele. (1Ma 9:13; 5:1-12) Davida o ile a re: “Bonang! Kamoo ho leng hotle le kamoo ho khahlisang kateng ha bara ba motho ba lula hammoho bonngoeng!” Mantsoe ana a bontša hore taba ea hore batho ke bana ba motho, ha se eona feela e etsang hore ho be le khotso le kutloano pakeng tsa bona. (Pes 133:1) Ha e le hantle Davida o ile a bitsa Jonathane mor’abo, eseng hobane e ne e le bana ba motho empa hobane ba ne ba ratana ebile ba rata le lintho tse tšoanang. (2Sa 1:26) Metsoalle e etsang lintho ka tsela e tšoanang le e nahanang ka tsela e tšoanang, le hoja lintho tseo e ka ba tse mpe, ba bitsoa bana ba motho.—Lipr 18:9.
LA 23-29 MAY
MATLOTLO A TSOANG BIBELENG | 2 SAMUELE 4-6
“Lula U Ikemiselitse ho Hlompha Jehova”
Lintlha-kholo Tsa Buka ea Samuele oa Bobeli
6:1-7. Le hoja Davida a ne a e-na le sepheo se setle, boiteko ba hae ba ho tsamaisa Areka ka koloi e ne e le ho tlola taelo ea Molimo ’me bo ile ba hloleha. (Exoda 25:13, 14; Numere 4:15, 19; 7:7-9) Hore ebe Uza o ile a tšoara Areka ho bontša hore ho ba le sepheo se setle ha ho fetole seo Molimo a batlang hore se etsoe.
Kamehla Jehova o Etsa se Nepahetseng
20 Hopola hore e tlameha ebe Uza o ne a tseba Molao hantle. Areka e ne e emela boteng ba Jehova. Molao o ne o boletse ka ho hlaka hore e se ke ea angoa ke batho ba sa lumelloang, o lemosa ka ho totobetseng hore ba tlolang taelo eo ba ne ba tla bolaoa. (Numere 4:18-20; 7:89) Ka hona, ho tsamaisoa ha lebokose leo le halalelang e ne e se mosebetsi o lokelang ho nkoa habobebe. Kamoo ho bonahalang kateng, Uza e ne e le Molevi (le hoja e ne e se moprista), kahoo e tlameha ebe o ne a tseba Molao. Hape, lilemo pejana ho moo Areka e ne e isitsoe habo hore e bolokoe teng. (1 Samuele 6:20–7:1) E ne e lutse moo ka lilemo tse ka bang 70, ho fihlela Davida a khetha ho e fallisa. Kahoo ho ka etsahala hore ebe Uza o ne a tseba melao e amanang le Areka ho tloha bongoaneng.
Kamehla Jehova o Etsa se Nepahetseng
21 Joalokaha ho boletsoe pejana, Jehova a ka lemoha se ka lipelong. Kaha Lentsoe la hae le re seo Uza a se entseng e ne e le ‘ketso e hlokang tlhompho,’ mohlomong Jehova o ile a bona sepheo se itseng sa boithati se sa senoloeng ka ho hlaka tlalehong eo. Na mohlomong Uza e ne e le motho ea iketelletsang pele, ea tloaetseng ho tlola meeli e loketseng? (Liproverbia 11:2) Na ho hlahella pontšeng a tsamaisa Areka eo lelapa labo le neng le e hlokometse ho ile ha etsa hore a ikutloe e le motho oa bohlokoa? (Liproverbia 8:13) Na Uza o ne a se na tumelo hoo a neng a nahana hore letsoho la Jehova le lekhutšoanyane haholo hore le tsitsise lebokose leo le halalelang le neng le tšoantšetsa boteng ba Hae? Ho sa tsotellehe hore na lebaka e ne e le lefe, re ka kholiseha hore Jehova o ile a etsa se nepahetseng. Mohlomong o ile a bona ntho e itseng pelong ea Uza e ileng ea etsa hore a lihe kahlolo ka potlako.—Liproverbia 21:2.
