Ziara za Kurudia Huongoza Kwenye Mafunzo ya Biblia
1 Yesu aliamuru wafuasi wake si kuhubiri tu lakini pia ‘kufanya wanafunzi na kuwafundisha.’ (Mt. 28:19, 20) Mhubiri anatangaza, lakini mfundishaji anafanya zaidi. Anaagiza, anafafanua, na anatoa uhakikisho. Njia moja ambayo kwa hiyo tunafundisha wengine ni kwa kufanya ziara za kurudia kwa wale wanaopendezwa tukiwa na mradi wa kuanzisha mafunzo ya Biblia pamoja nao.
2 Ni kwa nani unapaswa kufanya ziara za kurudia? Usisahau kutembelea tena wale wote wanaokubali vichapo au wanaoonyesha hata kupendezwa kidogo na habari njema. Ikiwa unapata watu wanaopendezwa unapotoa ushahidi mahali pa watu wote, jaribu kupata anwani ya mtu au namba yake ya simu ili kusitawisha kupendezwa. Uwe mwenye kutazamia mema kuhusiana na kuanzisha mafunzo ya Biblia. Endelea kutafuta wale watakaokubali funzo la Biblia; yaelekea utawapata.—Mt. 10:11.
3 Onyesha Kupendezwa Kibinafsi: Kujitayarisha kwa ajili ya ziara ya kurudia yenye matokeo kunaanza wakati wa ziara ya kwanza. Waeneza-evanjeli wenye mafanikio huwa waangalifu ili kujua mambo yanayopendeza mwenye nyumba, nao hutumia mambo hayo kuwa msingi kwa ajili ya mazungumzo zaidi. Wengine huona kuwa jambo lenye faida kutokeza ulizo mwishoni mwa ziara ili kutayarisha mwenye nyumba kwa ajili ya ziara ijayo. Kupendezwa kwetu kwa unyofu na watu kunafanya tuendelee kuwafikiria hata baada ya kuachana nao, na kunatuchochea tuwatembelee tena bila kuchelewa. Ikiwezekana, jaribu kurudi wakati kupendezwa kunapokuwa hakujafifia—labda hata baada ya siku moja au mbili.
4 Unapofanya ziara ya kurudia, jaribu kujenga juu ya msingi ulioweka wakati wa mazungumzo yaliyotangulia. Jiwekee mradi wa kushiriki kila wakati angalau wazo moja la Kimaandiko lenye kujenga, na uwe tayari kusikiliza. Pata kujua mwenye nyumba vizuri zaidi. Kisha, kwenye ziara zifuatazo, shiriki naye kweli za Neno la Mungu zinazozungumzia mahangaiko yake moja kwa moja.
5 Tambua Nafasi za Kuanzisha Funzo la Biblia: Fanya ziara za kurudia ukiwa na mradi wa kuanzisha funzo la Biblia. Hilo linaweza kufanywaje? Sema kwamba ungependa kushiriki na mtu wazo moja lenye kupendeza, na ufungue kitabu Ujuzi au broshua Anataka kwenye fungu ambalo unafikiri litavutia mtu huyo. Someni fungu hilo, chunguzeni ulizo, na mzungumzie andiko moja au mawili yanayotajwa. Hilo linaweza kufanywa moja kwa moja mlangoni muda wa dakika tano au kumi. Malizia kwa kutokeza ulizo lenye kufuata na kuchukua mipango ili kuendeleza mazungumzo wakati mwingine.
6 Kusitawisha kupendezwa kokote tunakopata ni sehemu ya maana ya huduma yetu. Kwa hiyo, panga wakati katika programu yako ya kila juma ili kufanya ziara za kurudia. Kufanya hivyo kutaongezea huduma yako matokeo na kutaleta furaha halisi.
[Study Questions]
1. Kwa nini kazi ya kufanya ziara za kurudia ni ya maana sana?
2. Ni nani tunaopaswa kutembelea tena?
3, 4. Ni nini inayohusika katika kufanya ziara za kurudia zenye matokeo?
5. Ni nini njia rahisi inayoweza kutumiwa ili kuanzisha mafunzo ya Biblia?
6. Tunawezaje kuonyesha kwamba tunaelewa umaana wa kufanya ziara za kurudia?