Uwezo Mukubwa wa Kuweka Habari wa ADN

WATUMIAJI wa kompyuta ao ordinatere wanaweza kuunda habari nyingi sana za kielektroniki zinazoweza kuwekwa na zinazoweza kupatikana wakati zinahitajiwa. Wanasayansi wanatumaini kubadilisha ufundi ambao wanatumia sasa ili kuweka habari kwa kuiga namna ya kuweka habari iliyo ya juu sana inayopatikana katika uumbaji, ni kusema, asidi deoksiribonikleiki (ADN).

Fikiria hili: ADN, inayopatikana katika chembe zilizo na uzima, ina mamiliare ya habari za kibiolojia. Nick Goldman, mwanabiolojia anayetumika kwenye Kituo cha Uchunguzi wa Habari za Biolojia, Ulaya, anasema hivi: “Tunaweza kutoa [ADN] kwenye mifupa ya wanyama wakubwa wenye manyoya . . . na kuelewa habari nyingi juu ya wanyama hao. Pia ni ndogo sana, na yenye uwezo mwingi na haihitaji nguvu yoyote ili kuiweka, kwa hiyo, ni vyepesi kuituma na kuiweka.” Je, ADN inaweza kuweka habari za kielektroniki ambazo zilitungwa na watu? Wachunguzi wanajibu ndiyo.

Wanasayansi walitengeneza ADN, na katika ADN hiyo waliweka maandishi ya siri, picha, na habari za kurekodiwa, kama vile tu vyombo vya kielektroniki vinavyoweka habari. Kisha wachunguzi waliweza kusoma bila kukosea habari zote zilizowekwa ndani. Wanasayansi wanaamini kwamba baada ya muda, kwa kutumia ufundi huo, gramu moja ya ADN ambayo watatengeneza itaweza kuweka habari zinazoweza kuchungwa katika CD 3 000 000 na kwamba habari hizo zote zinaweza kuchungwa kwa mamia ao kwa maelfu ya miaka. Inawezekana kwamba kwa kutumia ufundi huo, wataweza kuweka habari za kielektroniki za dunia yote. Inasemekana kuwa ADN ndiyo itakuwa “diski ngumu ya wakati unaokuja.”

Unawaza namna gani? Uwezo wa ADN wa kuweka habari ulijifanya wenyewe? Ao je, uliumbwa?