Matlotlo a Patiloeng
Kamehla Lahlela Meroalo ea Hao ho Jehova
Davida e le morena o ile a tlameha ho jara boikarabelo bo itseng bakeng sa sena. Boitšoaro ba hae bo bontša hore ka linako tse ling esita le bao ba nang le kamano e ntle le Jehova ba ka ’na ba sitoa ho itšoara maemong a lekang. Qalong Davida o ile a halefa. Hamorao o ile a tšoha. (2 Samuele 6:8, 9) Kamano ea hae ea ho tšepa Jehova e ile ea beoa tekong haboima. Lena e ne e le lekhetlo leo ho bonahalang a ile a hloleha ho lahlela moroalo oa hae ho Jehova, ka ho se latele litaelo tsa hae. Na mohlomong boo e ka ba boemo ka rona ka linako tse ling? Na le ka mohla re ke re behe Jehova molato ka mathata a hlahisoang ke ho hlokomoloha litaelo tsa hae?—Liproverbia 19:3.
LA 30 MAY–LA 5 JUNE
MATLOTLO A TSOANG BIBELENG | 2 SAMUELE 7-8
“Jehova o Etsa Selekane le Davida”
‘Ka Sebele ’Muso oa Hao e Tla ba o Tiileng’
Jehova o angoa ke takatso ea Davida e tlohang botebong ba pelo. Tumellanong le boinehelo ba Davida le boprofeta, Molimo o etsa selekane le Davida sa hore O tla hlahisa e mong lelokong la hae la borena ea tla busa ka ho sa feleng. Nathane o bolella Davida tšepiso ea Molimo e tiileng: “Ka sebele ntlo ea hao le ’muso oa hao e tla ba tse tiileng ka pel’a hao ho isa nakong e sa lekanyetsoang; terone ea hao e tla tiisoa ka thata ho isa nakong e sa lekanyetsoang.” (Temana ea 16) Mojalefa oa selekane see, Ea tla busa ka ho sa feleng, ke mang?—Pesaleme ea 89:20, 29, 34-36.
‘Ka Sebele ’Muso oa Hao e Tla ba o Tiileng’
Jesu oa Nazaretha e ne e le setloholo sa Davida. Ha lengeloi le phatlalatsa tsoalo ea Jesu, le ile la re: “Jehova Molimo o tla mo fa terone ea ntat’ae Davida, ’me o tla busa e le morena oa ntlo ea Jakobo ka ho sa feleng, ’me ’muso oa hae o ke ke oa e-ba le bofelo.” (Luka 1:32, 33) Ka lebaka leo, selekane se entsoeng le Davida se ile sa phethahala ho Jesu Kreste. Kahoo ho busa ha hae ha hoa itšetleha ka khetho ea motho, empa ho itšetlehile ka tšepiso ea Molimo e tiileng, e mo nehang tokelo ea ho busa ka ho sa feleng. A re hopoleng hore kamehla litšepiso tsa Molimo lia phethahala.—Esaia 55:10, 11.
E-ba le Tumelo e sa Thekeseleng ’Musong
14 Nahana ka seo Jehova a ileng a se tšepisa Morena Davida oa Iseraele ea boholo-holo ha a etsa selekane sa Davida. (Bala 2 Samuele 7:12, 16.) Jehova o ile a etsa selekane sena le Davida ha e ntse e le morena Jerusalema, ’me a mo tšepisa hore Mesia o tla hlaha lesikeng la hae. (Luka 1:30-33) Jehova o ile a boela a totobatsa leloko leo peo e neng e tla hlaha ho lona le hore mojalefa oa Davida o ne a tla ba le “tokelo ea molao” ea ho busa ’Musong oa Bomesia. (Ezek. 21:25-27) Jesu o ne a tla tiisa borena ba Davida ka thata “ho isa nakong e sa lekanyetsoang.” Ha e le hantle, peo ea Davida “e tla ba teng ho isa nakong e sa lekanyetsoang, le terone ea hae joaloka letsatsi.” (Pes. 89:34-37) Puso ea Bomesia e ke ke ea e-ba le bobolu, ’me litlhohonolofatso tsa eona e tla ba tsa ka ho sa feleng!
Matlotlo a Patiloeng
it-2-E 206 ¶2
Matsatsi a ho Qetela
Boprofeta ba Balame. Pele Baiseraele ba kena Naheng e Tšepisitsoeng moprofeta Balame o ile a bua le Morena oa Bamoabe e leng Balake a re: “Tloo, e-re ke u eletse ka seo sechaba sena [Baiseraele] se tla se etsa ho batho ba heno hamorao qetellong ea matsatsi. . . . Ka sebele naleli e tla tsoa ho Jakobo, ’me ruri lere la borena le tla hlaha ho Iseraele. Ka sebele o tla pshatla litlhafunelo tsa hlooho ea Moabe le mahata a bara bohle ba morusu oa ntoa.” (Nu 24:14-17) Naleli eo ho buuoang ka eona karolong ea pele ea boprofeta bona, ke Davida, ea ileng a hlola Bamoabe. (2Sa 8:2) Ho latela boprofeta bona, ‘qetello ea matsatsi’ e qalile ha Davida e e-ba morena. Kaha Davida o ne a tšoantšetsa Jesu joaloka Morena oa Bomesia, boprofeta bona bo ne bo tla phethahala ho Jesu nakong eo a hlolang lira tsa hae.—Esa 9:7; Pes 2:8, 9.
