Bacha Baa Botsa

Na ho Fosahetse ho Tuma?

Tlatsa lentsoe le nepahetseng polelong e latelang:

․․․․․ ho molemo hore motho a tume.

A. Kamehla
B. Ka linako tse ling
C. Le ka mohla ha

KARABO e nepahetseng ke ea “B.” Hobane’ng? Hobane ho tuma ho bolela feela ho ratoa ke batho ba bangata—’me hase kamehla seo se fosahetseng! Bibele e ile ea bolela esale pele hore Bakreste e ne e tla ba “leseli la lichaba” ’me batho ba ne ba tla tla ho bona. (Esaia 42:6; Liketso 13:47) Ka kutloisiso ena, ho ka thoe Bakreste ba tumme.

Na u ne u tseba?

Jesu o ne a tumme. Esita le ha a sa le mocha, o ne “a amoheleha ho Molimo le ho batho.” (Luka 2:52) Bibele e re ha Jesu e se e le motho e moholo, ‘bongata bo boholo bo ile ba mo latela ho tsoa Galilea le Dekapolise le Jerusalema le Judea le ho tsoa ka lehlakoreng le leng la Jordane.’—Matheu 4:25.

Ke hobane’ng ha ho ne ho loketse hore a tume hakaale?

Ke hobane Jesu o ne a sa batle ho rorisoa ke batho kapa ho hahamalla botumo ’me o ne a se tsietsing ea ho batla ho amoheloa ke batho ba bang. Jesu o ne a etsa lintho tse nepahetseng—e leng se neng se etsa hore ka linako tse ling batho ba mo ele hloko. (Johanne 8:29, 30) Leha ho le joalo, Jesu o ile a lemoha hore batho bao ba neng ba atisa ho feto-fetoha, ba ne ba tla mo rata ka nakoana feela. O ne a tseba taba ea hore ha nako e ntse e ea, batho bao ba ne ba tla mo bolaea!—Luka 9:22.

Ntlha ea Bohlokoa:

Botumo bo tšoana le leruo. Hase kamehla e leng phoso ho ba le lona. Bothata e ba hore na batho ba etsa’ng e le hore ba le fumane—kapa ba lule ba e-na le lona.

Tlhokomeliso!

Bacha ba bangata ba ka etsa ntho leha e le efe e le hore ba tume. Ba bang ba rata ho khahlisa batho le ho latela bongata. Ba bang ke bo-mpoli ba lekang ho qobella batho ba bang hore ba ba rate—esita le haeba ba ba rata hobane feela ba ba tšaba.a

Maqepheng a latelang, re tla tšohla litsela tseo tse peli tse kotsi tse etsang hore motho a tume. Joale re ntan’o sheba tsela e molemo haholoanyane.

Lihlooho tse ling tsa “Bacha Baa Botsa” li ka fumanoa mocheng oa boitsebiso oa Inthanete ho www.watchtower.org/ype

a Bibele e bua ka bo-mpoli ba neng ba bitsoa “Banefilime,” bao hape ba bitsoang ‘banna ba tummeng.’ Ba ne ba amehile haholo ka ho hōlisa botumo ba bona.—Genese 6:4.

TSELA E LEBISANG BOTUMONG

MOTHO EA KHAHLISANG BA BANG

Ke batla ho amoheloa ke batho ba bang.
E le hore ba nkamohele, ke lokela ho itšoara joaloka bona.

“Ke lekile ho fetola boitšoaro ba ka, e le hore ke tšoane le batho ba bang. Qalong ho ne ho bonahala eka kea atleha. Empa hamorao, ke ile ka elelloa hore ha ua lokela ho fetola seo u leng sona e le hore feela u amohelehe.”—Nicole.

Molao-motheo oa Bibele: “U se ke ua etsa ntho e itseng hobane feela batho bohle ba e etsa. . . . Ha ua lokela ho lumella batho ba joalo hore ba u susumelletse ho etsa lintho tse mpe.”—Exoda 23:2, Holy Bible—Easy to Read Version.

MPOLI

Ke se ke ntse ke ratoa, ’me ke batla hore ho lule ho le joalo.
Ke tla etsa ntho leha e le efe hore ke lule ke le motho ea hlaheletseng—le haeba seo se bolela ho hatakela ba bang.

“Hangata bana ba bang ba sehlōhō, ’me kaha bo-mpoli ba tumme haholo, ngoana ea lihlong o tla lumela hore ntho e ’ngoe le e ’ngoe eo ba e buang e nepahetse.”—Raquel.

Molao-motheo oa Bibele: “Kamoo le batlang hore batho ba le etse kateng, le ba etse ka tsela e tšoanang.”—Luka 6:31.

TSELA E MOLEMO
Ha u sebelisa lintlha tse tharo tse boletsoeng ka lehlakoreng le letšehali, u ka ’na ua lahleheloa ke botumo bo itseng—empa u tla ratoa ke batho ba molemo!

Tseba melao e u tataisang. Bibele e re batho ba hōlileng tsebong ke ba “koetliselitsoeng ho khetholla se nepahetseng le se fosahetseng.”—Baheberu 5:14.
Khomarela lintho tseo u li lumelang. E-ba joaloka Joshua, eo ka sebete a ileng a re: “Le ikhethele kajeno eo le tla mo sebeletsa . . . Empa ha e le ’na le ba ntlo ea ka, re tla sebeletsa Jehova.”—Joshua 24:15.
Kholiseha ka tsela eo u e khethileng. Moapostola Pauluse o ile a hopotsa Timothea a re: “Molimo ha aa re fa moea oa bokoala, empa o re file moea oa matla le oa lerato le oa ho hlaphoheloa kelellong.”—2 Timothea 1:7.