Mukanda ku Baroma
10 Mwe ba lupua, kelia kitonene mutima wane* pamo ni lipepo lyane lya kumulilila Leeza pa lwabo, kakiine ni juu ya kunti bakabe kupusuka. 2 Kunti nasininkizia nangue bene bali ni mute pa lwakue Leeza, inzi apana kukonkana ni kumana kusili na kilubo. 3 Juu ya kusimana belia bimwenue na Leeza kuya byaolokele, bene baakonkele mafunde abo bene. Kekio kyaalengiizie te kunti baye banakila mafunde akue Leeza palua kintu kyolokele. 4 Pantu Kristu i mwisio wa Sheria, lonu kila muntu olia ali walangilila kiketekelo muli wene, amwenue kuya waolokele.
5 Musa andikile evi palua kufikiila kooloka kukonkana ni Sheria: “Muntu olia ali wakita bebi bintu, wakaba kwikala kupitila bebi bintu.” 6 Inzi, palua kooloka kolia kuli kwafuma mu kulangilila kiketekelo, Mulandu Wakue Leeza ulandile evi: “Te kulanda evi mu mutima obe, ‘Nani wakaba kupiluka ku muulu?’ i kulanda, evi kumukoosiizia Kristu pansi, 7 ao, ‘Nani wakakookela mu abiso?’ i kulanda, evi kumupilusia Kristu kufuma ku bafwile.” 8 Inzi, lilembo lilandile syani? “Mulandu uli pepi nobe, mu kanua kobe we mwine ni mu mutima obe we mwine,” i kulanda, “mulandu” wa kiketekelo olia utuli mukusimikila. 9 Pantu kine wewe wapunda ntanzi ya bantu na kanua kobe nangue Yesu ni Mulopue, ni kulangilila kiketekelo mu mutima obe nangue Leeza waamufufwile kufuma ku bafwile, wewe wakaba kupususiiwa. 10 Muntu ali walangilila kiketekelo mu mutima palua kooloka, inzi ali wapunda ntanzi ya bantu na kanua palua bupusuko.
11 Lilembo lilandile nangue: “Te kuli muntu amuketekeele wakatyoka mutima.” 12 Te kuli kupusana kuli pakati ka Muyuda ni Mugiriki. Fwe bonse tuli sie na Mulopue umonke. Wene ali wabakwasia mu kwitonena baalia bonse bali bamulilila. 13 Pantu “muntu onse olia ali walilila mu liina lyakue Yehova,* wakapususiiwa.” 14 Inzi, bali kumulilila syani kine te bali na kiketekelo muli wene? Kabili, bakaba kumuketekela syani kine tebanaunvuepo pa lwakue? Kabili, bakaba kunvua syani bila muntu wa kusimikila? 15 Kabili, bakasimikila syani kine te batuminue? Kili sie nga evelia vilandile Malembo nangue: “Makasa a baalia bali basimikila mpunda iweme ya bintu biweme afwaniine sana!”
16 Inzi, te bonse baanakiile mpunda iweme. Pantu Isaya walanda evi: “We Yehova,* nani waakiketekela kelia kyaaunvwile kuli fwefue?”* 17 Pa kako, kiketekelo kili kyaalukako kisia kunvua kintu, kabili kine twaunvua, manake kuli muntu waakilanda pa lwakue Kristu. 18 Inzi, naipuzia evi palua Baisraeli, eba baapatile fwasi ya kunvua? Een, baapatile. Kakiine, Malembo alandile evi: “Mazui abo aaunvwikile mu kyalo kyonse, ni mpunda yabo yaabafikiile bantu mpaka ku fwasi ya kule sana ya kyalo.”* 19 Kabili naipuzia evi, eba Baisraeli baandilue kumana? Musa waasukanke evi: “Nakaba kumisonsezia kwaluka ni bwivu kupitila bantu basili ntundu; nakaba kumisonsezia kwaluka ni kipuki juu ya ntundu elia imwenue kuya yali ya bupuba.” 20 Inzi, Isaya wasipa sana ni kulanda evi: “Naapatilue na baalia basibanga bankeba, kabili naamanikile ku baalia basibanga baipuzia pa lwane.” 21 Inzi, walanda evi palua Baisraeli: “Koba konse nakiba nabafikiila bantu basizi kunakila, kabili ba mitue yumine.”*