LA 6-12 JUNE
MATLOTLO A TSOANG BIBELENG | 2 SAMUELE 9-10
“Davida o Ile a Bontša Mosa”
Ka Sebele, U ka Fumana Thabo
Davida o ile a ngola a re: “Ho thaba mang kapa mang ea nahanelang motho ea tlaase.” O ile a tsoela pele: “Jehova o tla mo pholosa letsatsing la tlokotsi. Jehova o tla mo lebela ’me a mo boloke a phela. Ho tla phatlalatsoa hore o thabile.” (Pesaleme ea 41:1, 2) Ho nahanela ka lerato hoo Davida a ileng a ho bontša Mefiboshethe, e leng mora ea holofetseng oa motsoalle ea ratehang oa Davida, Jonathane, ke mohlala o motle oa boikutlo bo nepahetseng bo lokelang ho bontšoa motho ea tlaase.—2 Samuele 9:1-13.
Lintlha-kholo Tsa Buka ea Samuele oa Bobeli
9:1, 6, 7. Davida o ile a phethahatsa tšepiso ea hae. Le rona re lokela ho phethahatsa litšepiso tsa rona.
Ba Ile ba Loana le Meutloa Nameng ea Bona
10 Lilemo tse itseng hamorao, ka lebaka la ho rata Jonathane haholo, Morena Davida o ile a bontša Mefiboshethe mosa o lerato. Davida o ile a mo fa thepa eohle ea Saule ’me a abela Tsiba molebeli oa Saule hore a hlokomele tšimo ena. Hape Davida o ile a re ho Mefiboshethe: ‘U tla ja bohobe tafoleng ea ka kamehla.’ (2 Samuele 9:6-10) Ha ho pelaelo hore mosa oa Davida o lerato o ile oa tšelisa Mefiboshethe ’me oa fokotsa bohloko bo neng bo bakoa ke kholofalo ea hae. Ke thuto e ntle hakaakang! Le rona re lokela ho bontša mosa ho ba tobaneng le moutloa nameng.
Matlotlo a Patiloeng
it-1-E 266
Litelu
Mehleng ea boholo-holo batho ba neng ba phela ka Bochabela, ho akarelletsa le Baiseraele, ba ne ba nka monna ea nang le litelu a na le seriti. Molao oa Molimo ho Baiseraele o ne o ba hanela ho kuta moriri oa bona o mahlakoreng, e leng moriri o pakeng tsa tsebe le leihlo le ho senya mathoko a litelu tsa bona. (Le 19:27; 21:5) Lebaka ke hobane batho ba bang ba ne ba kuta moriri oa bona e le karolo ea bolumeli ba bona ba bohata.
LA 13-19 JUNE
MATLOTLO A TSOANG BIBELENG | 2 SAMUELE 11-12
“Loantša Litakatso Tse Fosahetseng”
U ka Qoba Maraba a Satane
10 Ka lebaka la ho ba meharo, Morena Davida o ile a lebala lintho tseo Jehova a mo fileng tsona tse kang, maruo, botumo le ho hlola lira tsa hae tse ngata. Davida le eena o ile a ananela le ho lumela hore lintho tseo Molimo a mo fileng tsona li ne li le ngata ‘ho feta kamoo a ka li phetang.’ (Pes. 40:5) Empa ho ile ha etsahala hore Davida a lebale lintho tseo Jehova a mo fileng tsona. O ne a se a sa khotsofalla lintho tseo a nang le tsona. Le hoja Davida a ne a e-na le basali ba bangata, o ile ba meharo eaba o batla mosali oa motho e mong. Mosali eo e ne le Bathe-sheba ’me monna oa hae e ne e le Uria Mohethe. Davida o ile a inahana boeena, eaba o etsa thobalano le Bathe-sheba eaba Bathe-sheba oa ima. Davida ha aa ka a etsa bohlola feela empa o ile a etsa hore Uria a bolaoe. (2 Sam. 11:2-15) Davida o ne a nahana’ng? Na o ne a nahana hore Jehova ha a ’mone? Mohlanka eo ea tšepahalang oa Jehova, o ile a oela lerabeng la ho ba meharo le ho inahana boeena eaba o ipakela mathata a mangata. Empa hamorao, Davida o ile a amohela phoso ea hae eaba oa baka. O ile a thaba haholo ha Jehova a mo tšoarela.—2 Sam. 12:7-13.
