Ujenzi wa Kimataifa wa Majumba ya Ufalme Katika Nchi Fulani za Ulaya
1 Mnamo miaka ya nyuma, kazi ya Mashahidi wa Yehova katika nchi nyingi za Ulaya, kutia na Ulaya Mashariki, ilizuiwa. Katika visa vingi, vizuizi hivyo vilikuwa vikali sana. Haikuwa rahisi kufanya mikutano waziwazi, na haikuwezekana kabisa kuwa na Jumba la Ufalme kwa ajili ya mikutano. Hata hivyo, mnamo miaka ya karibuni, “BWANA ametufanyia maneno makubwa; kwa hivi tunafurahi.”—Zab. 126:3.
2 Kuanzia mwaka wa 1983, ukandamizaji juu ya Mashahidi wa Yehova ulianza kulegezwa. Kufikia 1989, Mashahidi wa Yehova walikuwa wamekubaliwa kisheria katika Poland na Hungaria. Katika mwaka wa 1991, Mashahidi wa Yehova waliandikwa kisheria katika Urusi. Tangu wakati huo, kazi imesitawi katika Urusi na katika zile jamhuri zilizofanyiza Muungano wa Sovieti. Kati ya Machi 1996 na Oktoba 1998, Baraza Linaloongoza lilitoa kibali kwa maombi 359 ya mikopo kwa ajili ya ujenzi wa Majumba ya Ufalme kutoka ofisi za tawi zinazosimamia nchi 11 za Ulaya.
3 Unapotazama picha katika nyongeza hii, tafakari juu ya mambo makubwa na ya ajabu ambayo Yehova amefanya kwa ajili ya watu wake. (Zab. 136:4) Utafurahi kujua kwamba michango inayotolewa na ndugu ulimwenguni pote inatumiwa kwa njia bora kabisa, kupatana na yale aliyosema Yesu, kama inavyoandikwa kwenye Yohana 13:35: “Kwa hilo wote watajua kwamba nyinyi ni wanafunzi wangu, mkiwa na upendo miongoni mwenu wenyewe.”
4 Rumania, ambako Majumba ya Ufalme 36 yamejengwa tangu Julai 2000, ni moja ya nchi za Ulaya zinazofaidika na mpango wa kusaidia kujenga Majumba ya Ufalme katika nchi zisizo na mali nyingi. Kwa kutumia plani ileile kwa karibu Majumba yao yote ya Ufalme, Ukrainia ilijenga Majumba ya Ufalme 61 mnamo mwaka wa 2001, na mengine 76 mnamo mwaka wa 2002. Kwa msaada wa fedha zilizotolewa kuwa mchango kwa Hazina ya Majumba ya Ufalme, mamia ya Majumba ya Ufalme yamejengwa katika Bulgaria, Kroatia, Makedonia, Moldava, Urusi, na Serbia na Montenegro.
5 Haikuwa rahisi kujenga Majumba ya Ufalme katika nchi fulani, na jitihada nyingi zinapaswa kufanywa kabla ya kuanza ujenzi kabisa. Mara nyingi matayarisho ya ujenzi yanakula wakati. Kwa hiyo, gharama ya ujenzi wa Jumba la Ufalme katika sehemu hiyo ya Ulaya ni kubwa zaidi kuliko ilivyo katika sehemu nyingi za Afrika au Amerika ya Kusini. Hata hivyo, kwa sababu ya ongezeko kubwa katika hesabu ya wale wanaomwabudu Yehova, mamia ya Majumba ya Ufalme bado yanahitajiwa katika nchi za Ulaya zisizo na mali nyingi!
6 Ni jambo la kustaajabisha kama nini kuona ongezeko la haraka kama hilo katika ujenzi wa Majumba hayo ya Ufalme! Ushahidi bora umetolewa katika ujirani wa mahali ambapo majumba yamejengwa, kama mambo mengi yaliyoonwa yanavyoonyesha. Katika maeneo fulani, wenye mamlaka wa hapo wanavutiwa sana na roho ya ushirikiano inayoonyeshwa katika kufuata miongozo ya ujenzi.
7 Isaya alitabiri ifaavyo kuhusu ongezeko ambalo lingetukia katika ibada ya kweli wakati huu. Kupitia nabii huyo Mungu alisema: “Mimi, BWANA, nitafanya maneno haya mbio kwa wakati wake.” (Isa. 60:22) Hakika, miaka kumi ya nyuma imeonekana kuwa wakati wa Yehova wa kutoa ongezeko katika Ulaya Mashariki. Yehova na aendelee kumwaga baraka zake zenye kutajirisha juu ya jitihada zetu za kuharakisha ujenzi wa Majumba ya Ufalme katika nchi nyingi huku tukitegemeza zaidi Hazina ya Majumba ya Ufalme! Jambo hilo litafanya Majumba ya Ufalme mengine mengi yaongezwe katika nchi zisizo na mali nyingi. Litachangia ukuzi wa ibada safi katika sehemu nyingi za Ulaya na litafanya ushahidi mkubwa zaidi utolewe mpaka “mwisho wa dunia.”—Mdo. 13:47, ZSB.
[Picha kwenye ukurasa wa 3]
Jengo Lenye Majumba ya Ufalme Mengi, Moscow, Urusi
[Picha kwenye ukurasa wa 4-6]
Majumba ya Ufalme Mapya Katika Ulaya Mashariki
Strumica, Makedonia
Daruvar, Kroatia
Sokal, Wilaya ya Lviv, Ukrainia
Bitola, Makedonia
Sofia, Bulgaria
Plovdiv, Bulgaria
Krasnooktyabrskiy, Eneo la Maykop, Urusi
Bački Petrovac, Serbia na Montenegro
Tlumach, Wilaya ya Ivano-Frankivsk, Ukrainia
Rava-Ruska, Wilaya ya Lviv, Ukrainia
Stara Pazova, Serbia na Montenegro
Zenica, Bosnia na Herzegovina
Sokal, Wilaya ya Lviv, Ukrainia
Zhydachiv, Wilaya ya Lviv, Ukrainia