U ka Ikokobeletsa Bolaoli ba Jehova Joang, Hona Hobane’ng?
15 Jehova o ile a khetha Davida hore ebe hlooho ea lelapa la hae le ea sechaba sohle sa Iseraele. Kaha Davida e ne e le morena o ne a e-na le matla a maholo. Ka linako tse ling, o ile a sebelisa matla a hae hampe ’me a etsa liphoso tse kholo. (2 Sam. 11:14, 15) Empa o ile a ikokobelletsa Jehova eaba o amohela khalemelo. O ile a bolella Jehova mabina-bine a pelo ea hae. Hape o ile a leka kahohle ho mamela keletso ea Jehova. (Pes. 51:1-4) Ho phaella moo, o ne a ikokobelitse a bile a amohela likeletso tseo a neng a li fuoa, ho sa tsotellehe hore na o li fuoa ke banna kapa basali. (1 Sam. 19:11, 12; 25:32, 33) Davida o ile a ithuta liphosong tsa hae ’me a etsa hore ho sebeletsa Jehova ebe ntho ea bohlokoa ka ho fetisisa bophelong ba hae.
Lumella Melao le Melao-motheo ea Molimo Hore e Koetlise Letsoalo la Hao
7 Ha re batle ho iphapanyetsa melao ea Molimo ebe re utloa ka letlalo. Re ka ithuta liphosong tsa batho ba tlalehiloeng ka Bibeleng. Liproverbia 1:5 e re: “Motho ea bohlale o tla mamela ’me a amohele taeo e eketsehileng.” Ha re ithuta le ho nahanisisa ka litlaleho tse hlahang ka Bibeleng, re fumana litaelo tsa bohlokoa tse tsoang ho Molimo. Mohlala, nahana ka bohloko boo Morena Davida a ileng a bo utloa ka mor’a ho tlola molao oa Molimo ka ho etsa bofebe le Bathe-sheba. (2 Sam. 12:7-14) Ha re bala re bile re nahanisisa ka tlaleho ena, re ka ipotsa: ‘Morena Davida a ka be a ile a qoba boemo boo bo utloisang bohloko joang? Haeba nka thulana le boemo bo tšoanang, na ke tla khona ho itšoara? Na ke tla baleha joaloka Josefa kapa ke tla inehela joaloka Davida?’ (Gen. 39:11-15) Haeba re nahana ka litla-morao tse tlisoang ke ho etsa sebe, re tla imatlafatsa e le hore re ‘hloee se sebe.’
Matlotlo a Patiloeng
it-1-E 590 ¶1
Davida
Jehova o ile a bona seo Davida a ileng a se etsa ’me o ile a senola ketso eo ea hae e nyonyehang. Haeba Jehova a ile a lumella hore taba ea Davida le Bathe-sheba e sebetsoe ke baahloli tlas’a Molao oa Moshe, ka bobeli ba ka be ba ile ba bolaoa hammoho le lesea le neng le e-s’o ka le tsoaloa. (De 5:18; 22:22) Leha ho le joalo, Jehova o ile a sebetsa taba ea Davida ka boeena ’me o ile a mo bontša mohau ka lebaka la selekane sa ’Muso. (2Sa 7:11-16) Lebaka le leng e ne e le hobane Davida a ile a bontša mohau ho ba bang. (1Sa 24:4-7; bapisa le Jak 2:13) Hape, Jehova o ile a bona hore ka bobeli ba ne ba baketse phoso ea bona. (Pes 51:1-4) Empa ba ile ba fumana kotlo. Jehova o ile a sebelisa moprofeta Nathane hore a re ho Davida: “Bona! ke u hlahisetsa tlokotsi ka tlung ea hao.”—2Sa 12:1-12.
LA 20-26 JUNE
MATLOTLO A TSOANG BIBELENG | 2 SAMUELE 13-14
“Amnone o Ile a ba le Mathata Hobane o ne a Ichebile Boeena”
it-1-E 32
Absalome
Ho Bolaoa ha Amnone. Amnone o ile a rata khaitseli ea hae Tamare hobane o ne a le motle. Amnone o ile a iketsa ekare oa kula ’me a kopa hore Tamare e be eena ea mo tlisetsang lijo eaba oa mo beta. Amnone o ile a hloea Tamare ho feta kamoo a neng a mo rata kateng kahoo o ile a mo tebela. Tamare o ile a kopana le khaitseli ea hae Absalome ka mor’a hore a itšele ka molora hloohong le ho tabola seaparo sa hae se selelele sa ka holimo se metsero, se neng se mo khetholla e le moroetsana le morali oa morena. Hang-hang Absalome o ile a belaella Amnone kaha o ne a hlokometse hore o ne a e-na le maikutlo a lerato bakeng sa khaitseli ea hae. Absalome o ile a laela Tamare hore a se ke a bua ka taba ena ’me a mo nka hore a il’o lula le eena.—2Sa 13:1-20.
Na U Khona ho Itšoara?
11 Bibele e fana ka keletso mabapi le ba sa khoneng ho itšoara tabeng ea likamano tsa botona le botšehali. E boetse e fana ka litla-morao tse ka bang teng ho ba sitoang ho laola litakatso tsa bona. Haeba u tobana le boemo bo tšoanang le ba Kim, u tla be u etsa hantle ha u ka nahana ka tlaleho e hlahang ho Liproverbia khaolo 7 e buang ka mohlankana ea se nang boiphihlelo. U ka boela oa nahana ka tsela eo Amnone a ileng a e nka le litla-morao tse bosula tsa liketso tsa hae. (2 Sam. 13:1, 2, 10-15, 28-32) Batsoali ba ka thusa bana ba bona ho loanela ho itšoara le ho ba masene ha ho tluoa tabeng tsa ho ratana, mohlomong ba ka sebelisa Mangolo a ka holimo borapeling ba lelapa.
it-1-E 33 ¶1
Absalome
Ho ile ha feta lilemo tse peli. Nakong ea ho kutoa ha linku, Absalome o ile a etsa mokete Baale-hazore e lik’hilomithara tse ka bang 22 ka boroa ho Jerusalema ’me o ile a mema Davida le bara ba hae. Ha ntate oa hae a re a ke ke a khona ho tla moketeng, Absalome o ile a mo kopa ka tieo hore a romele mora oa hae oa letsibolo e leng Amnone bakeng sa hae. (Lipr 10:18) Ha mokete o ntse o tsoela pele, Absalome o ile a laela bahlanka ba hae hore ha Amnone a ‘nyakaletse ke veine’ ba mo bolaee. Ha bara ba bang ba Davida ba khutlela Jerusalema, Absalome o ile a balehela ho ntate-moholo oa hae oa Mosyria ea neng a le Geshure e neng e le ka bochabela ho leoatle la Galilea. (2Sa 13:23-38) “Sabole” eo moprofeta Nathane a ileng a bua ka eona, e ne e kene “ntlong” ea Davida ’me e ne e tla ba teng bophelo bohle ba hae.—2Sa 12:10.
Matlotlo a Patiloeng
Botle Boo e Hlileng e Leng Bona ba Bohlokoa
Ha ho bapisoa, nahana ka Absalome, mora e mong oa Davida. O ile a ipaka e le motho e mobe ho sa tsotellehe botle ba hae bo neng bo tsotoa. Bibele e re ka eena: “Joale ha ho bapisoa le Absalome ho ne ho se monna e motle hakaalo Iseraele eohle hoo a rorisoang haholo hakaalo. O ne a se na sekoli ho tloha bohatong ba leoto ho isa har’a hlooho.” (2 Samuele 14:25) Leha ho le joalo, takatso ea Absalome ea bophahamo e ile ea mo susumelletsa hore e be lerabele le loantšang ntat’a lona le ho nka puso ka likhoka. O bile a beta lirethe tsa ntat’ae. Ka lebaka leo, Molimo o ile a halefela Absalome ’me a shoa habohloko.—2 Samuele 15:10-14; 16:13-22; 17:14; 18:9, 15.
Na u utloa u khahloa ke Absalome? Le hanyenyane. Ha e le hantle, e ne e le motho eo batho ba sa mo rateng. Ponahalo ea hae e ntle ha e ea ka ea koahela boikakaso le ho se tšepahale ha hae, leha e le hona hore e ile ea mo qobisa tlokotsi. Ka lehlakoreng le leng, Bibele e na le mehlala e mengata ea batho ba bohlale, ba ipiletsang bao ho seng letho le buuoang ka ponahalo ea bona. Ho hlakile hore hoo e neng e le habohlokoa e ne e le botle ba bona ba ka hare.
LA 27 JUNE–LA 3 JULY
MATLOTLO A TSOANG BIBELENG | 2 SAMUELE 15-17
“Absalome o Ile a Fetoha Lerabele Hobane a ne a Ikhohomosa”
it-1-E 860
Moetelli-pele
E ne e le ntho e tloaelehileng ka bochabela ho Asia hore limathi li mathe ka pel’a koloi ea morena ho etsa bonnete ba hore lintho li maemong a matle, ho phatlalatsa hore morena oa tla le ho mo thusa ka lintho tseo a li hlokang. (1Sa 8:11) Absalome le Adonija ba marabele, ba ile ba latela tloaelo ena e neng e etsoa ke marena ka hore ba behe limathi tse 50 hore li mathe ka pel’a likoloi tsa bona e le hore ba ka hlomphuoa ke batho.—2Sa 15:1; 1Ma 1:5; sheba RUNNERS.
Sebeletsa Molimo ea Fanang ka Tokoloho
5 Bibele e na le mehlala e mengata ea batho ba ileng ba susumetsa ba bang hampe. Mohlala o mong o joalo ke mora oa Morena Davida e leng Absalome. Absalome o ne a le sebopeho se setle ka tsela e ikhethang. Leha ho le joalo, ha nako e ntse e feta, joaloka Satane, o ile a itumella hore a be meharo ’me a rate maemo kaha o ile a tsoela borena ba ntata’e pelo le hoja a ne a se na tokelo ea ho ba morena. E le ha a leka ho inkela borena ka bolotsana, Absalome o ile a iketsa eka o tsotella sechaba sa habo sa Baiseraele ’me ka masene a fana ka maikutlo a hore morena eena ha a se tsotelle. Ka sebele, feela joalokaha Diabolose a ile a etsa serapeng sa Edene, Absalome o ile a iketsa eka o tsotella batho ba bang, empa ka nako e tšoanang ka bokhopo a senya ntate oa hae lebitso.—2 Sam. 15:1-5.
it-1-E 1083-1084
Hebrone
Ka mor’a lilemo tse ’maloa, mora oa Davida Absalome, o ile a khutlela Hebrone eaba o ntšetsa leano la hae pele la ho batla ho nkela ntate oa hae borena ka mahahapa. (2Sa 15:7-10) E ka ’na eaba Absalome o ile a qala sena Hebrone hobane e ne e le moo a neng a hlahetse teng. Mohlomong lebaka le leng ke hobane e ne e kile e-ba motse-moholo oa Juda o tummeng. Hamorao setloholo sa Davida e leng Morena Roboame, o ile a tsosolosa motse oa Hebrone. (2Likr 11: 5-10) Ka mor’a hore Juda e etsoe lesupi ke Bababylona le hore Bajuda ba khutle botlamuoeng, ba bang ba Bajuda ba ile ba lula Kiriathe-arba e Hebrone.—Ne 11:25.
Matlotlo a Patiloeng
Na U Tseba Lintlha Kaofela?
11 Le rona re ka utloisoa bohloko ke ha batho ba bua karolo e itseng ea litaba eo e leng ’nete ka rona empa ba qetella ka mashano a ka re senyang lebitso. Nahana ka mohlala oa Davida le Mefiboshethe. Davida o ile a ba mosa ho Mefiboshethe eaba o mo khutlisetsa tšimo ea ntate-moholo oa hae, Saule. (2 Sam. 9:6, 7) Leha ho le joalo, hamorao Davida o ile a utloa tlaleho e mpe ka Mefiboshethe. Davida o ile a betoa ke pelo eaba o nka lintho tsohle tsa Mefiboshethe le hoja a ne a e-s’o fumane lintlha tse feletseng. (2 Sam. 16:1-4) Hamorao Davida o ile a buisana le eena eaba o ipona molato ’me a khutlisetsa lintho tsohle ho eena. (2 Sam. 19:24-29) Davida a ka be a sa ka a hlokela Mefiboshethe toka hoja o ile a batla lintlha tse feletseng.